މިނިސްޓަރ އޮފް ސްޓޭޓް ޙަސަން ރަޝީދު އަދި ޑެޕިއުޓީ މިނިސްޓަރ މުޙައްމަދު ޢިމްރާން ހަސަން، މ. މުލަކު ކައުންސިލާއި ބައްދަލުކުރައްވައިފި

މިނިސްޓަރ އޮފް ސްޓޭޓް ޙަސަން ރަޝީދު އަދި ޑެޕިއުޓީ މިނިސްޓަރ މުޙައްމަދު ޢިމްރާން ޙަސަން މ. މުލަކު ކައުންސިލާއި ބައްދަލުކުރައްވައިފިއެވެ. މިބައްދަލުވުމުގައި މިނިސްޓްރީގެ ޓެކްނިކަލް ޓީމުގެ އިތުރުން މ. މުލަކު ކައުންސިލް މެންބަރުންވަނީ ބައިވެރިވެވަޑައިގެންފައެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވިފައިވަނީ މ. މުލަކުގެ ބަނދަރާއި ގޮނޑުދޮށް ޙިމާޔަތްކުރުމުގެ މަޝްރޫޢުތަކާއި ގުޅޭގޮތުންނެވެ. މިގޮތުން މިފަދަ މަޝްރޫޢުތައް ކުރިއަށް ގެންދިއުމުގައި ދިމާވެދާނެ ގޮންޖެހުންތަކާއި އެކަންކަން ޙައްލުކުރެވިދާނެ ގޮތްތަކާއި މެދުވެސް ވަނީ މަޝްވަރާކުރެވިފައެވެ. ޚާއްޞަކޮށް ބަނދަރާއި ގޮނޑުދޮށް ޙިމާޔަތްކުރުމުގެ މަޝްރޫޢުތަކަކީ ރަށުގައި ދިރިއުޅޭ ރައްޔިތުން އެކަމަކަށް އެދި އުއްމީދުކުރަމުންދާ, އިޤްތިޞާދީ އަދި ތިމާވެށީގެ ގޮތުންބަލާއިރުވެސް ރަށަށް ވަރަށް މުހިންމު މަޝްރޫޢުތަކެއް ކަމުގައި ކައުންސިލުން ފާހަގަކުރެއްވިއެވެ.  މި ބައްދަލުވުމުގެ ސަބަބުން މ. މުލަކުގެ ބަނދަރާއި ގޮނޑުދޮށް ޙިމާޔަތްކުރުމުގެ މަސައްކަތުގެ އެންމެ ފަހުގެ މައުލޫމާތުތައް ހިއްސާކުރެވި މަޝްރޫޢުތައް ކުރިއަށް ގެންދިއުމަށް ލިބުނު އިތުރު ބާރަކަށް ވެގެންދާނެކަމަށް މިނިސްޓްރީއިން ފާހަގަކުރެއެވެ.