މިނިވަން ދުވަހުގެ މުނާޞަބަތުގައި، ކޯއްޓޭއަށް ގައުމީ ދިދަ ނެގުމުގެ ރަސްމިއްޔާތު ބާއްވައިފި

ދިވެހިރާއްޖޭގެ މިނިވަންކަމަށް 60 އަހަރު ފުރޭ މިނިވަން ދުވަހުގެ މުނާޞަބަތުގައި، ކޯއްޓޭއަށް ގައުމީ ދިދަ ނެގުމުގެ ރަސްމިއްޔާތު ބާއްވައިފިއެވެ.

މިއަދު ހެނދުނު ޖުމްހޫރީ މައިދާނުގައި ބޭއްވި ރަސްމިއްޔާތުގައި، ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެމަތީ ވެރިޔާ ޑޮކްޓަރ މުޙައްމަދު މުޢިއްޒުއާއި، އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު ބައިވެރިވެވަޑައިގެންނެވިއެވެ. މި ރަސްމިއްޔާތު ފެށީ މިއަދުގެ ހެނދުނު 06:00ގައެވެ.

މި ރަސްމިއްޔާތަށް ރައީސުލްޖުމްހޫރިއްޔާގެ ދެކަނބަލުން ވަޑައިގެންނެވުމުން، އެ ދެކަނބަލުންނާ ޖުމްހޫރީ މައިދާނުން އިސްތިޤުބާލުކުރެއްވީ، ދިފާޢީ ވަޒީރު އޮނަރަބަލް މުޙައްމަދު ޣައްސާން މައުމޫންއާއި، ދިވެހިބަހާއި ސަގާފަތާއި ތަރިކައާ ބެހޭ ވަޒީރު އޮނަރަބަލް އާދަމް ނަޞީރުއާއި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. ރަސްމިއްޔާތަށް ރައީސުލްޖުމްހޫރިއްޔާގެ ދެކަނބަލުން ވަޑައިގެންނެވުމާ އެކު، ސިފައިންގެ ލަޝްކަރުން އޮނަރގާޑެއް އަރުވައި، ސިފައިންގެ ބޭންޕާޓީން ބިއުގަލް ކޯލެއް އެރުވިއެވެ.

މި ރަސްމިއްޔާތުގައި، ސިފައިންގެ ދިދަވެރީން، ދިވެހި ޤައުމީ ދިދަ ކޯއްޓޭއަށް ނަގައި ނިމުމުން، ބޭންޕާޓީގައި ގައުމީ ސަލާމް ކުޅުނެވެ. މި ރަސްމިއްޔާތުގައި ލަޝްކަރުގެ މެހިތަރަކަށް ހުންނެވީ، ލެފްޓިނެންޓް ކާނަލް އަޙްމަދު ޖަމީލްއެވެ.

މި ރަސްމިއްޔާތު ނިމިގެން ދިޔައީ، ޚާއްޞަ ދުޢާއެއް ކުރުމުންނެވެ. އިސްވެ ދުޢާ ދެންނެވީ އައްޝެއިޚް ޢިއްޒުއްދީން އަދުނާންއެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި އެމަނިކުފާނުގެ އަނބިކަނބަލުން ޢާއިޝަތު އަފްރީން މުޙައްމަދުގެ އިތުރުން ސަރުކާރުގެ ވަޒީރުންނާއި، ދައުލަތުގެ ޢިއްޒަތްތެރިންނާއި، ރައްޔިތުން މަޖިލީހުގެ މެންބަރުންގެ އިތުރުން، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި، ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއާއި ސިފައިން ޖެނެރަލް އޮފިސަރުންނާއި އޮފިސަރުން އަދި އެކިއެކި މުއައްސަސާތަކާއި އިދާރާތަކުގެ އިސް ބޭފުޅުންނާއި، ސްކޫލުތަކުގެ ދަރިވަރުންނާއި ސަރުކާރު އޮފީސްތަކުގެ ބައެއް މުވައްޒަފުން ބައިވެރިވެލެއްވިއެވެ.