ޔޫރަޕް-އެފްރިކާ އިންވެސްޓްމަންޓް ފޯރަމްގައި ބެލްޖިއަމްގައި ހުންނަ ރާއްޖޭގެ އެމްބަސީ އިން ބައިވެރިވެއްޖެ

މި ހިނގާ އޮކްޓޫބަރު މަހުގެ 4 ގައި ބެލްޖިއަމްގެ ވެރިރަށް ބްރަސަލްސްގައި ކްރެޑެސަރނޯޑްސުޑް (އެންޖީއޯ) އިން އިންތިޒާމްކޮށްގެން ބޭއްވި ޔޫރަޕް-އެފްރިކާ އިންވެސްޓްމަންޓް ފޯރަމްގެ 14 ވަނަ އެޑިޝަންގައި ބެލްޖިއަމްގައި ހުންނަ ދިވެހިރާއްޖޭގެ އެމްބަސީ އިން ބައިވެރިވެފައިވެއެވެ.

މިއީ މި އެންޖީއޯއިން ކޮންމެ އަހަރަކު ކުރިއަށް ގެންދާ އިންވެސްޓްމަންޓް ފޯރަމެކެވެ. އަދި މި އަހަރުގެ ފޯރަމުގައި އޭޝިއާގެ ބައެއް ގައުމުތަކުން ބައިވެރިވެފައިވެއެވެ. މިގޮތުން ދިވެހިރާއްޖޭގެ އިތުރުން މިޔަންމާ އަދި ވިއެޓްނާމް އިން އެ ޤައުމުތަކުގައި ހުރި އިންވެސްޓްމަންޓް ފުރުޞަތުތައް މި ފޯރަމުގެ ބައިވެރިންނަށް ހުށަހަޅާދީފައިވެއެވެ. މި ފޯރަމްއަކީ ބެލްޖިއަމް/ޔޫރަޕިއަން -އެފްރިކާގެ ގައުމުތަކުގައި ހުރި އިންވެސްޓްމަންޓްތަކާ ގުޅޭގޮތުން ދޭދޭ ގައުމުތަކުގެ މެދުގައި މައުލޫމާތު ބަދަލުކޮށް އިޤްތިޞާދު ފުޅާކުރުމަށާއި ވިޔަފާރީގެ ފުރުޞަތުތަކާ ގުޅޭ މަޝްވަރާކުރެވޭނެ މާހައުލެކެވެ.

މި ފޯރަމްގައި ދިވެހިރާއްޖޭން ބެލްޖިއަމް އަދި ޔޫރަޕިއަން ޔޫނިއަން އަށް ކަނޑައަޅާފައިވާ ސަފީރު، ސަފީރު ޤީލާ އަލީ ވަނީ ދިވެހިރާއްޖޭގައި އިންވެސްޓްކުރުމަށް ހުރި ފުރުސަތުތަކާއި ދާއިރާތަކާއި ބެހޭ މައުލޫމާތު ދެއްވާފައިވެއެވެ. އަދި އިންވެސްޓް މޯލްޑިވްސްއިން ހިއްސާކުރައްވާފައިވާ ވީޑިއޯ ޕްރެސެންޓޭޝަންއެއް ވެސް ހުށައަޅުއްވާދެއްވިއެވެ. އަދި މިފޯރަމްގެ ބައިވެރިންނަށް ދިވެހިރާއްޖޭގައި އިންވެސްޓްކުރުމަށް ހުރި ފުރުޞަތުތަކާބެހޭ މައުލޫމާތު ކަރުދާހެއް ފޯރުކޮށްދެވުނެވެ.