ނޢޢވގެ ލަޤަބު ޗީފް ޖަސްޓިސް ރިޓަޔަރޑް އަލްއުސްތާޛު އަޙްމަދު މުޢުތަޞިމް ޢަދުނާނަށް އަރުއްވައިފި.

ދިވެހި ދައުލަތުން ދެއްވާ ޝަރަފު، ނިޝާން ޢިއްޒުއްދީން ޢިއްޒަތުގެ ވެރިޔާގެ ލަގަބު، ކުރީގެ އުއްތަމަ ފަނޑިޔާރު، ޗީފް ޖަސްޓިސް ރިޓަޔަރޑް އަލްއުސްތާޛު އަޙްމަދު މުޢުތަޞިމް ޢަދުނާނަށް އަރުއްވައިފިއެވެ.

ދިވެހިރާއްޖޭގެ މިނިވަންކަމަށް 60 އަހަރު ފުރޭ ފަޚުރުވެރި މިނިވަން ދުވަހުގެ ރަސްމީ ޖަލްސާގައި ޗީފް ޖަސްޓިސް ރިޓަޔަރޑް އަލްެއުސްތާޛު އަޙްމަދު މުޢުތަސިމް ޢަދުނާނަށް މި ލަގަބު އެރުއްވީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ.

ޗީފް ޖަސްޓިސް ރިޓަޔަރޑް އަލްއުސްތާޛު އަޙްމަދު މުޢުތަސިމް ޢަދުނާނު ދިވެހި ދައުލަތަށް ޚިދުމަތް ކުރައްވާން ފެށްޓެވީ 1983 ވަނަ އަހަރުއެވެ. މި ޝަރަފުވެރި ޚިދުމަތުގައި ދިވެހިރާއްޖޭގެ ޝަރުޢީ ދާއިރާ ހަރުދަނާ ކުރެއްވުމާއި އެ ދާއިރާއިން މީހުން ތަމްރީން ކުރެއްމާއި ޤާނޫނީ ލަފާ ދެއްވުމުގެ މަސައްކަތް އެމަނިކުފާނު ވަނީ ކުރައްވައިފައެވެ.

ޗީފް ޖަސްޓިސް ރިޓަޔަރޑް އަލްއުސްތާޛު އަޙްމަދު މުޢުތަސިމް ޢަދުނާނު، ދިވެހިރާއްޖޭގެ އުއްތަމަ ފަނޑިޔާރު ކަމަށް ޢައްޔަން ކުރެއްވީ 2019 ވަނަ އަހަރުގެ ޑިސެންބަރު މަހުގެ 8 ވަނަ ދުވަހުއެވެ. އަދި ރިޓަޔަރ ކުރެއްވީ 2025 ވަނަ އަހަރުގެ ޖުލައި މަހުގެ 21 ވަނަ ދުވަހުއެވެ.

ނިޝާން ޢިއްޒުއްދީނުގެ ޢިއްޒަތުގެ ލަޤަބަކީ ދިވެހިރާއްޖޭގެ ޤާނޫނު ނަންބަރު 97/1 ދިވެހިރާއްޖޭގެ ޢިއްޒަތުގެ ޤާނޫނުން ރައީސުލްޖުމްހޫއްޔާއަށް ލިބިވަޑައިގަންނަވާ ބާރުގެ ދަށުން އަރުއްވާ ލަގަބެކެވެ.