މި މިނިސްޓްރީގެ ވަފުދެއް ތިނަދޫ ސިޓީއަށް ފޮނުއްވައިފި

މި މިނިސްޓްރީގެ ޚާއްޞަ ވަފުދެއް ތިނަދޫ ސިޓީއަށް ފޮނުއްވައިފިއެވެ. ވަޒީރު އާދަމް ޝަރީފު ޢުމަރު، ތިނަދޫ ސިޓީއަށް ޚާއްޞަ ވަފުދެއް ފޮނުއްވީ މި މިނިސްޓްރީގެ ތިނަދޫ ސިޓީ ޕަބްލިކް ވާރކްސް ޔުނިޓުގެ ކަންތައްތައް ހިނގަމުންދާ ގޮތް ބައްލަވައިލެއްވުމަށެވެ.

މި ވަފުދުގެ މެންބަރުން މިއަދު ވަނީ ތިނަދޫ ސިޓީ ޕަބްލިކް ވާރކްސް ޔުނިޓްގެ މުވައްޒަފުންނާ ބައްދަލުކުރައްވައިފައެވެ. މި ބައްދަލުވުމުގައި އެ ޔުނިޓުގެ މަސައްކަތްތައް ކުރިއަށް ގެންދިޔުމުގައި ދިމާވާ ދަތިތަކާ، އެ ދަތިތައް ޙައްލުކުރުމާ ބެހޭ ގޮތުން މަޝްވަރާކުރައްވައިފައި ވެއެވެ.

ތިނަދޫއަށް ފޮނުއްވި މި ވުޒާރާގެ ވަފުދުގައި ލޯކަލްގަވަރމަންޓް ޔުނިޓް ހިންގެވުމާއި ޙަވާލުވެ ހުންނެވި ސްޓޭޓް މިނިސްޓަރ މުޙައްމަދު މާހިރާއި، ތިނަދޫ ސިޓީ ހިމެނޭ ކުލަސްޓަރ ހިންގެވުމާއި ޙަވާލުވެ ހުންނެވި ސްޓޭޓް މިނިސްޓަރ ޠާހާ ނަޢީމާއި، އަތޮޅުތެރޭގެ ޕަބްލިކް ވާރކްސްގެ ކަންކަން ބެލެހެއްޓެވުމާއި ޙަވާލުވެ ހުންނެވި ޑެޕިއުޓީ މިނިސްޓަރ ފަޔާޒުގެ އިތުރުން މި މިނިސްޓްރީގެ ބައެއް ވެރިން ހިމެނިލައްވައެވެ.