މާލެ އަދި ވިލިމާލޭގެ މަގުތައް ތަރައްޤީކުރުމުގެ މަޝްރޫޢުގެ ފީސިބިލިޓީ އެސެސްމަންޓް މަސައްކަތް ޗައިނާގެ މާހިރުންގެ ޓީމާއެކު ރަސްމީކޮށް ފަށައިފި

ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މާލެ އަދި ވިލިމާލޭގެ މަގުތައް އަލުން ރަނގަޅު ފެންވަރަކަށް ތަރައްޤީކުރުމުގެ މަޝްރޫޢުގެ ދަށުން ކުރިއަށް ގެންދިއުމަށް ހަމަޖެހިފައިވާ މަގުތަކުގެ ސަރވޭކުރުމާއި ފީސިބިލިޓީ އެސެސްމަންޓް މަސައްކަތް ޗައިނާގެ މާހިރުންގެ ޓީމާއެކު ރަސްމީކޮށް ފަށައިގެން ކުރިއަށް އެބަދެއެވެ. މިނިސްޓްރީގެ ޓެކްނިކަލް ޓީމާއި ގުޅިގެން  ކުރިއަށްދާ މި މަސައްކަތަކީ، މަޝްރޫޢުގެ ޑިޒައިން އަދި ޕްލޭނިންގ މަރުޙަލާތަކަށް މަގުފަހިކުރުމަށްޓަކައި ކުރެވޭ ފީސިބިލިޓީ ދިރާސާއެކެވެ. މި ދިރާސާ ކުރިއަށްގެންދިއުމަށް ހަމަޖެހިފައިވަނީ މިހިނގާ ނޮވެންބަރ މަހުގެ 21 ވަނަ ދުވަހާއި ހަމައަށެވެ. މި މަޝްރޫޢުގެ ދަށުން ކުރެވޭ މަސައްކަތްތަކުގެ ތެރޭގައި މާލޭގެ މަގުތަކުގެ ޙާލަތު ދެނެގަތުމާއި، މަގުތަކުގެ ފެންވަރު ރަނގަޅުކުރުމަށް ބޭނުންވާ ކަންކަން ފާހަގަކުރުން ހިމެނެއެވެ. މީގެ އިތުރުން، މަގުތަކުގެ ޓްރެފިކް ފްލޯ އަދި ޕާކިންގ ނިޒާމު ހަރުދަނާކުރުމަށް ބޭނުންވާ ބަދަލުތައްވެސް މި ދިރާސާގެ ތެރެއިން ފާހަގަކުރެވޭނެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅުތަކުގެ ތެރެއިން މާލެ އާއި ވިލިމާލޭގެ މަގުތައް އަލުން ހެދުމަށް ވެވަޑައިގަތް ވަޢުދުގެ ދަށުން، ޗައިނާ ސަރުކާރުގެ ހިލޭ އެހީގައި ކުރިއަށް ގެންދިއުމަށް ހަމަޖެހިފައިވާ މާލެ އާއި ވިލިމާލޭގެ މަގުތައް ރަނގަޅު ފެންވަރަކަށް ތަރައްޤީކުރުމުގެ މަޝްރޫޢު ނިމުމުން މާލެ އަދި ވިލިމާލޭގެ މަގުތަކުގެ ފެންވަރު ރަނގަޅުވެ، ރައްޔިތުންނަށް ލުއިފަސޭހަ ދަތުރުފަތުރުގެ ނިޒާމެއް ޤާއިމުވެގެންދާނެކަމަށް އުއްމީދުކުރެވެއެވެ.