ފަސްޓް ލޭޑީ ދައްކަވަމުން ގެންދަވާ ނަމޫނާ އަށް މިނިސްޓަރުގެ ތަޢުރީފު

ސިޔާސީ މައިދާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަބަލުން ސާޖިދާ މުޙައްމަދު، ކަނބަލުންނަށް ނަމުނާ ދައްކަވަމުން ގެންދަވާ ކަމަށް ވިދާޅުވެ މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު އެ ކަމަނާއަށް ތަޢުރީފުކުރައްވައިފިއެވެ.

ޕީޕަލްސް ނޭޝަނަލް ކޮންގްރެސް (ޕީއެންސީ) އިން ރޭ ބޭއްވި ކެމްޕޭނު ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރ ވިދާޅުވީ ރައްޔިތުންނާއެކު ބާއްވާ ބައްދަލުވުންތަކުގައި ފަސްޓް ލޭޑީ ބައިވެރިވެވަޑައިގަތުމަކީ ޕީއެންސީއަށް ލިބިގެންދާ ވަރަށް ބޮޑު ހިތްވަރެއް ކަމަށެވެ.

އަދި ހަމަ އެއާއެކު ސިޔާސީ ދާއިރާގައި އަންހެނުން ބާރުވެރިކުރުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ތަޞައްވުރަކަށްވާއިރު، އެ ތަޞައްވުރު ޙާޞިލްކުރެއްވުމަށް ފަސްޓު ލޭޑީ ކުރައްވާ މަސައްކަތްޕުޅަށް މިނިސްޓަރ ތަޢުރީފު ކުރެއްވިއެވެ.

''ފަސްޓް ލޭޑީ ހޭދަކޮށްދެއްވާ ވަގުތުތައް އެއީ އަޅުގަނޑު ހިތުން މިއަދު މި ތަނުގައި ތިއްބެވި ހުރިހާ ކަނބަލުންނަށް ވަރަށް ބޮޑު އުއްމީދަކާ އިތުބާރާއި ޔަގީންކަމެއް ލިބިގެންދާނެ ކަމެއް'' މިނިސްޓަރ ވިދާޅުވި އެވެ.

މި ބައްދަލުވުމުގައި ބައިވެރިވެވަޑައިގެންނެވި ކަނބަލުންނަށް މިނިސްޓަރ އިލްތިމާސްކުރެއްވީ ފަސްޓް ލޭޑީ ނަމޫނާއަކަށް ބެއްލުވުމަށެވެ. ސިޔާސީ ދާއިރާގެ އިތުރުން އިޖުތިމާޢީ ދާއިރާގައި ވެސް ފަސްޓު ލޭޑީގެ ފަހަތްޕުޅުގައި ތިއްބަވަން ވެސް މިނިސްޓަރުގެ ވާހަކަފުޅުގައި އިލްތިމާސްކުރެއްވިއެވެ.