ރ. އިންގުރައިދޫގައި 350 ކިލޯވޮޓްގެ ސޯލާ ޕީވީ ހައިބްރިޑް ސިސްޓަމެއް ބެހެއްޓުމުގެ މަސައްކަތް ކުރިއަށް

ރ. އިންގުރައިދޫގައި 350 ކިލޯވޮޓްގެ ސޯލާ ޕީވީ ހައިބްރިޑް ސިސްޓަމަކާއި 618 ކިލޯވޮޓް ގަޑީގެ ބެޓެރީ އެނަރޖީ ސްޓޯރޭޖް ސިސްޓަމް (BESS) ބެހެއްޓުމުގެ މަސައްކަތް މިހާރު ދަނީ ކުރިއަށެވެ. މި މަޝްރޫޢުގެ ސަބަބުން ރަށުގެ ކަރަންޓަށް ބޭނުންވާ ޑީސަލް ދަށްކޮށް، ތިމާވެއްޓަށް ކުރާ ނޭދެވޭ އަސަރު ކުޑަކުރެވޭނެ ކަމަށް ކަމާބެހޭ ފަރާތްތަކުން ވަނީ ބުނެފައެވެ.

މި ސިސްޓަމް ބޭނުންކުރަން ފެށުމާއެކު، އަހަރަކު 164,672 ލީޓަރުގެ ޑީސަލް ބޭނުންކުރުން ކުޑަވެގެންދާނެއެވެ. މީގެ އިތުރުން، 403 ޓަނުގެ ކާބަން ޑައިއޮކްސައިޑް (CO₂) ވައިރިދުން ހުއްޓުވޭނެކަމަށް ލަފާކުރެވެއެވެ. މިއީ ރާއްޖޭގެ ކަރަންޓު އުފެއްދުމުގައި ތިމާވެއްޓާ ރައްޓެހި ހަކަތަ ބޭނުންކުރުމަށް ރާއްޖެ ކުރާ މަސައްކަތަށް ލިބޭ ކުރިއެރުމެކެވެ.

މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ ތެރޭގައި ހިންގަވާ ވަރަށް މުހިންމު މަޝްރޫޢުތަކުގެ ތެރެއިން އެއް މަޝްރޫޢުއެވެ. 2028 ވަނަ އަހަރާ ހަމައަށް، ރާއްޖޭގެ ކަރަންޓު އުފައްދާ މިންވަރުގެ 33 އިންސައްތަ އިޔާދަކުރަނިވި ހަކަތައިން އުފެއްދުމަށް ރައީސް ޑރ. މުޢިއްޒު ކަނޑައަޅުއްވާފައިވާ ވިޝަން ޙާސިލްކުރުމަށް މި މަޝްރޫޢަކީ މުހިންމު ފިޔަވަޅެކެވެ. މި ސިސްޓަމް ބެހެއްޓުމުގެ މަސައްކަތް ނިމި، އިންގުރައިދޫ ރައްޔިތުންނަށް އޭގެ ފައިދާ ލިބެން ފަށާނެ ދުވަހަކަށް ގިނަ ބަޔަކު އުންމީދު ކުރެއެވެ.