މިނިވަން 60 ފާހަގަ ކުރުމުގެ ގޮތުން ސްޓެލްކޯއާއި އެސްޓީއޯއިން ތައްޔާރު ކުރާ ދެ ފުޅަނދު ވަޒީރު އާދަމް ނަޞީރު އިބްރާހީމް، ބައްލަވައިލައްވައިފި.

މިނިވަން 60 ފާހަގަ ކުރުމުގެ ގޮތުން ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އާއި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ތައްޔާރުކުރަމުންދާ ފުޅަނދުތަކުގެ ޢަމަލީ މަސައްކަތް ހިނގަމުންދާ ގޮތް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ބައްލަވައިލައްވައިފި އެވެ.

މާލޭ ސަރަހައްދުގައި ކުރިއަށްގެންދާ ފުޅަނދު ބުރުގައި ބައިވެރިކުރުމަށް ތައްޔާރުކުރަމުންދާ ފުޅަނދުތަކުގެ ތެރެއިން ވަޒީރު މިއަދު ބައްލަވާލައްވާފައި ވަނީ ސްޓެލްކޯއާއި އެސްޓީއޯއިން ތައްޔަރުކުރަމުންގެންދާ ފުޅަނދު ތަކެވެ..

މިގޮތުން ސްޓެލްކޯގެ ފުޅަނދުން އެ ބޭފުޅުންގެ ޚިދުމަތުގެ މުސްތަޤުބަލް ވަރަށް އުފެއްދުންތެރި ވިސްނުމެއްގައި ހުށަހަޅައިދެއެވެ. އަދި ކުޑަކުދީންނާ ޒުވާނުން ޝައުޤުވެރިކުރުވާނެ ކުޅިވަރުތައް ހިމަނާފައިވެއެވެ.

އެސްޓީއޯއަށް ބަލާއިރު، މިއީ އެބޭފުޅުންގެ ޚިދުމަތުގައި ވެސް، ތާރީޚީ އަހަރެކެވެ. އެސްޓީއޯގެ ފުޅަނދުން އެ ބަދަލުގެ އިތުރަށް މިނިވަންކަމާައި އަޅުވެތިކަމުގެ ތަފާތު ރަމްޒުކޮށްދެއެވެ.

ވަޒީރު މިއަދު ބައްލަވައިލެއްވި ދެފުޅަނދާ ބެހޭ މަޢުލޫމާތު އެ ފުޅަނޑުތަކުގެ އިންޖިނިއަރުންގެ ޓީމުން ވަނީ ވަޒީރަށް މަޢުލުމާތު އަރުވާފައެވެ. އަދި ވަޒީރު ވަނީ އެ ބޭފުޅުންގެ މަސައްކަތަށް ތާރީފުކުރައްވައި ޝުކުރު އަދާކުރަައްވައިފައެވެ.

މިނިވަންދުވަހާ ގުޅިގެން މާލޭގެ ބޮޑެތި މަގުތަކުގައި ފުޅަނދުބުރު ކުރިއަށް ގެނެދިއުމަށް ހަމަޖެހިފައިވަނީ ޖުލައި 27 ވަނަދުވަހުގެ ރޭ 20:30 ގައެވެ.އަދި ޖުލައި 28 ވަނަދުވަހުގެ ރޭ 20:30 ގައި ހުޅުމާލޭ ސެންޓުރަލް ޕާކު ސަރަހައްދުގައި ވެސް ފުޅަނދުތައް ދައްކާލަން ވަނީ ހަމަޖެހިފައެވެ.