އުމްރާ ދަތުރުގައި، ދަތުރުގެ އިސްވެރިއަކާއި ދީނީ މުރުޝިދަކާއި ސިއްޙީ އެހީތެރިއެއް ހުންނަން ޖެހޭނެ!
އުމްރާއަަށް މީހުން ގެންދިއުމާއި ގުޅޭ ގޮތުން މިއަދު އިސްލާމީ ކަންތައްތަކާ ބެހޭ ވުޒާރާއިން އާއްމުކުރި އާ އުސޫލަކީ، ރާއްޖެއިން އުމްރާއަށް މީހުން ގެންދިއުމާއި ގުޅޭ ކަންކަން އިތުރަށް ހަރުދަނާ ކުރުމަށް މުހިއްމު ފިޔަވަޅުތަކެއް އެޅިގެންދާނެ އުސޫލެކެވެ. އެގޮތުން އުމްރާއަށް މީހުން ގެންދާ ކުންފުނިތަކުން ޢަމަލު ކުރަން ޖެހޭނެ މުހިއްމު އެތައް ކަމެއް މި އުސޫލުގައި ވަނީ ފާހަގަކޮށްފައެވެ.
އެގޮތުން ކުންފުނިތަކުން ކުރާ ޢުމްރާ ދަތުރުތަކުގައި ދަތުރުގެ އިސްވެރިއެއްގެ ގޮތުގައި ހާއްސަ މީހަކާއި، ދީނީ މަޢުލޫމާތުތައް ފޯރުކޮށްދިނުމަށް ދީނީ މުރުޝިދަކާއި ސިއްޙީ ޙިދުމަތްތައް ފޯރުކޮށްދިނުމަށް 1 ނަރުސް ނުވަތަ 1 ޑޮކްޓަރު ހުންނަން ޖެހޭނެކަމަށް މި އުސޫލުގައި ވަނީ ބަޔާންކޮށްފައެވެ. އެގޮތުން މި ފަރާތްތަކަކީ އެއްވަގުތެއްގައި އެހެން ކުންފުންޏެއްގެ އެހީތެރިއެއްގެ ޒިންމާ އޮތް ފަރާތެއްކަމުގައި ވެގެން ނުވާނެކަމަށާއި ދަތުރުގައި ބައިވެރިވާ ސިއްޙީ އެހީތެރިޔާއާއި ދީނީ މުރުޝިދާއެކު ކުންފުނިން އެއްބަސްވުމެއް އެކުލަވާލާފައި އޮންނަން ޖެހޭނެކަމަށްވެސް އުސޫލުގައި ބަޔާންކޮށްފައިވެއެވެ.
މިކަންކަމަކީ ރާއްޖެއިން މީހުން އުމްރާއަށް ގެންދިއުން މިހާރަށްވުރެ ހަރުދަނާ ކުރުމަށް އުސޫލުގައި ހިމަނާފައިވާ މުހިއްމު ކަންކަމެވެ.
މީގެ އިތުރުން މި އުސޫލުގެ ދަށުން ރާއްޖެއިން އުމްރާއަށް މީހުން ގެންދާ ކުންފުނިތަކުން އުސޫލާއި ޚިލާފުވެއްޖެނަމަ ބޮޑެތި ޢަދަދުތަކުން ޖޫރިމަނާ ކުރެވޭ ގޮތަށްވެސް ވަނީ ހިމަނާފައެވެ.