ސަފީރު ޤީލާ ބެލްޖިއަމްގައި ހުންނަވާ ކޮމޮރޮސް ސަފީރު އާ ބައްދަލުކުރައްވައިފި

ދިވެހިރާއްޖެއިން ބެލްޖިއަމް އަށް ކަނޑައަޅުއްވާފައި ހުންނަވާ ސަފީރު އަލްފާޟިލާ ޤީލާ ޢަލީ، ކޮމޮރޮސް އިން ބެލްޖިއަމް އަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ މުހައްމަދު ޗަތުރު ބަދޫއީ އާ މިއަދު ބައްދަލުކުރައްވައިފިއެވެ.

މި ބައްދަލުވުމުގައި، އޯގަނައިޒޭޝަން އޮފް ދަ އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯ. އޭ. ސީ. ޕީ. އެސް.) ގެ ޤައުމުތަކުގެ މެދުގައި ގުޅުން އިތުރަށް ހަރުދަނާކުރެވޭނެ ގޮތްތަކާއި ގުޅޭގޮތުން ދެ ސަފީރުންވެސް ވާހަކަފުޅު ދެއްކެވިއެވެ. އަދި ވަކިން ހާއްސަކޮށް، އޯ. އޭ. ސީ. ޕީ. އެސް. ޤައުމުތަކާއި ޔޫރަޕިއަން ޔޫނިއަން އާ ދެމެދު ވިޔަފާރީގެ ގުޅުން އިތުރަށް ފުޅާކުރެވޭނޭ ގޮތްތަކާއިމެދު ދެ ސަފީރުންވެސް މަޝްވަރާކުރެއްވިއެވެ.

މި ބައްދަލުވުމުގައި ސަފީރު ޤީލާގެ އަރިހުގައި ފަސްޓް ސެކްރެޓަރީ މުހައްމަދު ޝައްފާއު އިބްރާހިމް ބައިވެރިވެވަޑައިގަތެވެ.