ޕޮލިސް އިނީޝަލް ޓްރެއިނިންގ ކޯހުގެ ދަރިވަރުންނަށް، ބޭސިކް ފަޔަރ އެވެއަރނަސް ސެޝަންތަކެއް ފަށައިފި

އައްޑޫ ސިޓީގައި ހުންނަ މޯލްޑިވްސް ޕޮލިސް ސަރވިސްގެ "ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް" ގައި ކުރިއަށް ދާ 37 ވަނަ ޕޮލިސް އިނީޝަލް ޓްރެއިނިންގ ކޯހުގެ ދަރިވަރުންނަށް، އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔަރ ސްޓޭޝަނުން، ބޭސިކް ފަޔަރ އެވެއަރނަސް ސެޝަންތަކެއް ފަށައިފިއެވެ.

އެ ކޮލެޖުގައި އޮކްޓޫބަރު 27 ވަނަ ދުވަހުން ފެށިގެން 5 ދުވަހަށް ކުރިއަށް ގެންދާ މި ސެޝަންތަކުގައި، އަލިފާން ރޯވާން މެދުވެރިވާ ސަބަބުތަކާއި، އަލިފާން ފެތުރޭ ގޮތްތަކާއި، އަލިފާން ނިއްވާނެ ގޮތުގެ އަސާސީ މަޢުލޫމާތާއި، އަލިފާންނިވިއާއި ފަޔަރ ބްލޭންކެޓް ބޭނުން ކުރާނެގޮތުގެ މުހިންމު މަޢުލޫމާތުތައް ކިޔައިދިނުމަށް ވަނީ ހަމަޖެހިފައެވެ. އަދި މި ސެޝަންތަކުގައި ޢަމަލީ ގޮތުން އަލިފާން ނިއްވާނެ ގޮތް ދައްކައިދީ، އަލިފާން ނިއްވުމުގެ ހުނަރުތައް ވެސް ދަރިވަރުންނަށް އުނގަންނައިދިނުމަށް ވަނީ ހަމަޖެހިފައެވެ.

އެ ކޯހުގެ 38 ދަރިވަރުން ބައިވެރިވާ މި ސެޝަންތަކުގައި މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔަރ ސްޓޭޝަންގެ ފަޔަރފައިޓަރުންނެވެ.