ދެކުނުގެ ސްކޫލުތަކުގެ ޕްރިންސިޕަލުންނަށް ލީޑަރޝިޕް ވޯކްޝޮޕެއް ކުރިއަށްގެންގޮސްފި

ދެކުނުގެ 4 އަތޮޅުގެ ޕްރިންސިޕަލުންނާއި ޑެޕިއުޓީ ޕްރިންސިޕަލުންނަށް ހާއްސަކޮށްގެން ލީޑަރޝިޕް ޓްރޭނިންގ ޕްރޮގްރާމެއް ކާމިޔާބުކަމާއެކު ކުރިއަށް ގެންގޮސްފިއެވެ.

މިއީ ސްކޫލުތައް ހިންގުމުގައި ބޭނުންކުރާ ޒަމާނީ އާ ގޮތްތަކާއި، އާ އީޖާދުތަކާ ގުޅޭ މަޢުލޫމާތު ޕްރިންސިޕަލުންނާ ހިއްސާކޮށް، އަހުލުވެރިކުރުވުމަށްޓަކައި ކުރިއަށްގެންދާ ތަމްރީނު ޕްރޮގްރާމެކެވެ.

މިނިސްޓްރީ އޮފް އެޑިޔުކޭޝަނާއި ނޭޝަނަލް އިންސްޓިޓިއުޓް އޮފް އެޑިޔުކޭޝަންގެ އިތުރުން ރާއްޖެއިން ބޭރުގެ ޔުނިވަރސިޓީތަކާ ގުޅިގެން ސިލްސިލާކޮށް ކުރިއަށްގެންދާ މި ތަމްރީނު ޕްރޮގްރާމްގެ މި ބުރު ކުރިއަށް ދިޔައީ ދިޔައީ އޮކްޓޫބަރު 12-13 އަށް އައްޑު ސިޓީގެ އައްޑޫ ހައި ސްކޫލުގައެވެ. އަދި މި ތަމްރީން ޕްރޮގްރާމްގެ ސެޝަންތައް ނަންގަވައިދެއްވީ މެލޭޝިއާގެ ސެގި ޔުނިވަރސިޓީއިންނެވެ.

މި ތަމްރީނު ޕްރޮގްރާމްގައި ގއ.ގދ. ސ. އަދި ޏ. އަތޮޅުގެ ސްކޫލުތަކުން 30 ބޭފުޅުން ބައިވެރިވެ ވަޑައިގެންނެވިއެވެ.