ދުނިޔޭގެ ޖަނަވާރުގެ ދުވަސް ފާހަގަކުރުމުގެ ޙަރަކާތްތައް ކާމިޔާބުކަމާއެކު ކުރިޔަށް ގެންގޮސްފި.

ބައިނަލްއަޤުވާމީ ޖަނަވާރުންގެ ދުވަހަކީ 04 އޮކްޓޯބަރ 2024 އެވެ. ދިވެހިރާއްޖޭގައި މި ދުވަސް ފާހަގަކުރުމުގެ ގޮތުން ޚާއްޞަ ފެއަރއެއް ވަނީ ބާއްވާފައެވެ. މި ދުވަހާ ގުޅުވައިގެން ކުރިއަށް ގެންދިޔަ ފެއަރގެ ޙަރަކާތްތައް ބާއްވާފައިވަނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ އިސްނެގުމުގެ ދަށުން، ދިވެހިރާއްޖޭގައި ޖަނަވާރުންގެ ދުޅަހެޔޮކަމަށް މަސައްކަތްކުރާ މަދަނީ ޖަމްޢިއްޔާތަކުގެ އެހީތެރިކަމާއެކުގައެވެ.

ދުނިޔޭގެ ޖަނަވާރުންގެ ދުވަސް ވުޖޫދުވެފައިވަނީ ކައިނޮލޮޖިސްޓް ހެއިންރިޗް ޒިމަރމަންގެ ފަރާތުންނެވެ. ދުނިޔޭގެ ޖަނަވާރުންގެ ދުވަސް އޭނާ ފުރަތަމަ ބޭއްވީ 24 މާރިޗު 1925 ގައި، ޖަރުމަނުވިލާތުގެ ބަރުލިންގައެވެ. މިއީ ދުނިޔޭގެ ޖަނަވާރުންގެ ދުވަސް ދިވެހިރާއްޖޭގައި ރަސްމީކޮށް ފާހަގަ ކުރާ ފުރަތަމަ ފަހަރެވެ. މި މުނާސަބަތާއި ގުޅިގެން މިނިސްޓްރީގެ ފަރާތުން ކުރިޔަށް ގެންދިޔަ ފެއާރ ހުޅުވުމުގެ ރަސްމިއްޔާތުގައި ދަނޑުވެރިކަމާއި ދިރޭތަކެއްޗާބެހޭ ވުޒާރާގެ ވަޒީރު ޑރ. ޢާއިޝަތު ރަމީލާ ވަނީ ބައިވެރިވެ ވަޑައިގެން ވަނީ ވާހަކަފުޅު ދައްކަވާފައެވެ.

ވަޒީރުގެ ވަހަކަ ފުޅުގައި މިއަހަރުގެ ޝިޢާރު ކަމުގައިވާ "ދުނިޔެއަކީ އެސޮރުމެންގެވެސް ހިޔާވައްސެވެ" އަށް އަލިއަޅުވާލެއްވިއެވެ. އަދި މި ދުވަސް ފާހަގަކުރުމުގެ އެންމެ މުހިއްމު މަޤުޞަދަކީ އިންސާނުންގެ ދިރިހުރުމަށާއި، ދިރިއުޅުމަށް އޮތް، ޖަނަވާރުންގެ އަގުނުކުރެވޭ ހިއްސާ ފާހަގަކޮށް، ޖަނަވާރުންގެ ޙައްޤުތަކާމެދު ޢާއްމުން ހޭލުންތެރިކޮށް، އަޚުލާޤީ މިންގަނޑުން ރަޙުމާއި، އިންސާނިއްޔަތުކަމާއެ

ކު އެތަކެއްޗާމެދު ޢަމަލުކުރުން ކުރިއެރުވުމާއި، އެތަކެތި ގެންގުޅުމުގެ ދުޅަހެޔޮކަމުގެ މިންގަނޑުތަކަށް ބާރުއެޅުން ޢާއްމުކުރުން ކަމުގައި ވިދާޅުވިއެވެ.

