ތުންގަނޑު ހިބަރު

ސައިންޓިފިކް ނަން: Xiphias gladius

އިނގިރޭސި ނަން: ސްވޯޑް ފިޝް

ދިވެހި ނަން: ތުންގަނޑު ހިބަރު / ކަންނެލި ހިބަރު

އިންޑިއާ ކަނޑުގެ ސްޓޮކްގެ ހާލަތު: އާބާދީ މުސްތަޤުބަލަށް ދެމެހެއްޓޭނެ މިންވަރަށްވުރެ ދަށްނުވޭ، އިންޑިއާ ކަނޑުން މަސްވެރިކަން ކުރެވެމުންދަނީ އާބާދީއަށް ގެއްލުން ނުވާނޭ މިންވަރަށް

މާޙައުލު އަދި އާބާދީ ބެހިފައިވާ ގޮތް:

ތުންގަނޑު ހިބަރަކީ ދުނިޔޭގެ މައިގަނޑު ތިން ކަނޑު ކަމުގައިވާ އެޓްލާންޓިކް ކަނޑާއި، ޕެސިފިކް ކަނޑު އަދި އިންޑިއާ ކަނޑުގެ ދުނިޔޭގެ ދެބައިހަމަ (އީކުއޭޓަރ) ސަރަޙައްދުގެ ހޫނު (ޓްރޮޕިކަލް) ކަނޑުތަކުގައްޔާއި މެދު މިންވަރަކަށް ހޫނު (ސަބް-ޓްރޮޕިކަލް) ސަރަޙައްދުތަކުގައި އުޅޭ މަހެކެވެ. އަދި މަދު ހާލަތްތަކުގައި ފިނި (ޓެމްޕަރޭޓް) ކަނޑުތަކުގައި ވެސް ތުންގަނޑު ހިބަރު އުޅެއެވެ. ތުންގަނޑު ހިބަރަށް އާންމުގޮތެއްގައި ކަމުދަނީ ލޮނުގަނޑުގެ ފިނިހޫނުމިން 18 ޑިގްރީ އާއި 22 ޑިގްރީ ސެލްސިއަސް އާ ދެމެދު ހުންނަ ސަރަޙައްދުތަކެވެ. އެހެންނަމަވެސް ތުންގަނޑު ހިބަރަކީ، ހިބަރު އާއިލާގެ މަސްތަކުގެ ތެރެއިން އެންމެ ތަފާތު ފިނިހޫނުމިނުގައި އުޅުމުގެ ޤާބިލުކަން ލިބިފައިވާ މަހެވެ. މިގޮތުން ފިނިވެގެން 5 ޑިގްރީ އާއި ހޫނުވެގެން 27 ޑިގްރީ ސެލްސިއަސް ގެ ފިނިހޫނުމިނުގައިވެސް މި ބާވަތުގެ މަސް އުޅެއެވެ. ތުންގަނޑު ހިބަރު އާންމުކޮށް ފެންނަނީ ކަނޑުގެ ސަޠަޙައިން ފެށިގެން 550 މީޓަރުގެ ފުންމިނާ ދެމެދުގައި ނަމަވެސް، 2878 މީޓަރު ފުނަށްވެސް މިބާވަތުގެ މަސް ފީނާ ކަމަށް ރިކޯޑުކުރެވިފައިވެއެވެ (ސެޕުލްވެޑާ އެޓް އަލް.، 2010).

ކާނާ އާއި ކެއުމުގެ ވައްޓަފާޅި:

ތުންގަނޑު ހިބަރުގެ ކާނާގެ ގޮތުގައި މާކަނޑުގައި އުޅޭ ގިނަ ބާވަތްތަކެއް ހިމެނެއެވެ. މީގެ ތެރޭގައި ކަރަވެރިމަހާއި ގުންބަޅަ ފަދަ ބާވަތްތައް އަދި ތަންކޮޅެއް ފުނުގައި އުޅޭ ބަރަކޫޑިނާ އަދި ލެންޓަރންފިޝް އާއިލާގެ ބާވަތްތަކާއި ކަނޑުގެ ބިންގަނޑާ ކައިރީގައި އުޅޭ ބާވަތްތައް (ޑެމަރސަލް) އަދި ބޯވަދިލަމަހާއި ކަކުނި ފާޑުގެ ސޫފި ހިމެނެއެވެ.

ބޮޑުވާ މިންވަރާއި ފުރާވަރަށްއަރާ އުމުރު:

ތުންގަނޑު ހިބަރު އާންމުގޮތެއްގައި 4 ފޫޓު 6 އިންޗިއަށް ބޮޑުވާކަމަށް ވެއެވެ. މިބާވަތުގެ އެންމެ ބޮޑުމަހަކަށް ރިކޯޑުކުރެވިފައިވަނީ ދިގުމިނުގައި (ފޯރކް ލެންތު - ތުންގަނޑުން ފެށިގެން ނިގޫ ދެކަފިވާ ހިސާބަށް) 5 ފޫޓު 9 އިންޗި ހުރި މަހެކެވެ. އެންމެ ބަރު މަހަކަށް ރެކޯޑުކުރެވިފައިވަނީ 650 ކިލޯގެ މަހެކެވެ. ތުންގަނޑު ހިބަރު ފުރާވަރަށް އަރާކަމަށް ވަނީ 5 ފޫޓާއި 8 ފޫޓާ ދެމެދުގެ ދިގުމިނަކަށް ބޮޑުވުމުންނެވެ. ދަރިމައިވާ އުމުރުގައި ހުންނަ ދިގުމިން ކަމަށް އެންމެ އާންމުކޮށް ރިކޯޑުކުރެވިފައިވަނީ 7 ފޫޓެވެ.