150،000 ޑޮލަރުގެ އަގުހުރި ޒައިދް ސަސްޓެއިނަބިލިޓީ ޕްރައިޒްއަށް ފ. އަތޮޅު ތައުލީމީ މަރުކަޒު ނޮމިނޭޓްވެއްޖެއެވެ.
މި އިނާމަކީ ޔޫއޭއީގެ ފައުންޑަރ ކަމަށްވާ ޒައިދު ބިން ސުލްތާން އަލް ނަހްޔާންގެ ހަނދާނުގައި ކޮންމެ އަހަރަކުވެސް ދެމެހެއްޓެނިވި ހަކަތައާއި، ފެނާއި، ކާބޯތަކެއްޗާއި، ސިއްހަތު އަދި ތައުލީމާ ގުޅޭ އީޖާދީ މަޝްރޫޢުތައް ފާހަގަކުރުމަށްޓަކައި ދެމުންގެންދާ އެވޯޑެކެވެ.
މީގެ ކުރިން ދިވެހިރާއްޖެއިން އައްޑޫ ހައި ސްކޫލް އަދި ހިރާ ސްކޫލުން މި އިނާމު ހާސިލުކޮށްފައިވެއެވެ. ފ. އޭއީސީގެ ޕްރިންސިޕަލް އަބްދުﷲ އަޙްމަދު ވިދާޅުވިގޮތުގައި އެ ސްކޫލުތަކުގެ ކާމިޔާބީ އަކީ މި އިނާމަށް ޕްރޮޖެކްޓެއް ހުށަހަޅަން ޝައުގުވެރިވި ސަބަބެއް ކަމަށެވެ. އެގޮތުން، ސްކޫލުގެ މެނޭޖްމަންޓާއި އޭލެވެލް އަށް ކިޔަވާ ދަރިވަރުން ހިމެނޭހެން މި ޕްރޮޖެކްޓްގެ ޕްރޮޕޯސަލް ތައްޔާރުކޮށް، ހުށަހެޅީ މި އަހަރުގެ ޖޫން މަހުގެ ތެރޭގައެވެ.
މި އިނާމަށް ފ. އޭއީސީ އިން ހުށަހަޅާފައިވަނީ އެ ސްކޫލުގައި ބޭނުންކުރާ ހަކަތަ، އެއްކޮށް އިއާދަކުރަނިވި ހަކަތައަށް ބަދަލުކުރުމަށެވެ. އެކަމަށްޓަކައި ސްކޫލުގައި ސޯލާ ޕެނަލް ހަރުކުރެވި، ކަރަންޓަށް މަހަކު ހޭދަ ކުރާ ފައިސާއިން ބޮޑު އަދަދެއް ސަލާމަތްކުރެވޭނެކަމަށް ޕްރިންސިޕަލް ވިދާޅުވިއެވެ.
https://www.youtube.com/watch?v=wf_VC2l1Mew
ފ. އޭއީސީ މި އިނާމަށް ނޮމިނޭޓްވެފައިވަނީ ގްލޯބަލް ހައި ސްކޫލް ކެޓަގަރީއިން ދެކުނު އޭޝިއާގެ ގައުމުތައް ހިމެނޭ ސަރަހައްދުގެ 18 ސްކޫލަކާ ވާދަކޮށްގެންނެވެ. މި ސަރަހައްދުން ދެން ނޮމިނޭޓްވެފައިވަނީ ޕާކިސްތާނުގެ ސްކޫލަކާއި ނޭޕާލްގެ ސްކޫލެކެވެ.
މިއަހަރު މި އިނާމަށް 156 ގައުމަކުން 5,980 ޕްރޮޖެކްޓް ހުށަހަޅާފައިވާއިރު، އޭގެ ތެރެއިން ފައިނަލިސްޓުންގެ ގޮތުގައި 33 ޕްރޮޖެކްޓް ވަނީ ހޮވާފައެވެ.
މި އިނާމު ލިބޭ ފަރާތްތައް ހޮވުން އޮންނާނީ ޖެނުއަރީ މަހުގެ 14 ގައި އަބޫ ދާބީގެ ސަސްޓެއިނަބިލިޓީ ހަފްތާ ފާހަގަކުރަން ބާއްވާ ރަސްމިއްޔާތެއްގައެވެ.މި ރަސްމިއްޔާތުގައި ބައިވެރިވުމަށް ސްކޫލުގެ ޕްރިންސިޕަލަށާއި ދެ ދަރިވަރަކަށް މިހާރުވަނީ ދައުވަތު ލިބިފައެވެ.