ރައީސުލްޖުމްހޫރިއްޔާ، ދިވެހި ސިފައިންނާއި ދިވެހި ފުލުހުންނާ ބައްދަލުކުރައްވައިފި

ދިވެހިރާއްޖޭގެ ފަޚުރުވެރި މިނިވަން ދުވަހުގެ މުނާޞަބަތުގައި، ރާއްޖޭގެ ރައީސުލްޖުމްހޫރިއްޔާ އަދި ސިފައިންނާއި ފުލުހުންގެ އެންމެމަތީ ވެރިޔާ، ޑރ. މުޙައްމަދު މުޢިއްޒު، ދިވެހި ސިފައިންނާއި ދިވެހި ފުލުހުންނާ މިއަދު ބައްދަލުކުރައްވައިފިއެވެ. މިއީ، ސިފައިންނާއި ފުލުހުންގެ ތާރީޚުގައި ވެސް ސިފައިންނާއި ފުލުހުން އެކުގައި މިފަދަ ރަސްމިއްޔާތެއް ބާއްވާ ފުރަތަމަ ފަހަރެވެ.

މިއަދު ހެނދުނު ޒުވާނުންގެ މަރުކަޒުގައި އޮތް މި ރަސްމިއްޔާތަށް ރައީސުލްޖުމްހޫރިއްޔާ ވަޑައިގަތުމާއެކު، އެމަނިކުފާނަށް މަރްޙަބާ ވިދާޅުވީ، ދިފާޢީ ވަޒީރު މުޙައްމަދު ޣައްސާން މައުމޫނާއި، ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާނާއި، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ، އަދި ޕޮލީސް ކޮމިޝަނަރ އިސްމާޢީލް ނަވީންއެވެ. މި ރަސްމިއްޔާތަށް ވަޑައިގެންނެވުމުން، ރައީސުލްޖުމްހޫރިއްޔާގެ ޝަރަފުގައި، އެމަނިކުފާނަށް ޝަރަފުގެ ގާޑެއްވެސް ވަނީ އަރުވާފައެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ވަނީ، ސިފައިންގެ ތެރެއިން ދިގުމުއްދަތެއްގައި ޚިދުމަތް ކުރުމުގެ މެޑެއްޔާއި، މަތިވެރި ޚިދުމަތުގެ މެޑެލި އަދި ރައީސުލްޖުމްހޫރިއްޔާގެ މެޑެލި ލިބިވަޑައިގެންނެވި އަސްކަރީންނަށް މެޑެލި ހަވާލުކޮށްދެއްވާފައެވެ. އަދި ފުލުހުންގެ ތެރެއިން ރައީސުލްޖުމްހޫރިއްޔާގެ މެޑެއްޔާއި މަތިވެރި ޚިދުމަތުގެ މެޑެލި ލިބިވަޑައިގެންނެވި ފުލުހުންނަށްވެސް އެމަނިކުފާނު ވަނީ މެޑެލި ހަވާލުކޮށްދެއްވާފައެވެ.

މެޑެލި ހަވާލުކޮށްދެއްވުމަށްފަހު ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ދިވެހި ސިފައިންނާއި ފުލުހުންނަށްޓަކައި އަދުގެ ސަރުކާރުން ކޮށްދޭންޖެހޭ ކަމެއް، ފަޚުރުވެރިކަމާއެކު ކޮށްދެއްވާނެކަމުގެ ޔަޤީންކަން ދެއްވިއެވެ. އަދި ދިވެހިރާއްޖޭގެ މިނިވަންކަމާއި ސުލްޙަމަސަލަސްކަން ދެމެހެއްޓުމުގައި ދިވެހި ސިފައިންނާއި ފުލުހުން އަދާކުރަމުންދާ ޚިދުމަތުގެ އަގު ވަޒަން ކުރައްވައި، އެކަން ފާހަގަކުރެއްވިއެވެ.

މި ބައްދަލުވުމުގައި، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި ކޮމިޝަނަރ އޮފް ޕޮލިސް އިސްމާޢީލް ނަވީން ވެސް ވަނީ ވާހަކަފުޅު ދައްކަވާފައެވެ.