ވަޒީރުގެ ވާހަކަފުޅުގައި ވަކިން ޚާއްޞަކޮށް އަލިއަޅުވާލެއްވީ ޖަނަވާރުތަކުގެ ޙައްޤުތައް ރައްކާތެރިކުރުމުގެ މުހިންމުކަމާއި، އެސޮރުމެންނަށް އޯގާތެރިވުމުގެ ޒިންމާދާރު ސިފައަށެވެ. މިއީ އިންސާނުންނާއި ޖަނަވާރުންގެ ދެމެދުގައި އޮންނަންޖެހޭ ގުޅުމުގެ މުހިންމުކަން ހާމަކޮށްދޭ ވާހަކަ ފުޅެކެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން އިންތިޒާމުކޮށްގެން ބޭއްވި ދުނިޔޭގެ ޖަނަވާރުންގެ ދުވަހުގެ ޙަރަކާތްތަކުގެ މަޢުލޫމާތު، ޓެލެވިޜަން، ރޭޑިއޯ އަދި މީސްމީޑިއާގެ ޒަރީޢާއިން ޢާންމުކުރިއެވެ. މީގެއިތުރުން، ދިވެހިރާއްޖޭގައި ޖަނަވާރުންގެ ދުޅަހެޔޮކަމަށް މަސައްކަތްކުރާ މަދަނީ ޖަމްޢިއްޔާތަކާ ގުޅިގެން ބޭއްވި ފެއަރގައި، ޖަނަވާރުންނާ ގުޅުންހުރި އުފެއްދުންތައް ޢާންމުންނަށް ދެއްކުމާއި، ޖަނަވާރުންނަށް ޚާއްޞަ ކާނާ ވިއްކުމާއި، ހޭލުންތެރިކަން އިތުރުކުރުމަށް މަޢުލޫމާތު ފޯރުކޮށްދިނުމާއި، އަދި ޖަނަވާރުންގެ ސިއްޙީ ޚިދުމަތްތައް ޕްރޮމޯޓްކުރުން ފަދަ ޙަރަކާތްތައް ހިމެނުނެވެ. އަދި މި ފެއަރޒިޔާރަށްޒިޔާރަތް ކުރި ފަރާތްތަކުގެ މެދުގައި ކޫޕަން ފުރައިގެން އަގުހުރި އިނާމުތައް ލިބޭ ލަކީ ޑްރޯއެއްވެސް ކުރިއަށް ގެންގޮސްފައިވެއެވެ.

މިދުވަހާއި ގުޅުވައިގެން ޖަނަވާރުގެ ދުޅަހެޔޮކަމާ ބެހޭ

ފޯރަމެއް ބޭއްވުމަށް ވަނީ ހަމަޖެހިފައެވެ. މި ފޯރަމުގައި ޖަނަވާރުންގެ ޙައްޤުތަކާއި، އެ ތަކެތީގެ ދުޅަހެޔޮކަން ކަށަވަރުކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކުރެވޭނެއެވެ.

މީގެއިތުރުން، ދަނޑުވެރިކަމާއި ދިރޭތަކެއްޗާބެހޭ ވުޒާރާއާއި އުރީދޫ މޯލްޑިވްސްއާ ގުޅިގެން 'ފޮޓޯ ވިތް މައި ޕެޓް' ގެ ނަމުގައި ޚާއްޞަ ފޮޓޯ މުބާރާތެއްވެސް ވަނީ ޝޯޝިއަލް މީޑިއާރގައި ކުރިއަށް ގެންގޮސްފައެވެ. މި މުބާރާތުގައި ވަނަތައް ހޯއްދެވި ފަރާތްތަކަށާއި، ފެއަރގައި ބޭއްވި ލަކީ ޑްރޯގެ ވަނަތައް ހާސިލުކުރެއްވި ފަރާތްތަކަށް އިނާމު ދިނުމަށް ހަމަޖެހިފައިވަނީ 17 އޮކްޓޯބަރު 2024 ވާ ބުރާސްފަތި ދުވަހުއެވެ.