ދައުލަތުގެ މާލީ ހާލަތު ރަނގަޅުވެ 1.9 ބިލިއަން ރުފިޔާގެ ސާޕްލަސްއެއްގައި، ބޭރު ފައިސާގެ އާމްދަނީ 222.8 މިލިއަން ޑޮލަރަށް

ވުޒާރާ ބެހޭ ރޭވުންތެރިކަމާ ތަރައްޤީގެ ކަންކަމާއި މާލީއިން އާންމުކޮށްފައިވާ 2026 ވަނަ އަހަރުގެ 8 ވަނަ ހަފުތާގެ މާލީ ރިޕޯޓު ގައި ވާގޮތުން، 1 ޖެނުއަރީ 2026 އިން 26 ފެބްރުއަރީ 2026 ގެ ނިޔަލަށް ދައުލަތުގެ މާލީ ހާލަތު ވަނީ ބޮޑުތަނުން ރަނގަޅުވެފައެވެ.

އެ މުއްދަތުގެ ތަފާސްހިސާބުތަކަށް ބަލާއިރު، ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމްލަ 7.8 ބިލިއަން ރުފިޔާ ލިބިފައިވާއިރު، ޖުމްލަ ހަރަދަކީ 5.9 ބިލިއަން ރުފިޔާއެވެ.

އެހެންކަމުން، މި މުއްދަތުގެ ނިޔަލަށް ދައުލަތުގެ ބަޖެޓުން 1.9 ބިލިއަން ރުފިޔާގެ ސާޕްލަސްއެއް ވަނީ ރެކޯޑުކުރެވިފައެވެ.

މިދިޔަ އަހަރުގެ މި މުއްދަތާ އަޅާބަލާއިރު އާމްދަނީއަށް ވަނީ ބޮޑު ކުރިއެރުމެއް ލިބިފައެވެ. އެގޮތުން، 2025 ވަނަ އަހަރު ލިބުނު 6.0 ބިލިއަން ރުފިޔާއާ އަޅާބަލާއިރު، މިއަހަރު ލިބުނު އާމްދަނީ ވަނީ 29.3 އިންސައްތަ އިތުރުވެފައެވެ. މީގެ ތެރެއިން 83 އިންސައްތައަކީ ޓެކުހުގެ ގޮތުގައި ލިބުނު އާމްދަނީކަމުން، ދައުލަތުގެ އާމްދަނީގައި ޓެކުހުގެ ދައުރު ބޮޑުކަން ފާހަގަކުރެވެއެވެ.

ޓެކުހުގެ ގޮތުގައި ލިބުނު އާމްދަނީއަށް ބަލާއިރު، 26 ފެބްރުއަރީ 2026ގެ ނިޔަލަށް 6.5 ބިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 5.0 ބިލިއަން ރުފިޔާއާ އަޅާބަލާއިރު 30.6 އިންސައްތައިގެ ކުރިއެރުމެކެވެ. ރިޕޯޓުގައި ފާހަގަކޮށްފައިވާ ގޮތުގައި، އެންމެ ބޮޑު ކުރިއެރުމެއް ލިބިފައިވަނީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ ޓެކްސް (ޓީ.ޖީ.އެސް.ޓީ) އިންނެވެ. އެގޮތުން ޓީ.ޖީ.އެސް.ޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތަ އިތުރު އަދަދެކެވެ.

ޖީ.އެސް.ޓީ އާއި ވިޔަފާރި އަދި މުދަލުން ނަގާ ޓެކްސްއަކީ އަދިވެސް ދައުލަތަށް އެންމެ ގިނައިން އާމްދަނީ ވަންނަ ދާއިރާތަކެވެ. ޖުމްލަ ޖީ.އެސް.ޓީގެ ގޮތުގައި 3.2 ބިލިއަން ރުފިޔާ ލިބިފައިވާއިރު، މިއީ މިމުއްދަތާ އަހަރުގެ މިދިޔަ އަޅާބަލާއިރު 32.1 އިންސައްތައިގެ އިތުރުވުމެކެވެ. އަދި ވިޔަފާރި އާއި މުދަލުން ނަގާ ޓެކުހުގެ ގޮތުގައި 2.2 ބިލިއަން ރުފިޔާ ވަނީ ލިބިފައެވެ.

