logo
banner image

ދިވެހި އުފެއްދުންތަކަށް އައު ހިތްވަރެއް: އިޤްތިޞާދީ ވަޒީރު މުލަ މޯލްޑިވްސްއާ ބައްދަލު ކުރެއްވުން

އިޤްތިޞާދީ ވަޒީރު މުޙައްމަދު ސަޢީދު މުލަ މޯލްޑިވްސްގެ ވެރިންނާ ބައްދަލުކުރައްވައި، ދިވެހި އަމިއްލަ އުފެއްދުންތަކަށް ދިމާވެފައިވާ ގޮންޖެހުންތަކާ މެދު މަޝްވަރާކުރައްވާ ހައްލު ހޯދައިދިނުމަށް ފުރިހަމަ އެއްބާރުލުން ދެއްވާނެކަމުގެ ޔަޤީންކަން ދެއްވައިފިއެވެ.

މި ބައްދަލުވުމުގައި ވަޒީރު ސަޢީދު ވިދާޅުވީ، އަމިއްލަ އުފެއްދުންތައް އުފައްދާ ފަރާތްތަކުގެ މަސައްކަތްތައް ޤައުމީ ފެންވަރުގައި ސަރުކާރުން ފާހަގަކުރައްވަމުން ގެންދަވާނެ ކަމަށެވެ. އަދި ވިޔަފާރިތައް ކުރިއެރުވުމަށްޓަކައި، ފްރީޓްރޭޑް އެގްރީމެންޓްތައް ތަންފީޒުކުރަން ފެށުމުން، ދިވެހި އުފެއްދުންތައް ބޭރު ޤައުމުތަކުގެ ބާޒާރުތަކުގައި ވިއްކުމަށް ފަސޭހަވެ، ފައިދާ އިތުރުވެގެންދާނެ ކަމަށް ވެސް އެ މަނިކުފާނު ފާހަގަކުރެއްވިއެވެ.

މީގެ އިތުރުން، ބޭރު ޤައުމުތަކުގެ ބާޒާރުތަކުގައި ދިވެހި އުފެއްދުންތައް ވިއްކުމަށް އެ ޤައުމުތަކުގެ ބަހުން ޕްރޮޑަކްޓް ލޭބަލިންގ ތައްޔާރުކުރުމަކީ ވިއްކުމަށް ފަސޭހަވެގެންދާނެ ކަމެއް ކަމަށެވެ. އަދި ގޮންޖެހުން ހުރި ކަންކަމުގައި އެހީތެރިވެދެއްވުމަށް މިނިސްޓްރީގެ ބޭފުޅުންނާ ގުޅިގެން ކުރިއަށްދިއުމަށް އެދިވަޑައިގަތެވެ.

ރާއްޖޭގެ އަމިއްލަ ބްރޭންޑްތައް ބައިނަލްއަޤްވާމީ ބާޒާރުތަކަށް ނެރުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށާއި، ވޮޝިންގޓަނަށް ފަހުން ކުރެއްވި ދަތުރުގައިވެސް މިކަމަށް ގިނަގުނަ މަސައްކަތްތަކެއް ކުރެވުނު ކަމަށެވެ.

ވަޒީރު އިތުރަށް ފާހަގަކުރެއްވީ، ކޮޕީރައިޓް، ޕޭޓެންޓް އަދި އެހެނިހެން އިންޓެލެކްޗުއަލް ޕްރޮޕަޓީގެ ޤާނޫނުތަކަށް ޚާއްޞަ އިސްކަމެއް ދެއްވައިގެން މަސައްކަތް ކުރައްވަމުން ގެންދަވާ ކަމަށާއި، މީގެ ބޭނުމަކީ ދިވެހި އުފެއްދުންތައް ހިމާޔަތްކޮށް، ބައިނަލްއަޤްވާމީ ބާޒާރަށް ނެރޭއިރު ފުރިހަމަ ރައްކާތެރިކަން ފޯރުކޮށްދިނުން ކަމުގައެވެ. އަދި ތަކެތި އޮންލައިންކޮށް ވިއްކުމުގައި ހުރި ގޮންޖެހުންތައް ހައްލުކުރުމަށްވެސް މަސައްކަތް ކުރަމުންދާ ކަމަށް ވިދާޅުވިއެވެ.

މުލަ މޯލްޑިވްސް އިން ފާހަގަކުރެއްވިގޮތުގައި ވިޔަފާރި އިތުރަށް ފުޅާކޮށް ކުރިއެރުވުމަށް ބޭނުންވާ މާލީ އެހީތެރިކަމާއި، އުފެއްދުންތައް ވިއްކުމަށް އިތުރު ފުރުޞަތުތައް ބޭނުންވާކަމަށާއި އަދި ކުންފުނީގެ ކުރިމަގާމެދު އޮޕްޓިމިސްޓިކް ވިސްނުމެއް ގެންގުޅުއްވާ ކަމުގައެވެ.

2020 ވަނަ އަހަރު އުފެދުނު މުލަ މޯލްޑިވްސްއަކީ މިހާރު ރާއްޖޭގައި އިތުބާރުހިފޭ ދިވެހި އުފެއްދުމެކެވެ. މުލަ މޯލްޑިވްސްގެ އެންމެ މުހިންމު އެއް އަމާޒަކީ ތިމާވެށްޓަށް ގެއްލުން ނުދޭ، ފެންވަރު ރަނގަޅު އިރުގެ އަލިން ހަންގަނޑު ރައްކާތެރިކޮށްދޭނެ އުފެއްދުންތަކެއް ފޯރުކޮށްދިނުމެވެ. މިގޮތުން، އެ ކުންފުނީގެ ހުރިހާ އުފެއްދުންތަކަކީ މުރަކަތަކާ ރައްޓެހި، އަދި ކަނޑުގެ ދިރުންތަކަށް އެންމެ ގެއްލުންދެނިވި ދެ ކެމިކަލްކަމުގައިވާ އޮކްސިބެންޒޯން އަދި އޮކްޓިނޮކްސޭޓް ނުހިމެނޭ އުފެއްދުންތަކެއް ކަމަށާއި އަދި މިހުރިހާ އުފެއްދުންތަކަކީ އޮސްޓްރޭލިއާގެ ތެރަޕިއުޓިކް ގުޑްސް އެޑްމިނިސްޓްރޭޝަން (ޓީޖީއޭ) އިން ސެޓިފައިކޮށްފައިވާ ތަކެތިކަން ވެސް ފާހަގަކުރެވެއެވެ.

މި ބައްދަލުވުމަކީ ދިވެހި އަމިއްލަ އުފެއްދުންތަކަށް ހިތްވަރުދިނުމާއި، އެ އުފެއްދުންތައް ކުރިއެރުވުމަށް ސަރުކާރުން ދެއްވާ އަހަންމިއްޔަތު ދައްކުވައިދޭ ބައްދަލުވުމެކެވެ.