އޭ.އާރް.އެފް.އެފް.ޑަބްލިޔު.ޖީ. ގެ ޑިރެކްޓަރ މިސްޓަރ ޔާން ހައުޒިންގ އާ ސަފީރު ޢާއިޝަތު ޝާން ޝާކިރު ބައްދަލުކުރައްވައިފި

އޭވިއޭޝަން ދާއިރާގައި އަލިފާނުގެ ހާދިސާތައް މަދުކުރުމާއި ރައްކާތެރިކަމުގެ ފިޔަވަޅުތައް ރާވާ ހިންގުމުގައި ދޭދޭ ޤައުމުތަކުގެ ކަމާބެހޭ އިދާރާތަކާއެކު މަސައްކަތްކުރާ މަދަނީ ޖަމްއިއްޔާއެއް ކަމުގައިވާ އެއަރކްރާފްޓް ރެސްކިއު އެންޑް ފަޔަރ ފައިޓިންގ ވަރކިންގ ގްރޫޕް (އޭ.އާރް.އެފް.އެފް.ޑަބްލިޔު.ޖީ.) ގެ ސެކްޝަން 11 ގެ ޑިރެކްޓަރ މިސްޓަރ ޔާން ހައުޒިންގ އާ ދިވެހިރާއްޖެއިން ޖަރުމަނުވިލާތަށް ކަނޑައަޅުއްވާފައި ހުންނަވާ ސަފީރު އަލްފާޟިލާ ޢާއިޝަތު ޝާން ޝާކިރު ބައްދަލުކުރައްވައިފިއެވެ.

މި ބައްދަލުވުމުގައި، ނެދަރލޭންޑްސް ގައި ޤާއިމުވެފައިވާ މި ޖަމްއިއްޔާގެ ތަޖުރިބާގެ އަލީގައި، އަދި މި ދާއިރާގައި މިސްޓަރ ޔާންގެ ފަންނީ ތަޖުރިބާގެ އަލީގައި ދިވެހިރާއްޖޭގެ ކަމާބެހޭ އިދާރާތަކުގެ އިންސާނީ ވަސީލަތްތައް އިތުރަށް ހަރުދަނާކުރުމުގައި ގުޅިގެން ކުރެވިދާނެ މަސައްކަތްތަކާ ގުޅޭގޮތުން ސަފީރު ޝާން އާއި މިސްޓަރ ޔާން މަޝްވަރާކުރެއްވިއެވެ.

ސަފީރުގެ އަރިހުގައި ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީގެ ކައުންސެލަރ އުމައިރާ މުޙައްމަދު އާއި ސެކަންޑް ސެކްރެޓަރީ ސައިފުﷲ ވަލީދު މި ބައްދަލުވުމުގައި ބައިވެރިވެވަޑައިގަތެވެ.