ހަރަދުތަކަށް ބަލާއިރު، މިދިޔަ އަހަރާ އަޅާބަލާއިރު ޖުމްލަ ޚަރަދުތައް ވަނީ އެއްވަރެއްގައި ހިފެހެއްޓިފައެވެ. ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރާ ހަރަދު ވަނީ 9.6 އިންސައްތަ އިތުރުވެފައެވެ. މިއަހަރުގެ މި މުއްދަތުގައި މުސާރައާއި ޕެންޝަނަށް 2.64 ބިލިއަން ރުފިޔާ ހަރަދުކޮށްފައިވާއިރު މިއީ ޕޭ ހާމަނައިޒޭޝަން ސިޔާސަތުގެ ސަބަބުން އައިސްފައިވާ ބަދަލެކެވެ.

ދައުލަތުގެ މާލީ ހާލަތު ވަރުގަދަވުމުގެ ސަބަބުން، މިދިޔަ އަހަރުގެ މި މުއްދަތުގައި 98.2 މިލިއަން ރުފިޔާގައި ހުރި ސާޕްލަސް، މިއަހަރު ވަނީ 1.9 ބިލިއަން ރުފިޔާއަށް އުފުލިފައެވެ. މީގެ އިތުރުން، ސޮވެރިން ޑިވެލޮޕްމަންޓް ފަންޑަށް (އެސް.ޑީ.އެފް) ޖަމާކުރި އަދަދުވެސް ވަނީ 2.5 އިންސައްތަ އިތުރުވެ، 287.1 މިލިއަން ރުފިޔާއަށް އަރާފައެވެ .ބޭރު ފައިސާގެ އާމްދަނީއަށް ބަލާއިރު، މި މުއްދަތުގައި 222.8 މިލިއަން އެމެރިކާ ޑޮލަރު ދައުލަތަށް ލިބިފައިވެއެވެ.

މާލީ ވުޒާރާއިން ހާމަކުރިގޮތުގައި ކޮންމެ މާލީ އަހަރެއް ފަށައިގަންނައިރު ބައެއް ސަބަބުތަކާއި ހެދި މާލީ ހިސާބުތައް ހަމާކުރުމުގައި ލަސްވެއެވެ. ވަކިން ޚާއްސަކޮށް، މިއަހަރު ދައުލަތުގެ އެކައުންޓިންގ ނިޒާމުގެ އޮނިގަނޑަށް ގެނެވުނު ބަދަލުތަކާ ގުޅިގެން، ކޮންމެ ހަފްތާއަކު ގަވާއިދުން ނެރޭ "ވީކްލީ ފިސްކަލް ޑިވެލޮޕްމަންޓްސް" ރިޕޯޓު ޝާއިޢުކުރުން ވަނީ ލަސްވެފައެވެ. މި ބަދަލުތަކުގެ ތެރޭގައި ޝަރުޢީ ދާއިރާއަށް ދެވޭ "ސެކްޓޯރަލް ގްރާންޓް" ނިޒާމު ތަޢާރަފުކުރުމާއި، ޒަކާތު ފަންޑަށް ޚާއްޞަ ވަކި ލެޖަރ އެކައުންޓެއް ގާއިމުކުރުން ހިމެނެއެވެ.

މި އިޞްލާޙުތަކާއެކު، ދައުލަތުގެ އެކައުންޓިންގ ސިސްޓަމް އަލުން ތަރުތީބުކުރުމާއި، ބައެއް މާލީ ހިސާބުތައް ރިކައުންސިލްކުރުމުގެ މަސައްކަތްތައް ކުރިއަށް ގެންގޮސްފައިވުމަކީވެސް މި ރިޕޯޓްނެރުމުގައި ލަސްތަކެއް ދިމާވިކަމެއްކަމަށް މާލީ ވުޒާރާއިން ހާމަކުރެއެވެ.