ޗީފް އޮފް ޑިފެންސް ފޯސް ދެއްކެވި ވާހަކަފުޅުގައި، ދިވެހި އަސްކަރިއްޔާގެ ކުރިމަތި މިއަދު ބައްޓަން ކުރެވިގެން ދަނީ، މި ގައުމުގެ މިނިވަންކަން ދިފާޢުކުރުމުގެ ގާބިލު ބަޔަކަށް ސިފައިން ވުމަށާއި، ދިވެހި ރައްޔިތުންގެ ހިތުގެ ލޯތްބާއި އިޙްތިރާމާއި އިތުބާރު ލިބޭ ބައެއްގެ ގޮތުގައި ދެމި ތިބުމުގެ އިތުރުން ރައްޔިތުންނަށް ދިމާވާ ކޮންމެ ބޮޑު ކަމެއްގައި މަދަދުގާރެއްގެ ގޮތުގައި ރެއާއި ދުވާލު، އަތްވާއި ވާރޭގައި ފަސްނުޖެހި ތިބޭ ބަޔަކަށް ސިފައިން ވުމަށް ޓަކައި ކަމުގައި ވިދާޅުވިއެވެ. އަދި، ދިވެހި ސިފައިންނަކީ، ސައުވީސް ގަޑިއިރު ގައުމީ ޚިދުމަތުގައި ދެމިތިބޭނެ ބައެއް ކަމަށާއި، މާތްﷲ ގަންދީ ކޮށްފައިވާ ހުވައިގައި ސާބިތުވެ ތިބެ، ހަށިގަނޑާއި ފުރާނައިން މި ގައުމުގެ މިނިވަންކަން ދިފާޢުކުރުމަށް ޓަކައި އަބަދުވެސް ދިވެހި ސިފައިން ތިބޭނީ ތައްޔާރަށް ކަމުގައި ފާހަގަކުރެއްވިއެވެ.

ރަސްމިއްޔާތުގައި، ކޮމިޝަނަރ އޮފް ޕޮލިސް އިސްމާޢީލް ނަވީން ދެއްކެވި ވާހަކަފުޅުގައި، ދިވެހި ފުލުހުންނަކީ މުޖުތަމަޢުގެ ސަލާމަތާއި ރައްކާތެރިކަން ކަށަވަރުކޮށް ރައްޔިތުންނަށް ޚިދުމަތްކުރަން ތިބި ބައެއް ކަމަށާއި، މުޖުތަމަޢުގެ މިނިވަންކަމާއި އަމަންއަމާންކަން ގާއިމުކޮށް ރައްކާތެރިކޮށްދިނުމަކީ ދިވެހި ފުލުހުންގެ ޒިންމާއެއް ކަމުގައި ވިދާޅުވިއެވެ. އަދި، ފުލުހުންގެ ކޮންމެ ޔުނިފޯމަކުން ދައްކައިދެނީ ގައުމާއި ރައްޔިތުންނަށް ޓަކައި ކޮށްދެވޭ ޚާއްޞަ ޚިދުމަތެއް ކަމާއި، ފުލުހުންގެ ކޮންމެ ހަރަކާތަކީ މުޖުތަމަޢުއަށް އަންނަ ބަދަހިކަމެއްކަން ފާހަގަކުރެއްވިއެވެ. އޭގެ އިތުރުން، ގާނޫނުތައް ތަންފީޒުކުރުމަށާއި، ދިވެހިރާއްޖެ ރައްކާތެރި ގައުމަކަށް ހެދުމަށް ކުށުގެ ބިރުވެރިކަމުން މުޖުތަމަޢު ސަލާމަތްކުރުމަށް ފުލުހުން އަބަދުމެ މަސައްކަތްކުރައްވަމުން ގެންދަވާކަން ފާހަގަކުރެއްވިއެވެ.

މި ރަސްމިއްޔާތުގައި، ދިވެހި ސިފައިންނާއި ދިވެހި ފުލުހުންގެ ޢަޒުމު އާކުރުން އޮތެވެ. ސިފައިންނަށް ޢަޒުމު ލައިދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. އަދި، ފުލުހުންނަށް ޢަޒުމު ލައިދެއްވީ ކޮމިޝަނަރ އޮފް ޕޮލިސް އިސްމާޢީލް ނަވީންއެވެ.

މި ރަސްމިއްޔާތުގައި، ދިފާޢީ ވަޒީރު، އޮނަރަބަލް މުޙައްމަދު ޣައްސާން މައުމޫންއާއި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، އޮނަރަބަލް ޢަލީ އިހްސާންއާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާސްއާއި، ސިފައިންގެ ޖެނެރަލް އޮފިސަރުންނާއި، އެހެނިހެން ރޭންކުތަކުގެ ގިނަ އަދަދެއްގެ ސިފައިންނާއި ފުލުހުން ބައިވެރިވެލެއްވިއެވެ.