މިނިވަން ދުވަހުގެ ދިދަނެގުމުގެ ޚާއްޞަ އިޙުތިފާލުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެންފި

މިއަދު ބޭއްވުނު މި އަހަރުގެ މިނިވަން ދުވަހުގެ ދިދަނެގުމުގެ ޚާއްޞަ އިޙްތިފާލުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު ބައިވެރިވެވަޑައިގެންފިއެވެ. މިނިވަން ދުވަހާއި ގުޅިގެން ބޭއްވި ދިދަ ނެގުމުގެ ޚާއްޞަ ރަސްމިއްޔާތު އޮތީ މިއަދު ހެނދުނު 6:00 ގައި، ޖުމްހޫރީ މައިދާނުގައެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުންގެ އިތުރަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި ސަރުކާރުގެ އިސްވެރިންނާއި ބޭރުގެ އިއްޒަތްތެރިން ބައިވެރިވެވަޑައިގެންނެވިއެވެ.

ދިދަނެގުމުގެ ރަސްމިއްޔާތަށް ޖުމްހޫރީ މައިދާނަށް ރައީސުލްޖުމްހޫރިއްޔާގެ ދެކަނބަލުން ވަޑައިގެންނެވުމުން، އެ މައިދާނުން އެދެކަނބަލުންނަށް، މަރުޙަބާ ވިދާޅުވީ، ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމާއި ދިފާޢީ ވަޒީރު މުޙައްމަދު ޣައްސާން މައުމޫނެވެ.

މިނިވަން ދުވަހުގެ ދިދަނެގުމުގެ މި ޚާއްޞަ ރަސްމިއްޔާތުގައި، ޤައުމީ ދިދަ ނެގުމުގެ އިތުރުން، ދުވަހާ ގުޅޭ ޚާއްޞަ ދުޢާއެއް ކުރުންވެސް އޮތެވެ. މި ރަސްމިއްޔާތު ނިންމާލާފައި ވަނީ ޤައުމީ ދިފާއީ ބާރުގެ ބޭންޑްޕާޓީގައި ޤައުމީ ސަލާމް ކުޅުމާއެކުގައެވެ.

ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް ޖުލައި މަހުގެ 26 ވަނަ ދުވަހެވެ. އެއީ 1887 އިން ފެށިގެން ދިވެހިރާއްޖެ އިނގިރޭސިންގެ ޙިމާޔަތުގައި އޮތުމަށްފަހު، 1965 ގައި އޭރު ދިވެހިރާއްޖޭގެ ބޮޑުވަޒީރު ކަމުގައި ހުންނެވި ސުމުއްވުލްއަމީރު އިބްރަހީމް ނާސިރު ރަންނަބަނޑޭރި ކިލެގެފާނު ކޮޅުނބުގައި ހުންނަ އިނގިރޭސި އެންބަސީގައި އެ ހިމާޔަތުގެ އެއްބަސްވުން ނިމުމަކަށް ގެންނަވާ، ދިވެހިރާއްޖެއަކީ މިނިވަން މުސްތަޤިއްލު ގައުމެއްގެ ގޮތުގައި ކަނޑައެޅުއްވި ދުވަސް ފާހަގަކުރުމަށެވެ. މިއަހަރު ދިވެހީން މި ފާހަގަކުރަނީ މި އެއްބަސްވުމަށް 60 އަހަރު ފުރޭ ފަޚުރުވެރި މުނާސަބާއެވެ.

ކޮންމެ އަހަރެއްގެވެސް ޖުލައި މަހުގެ 26 ވަނަދުވަސް ރާއްޖޭގައި ފާޙަގަކުރަމުން އަންނަނީ ދިވެހިރާއްޖޭގެ މިނިވަންދުވަހުގެ ގޮތުގައެވެ.