ބ. އަތޮޅު ކައުންސިލުގެ އިއާދަކުރަނިވި ހަކަތައިގެ މަޝްރޫޢު އިފްތިތާޙްވެގެން ދިޔުމަކީ ކައުންސިލުގެ ތަޞައްވަރާ އެއްގޮތަށް ކައުންސިލުގެ މަސައްކަތްތައް ކުރިއަށް ގެންދެވޭކަން ހާމަވެގެންދާ ކަމެއް: ވަޒީރު އާދަމް ޝަރީފު ޢުމަރު

ބ އަތޮޅު ކައުންސިލުގެ އިއާދަކުރަނިވި ހަކަތައިގެ މަޝްރޫޢު އިފްތިތާޙްވެގެން ދިޔުމަކީ ބ. އަތޮޅު ކައުންސިލުން އެކުލަވައިލެއްވި ތަޞައްވަރާ އެއްގޮތަށް ކައުންސިލުގެ މަސައްކަތްތައް ކުރިއަށް ގެންދެވޭކަން އަތޮޅުގެ ރައްޔިތުންނަށް ވަރަށް ރަނގަޅަށް ހާމަވެގެންދާ ކަމެއް ކަމަށް ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ބ އަތޮޅު ކައުންސިލުގެ އިއާދަކުރަނިވި ހަކަތައިގެ މަޝްރޫޢު އިފްތިތާޙްކުރުމަށް މިއަދު ހެނދުނު ބ. ކުޑަރިކުލުގައި ބޭއްވި ޚާއްޞަ ރަސްމިއްޔާތުގައި ވާހަކަފުޅުދައްކަވަމުންނެވެ.

ކުޑަރިކިލުގައި ބޭއްވި ރަސްމިއްޔާތުގައި ވަޒީރު އާދަމް ޝަރީފް ޢުމަރު ދެއްކެވި ވާހަކަފުޅުގައި އިފްތިތާޙްކުރެވުނު ހަކަތައިގެ މަޝްރޫޢަކީ، ވަރަށް މުހިންމު، އެހާމެ ބިޔަ މަޝްރޫޢެއް ކަމަށް ވިދާޅުވިއެވެ. ޚާއްޞަކޮށް މުޅި އަތޮޅަށް ނިސްބަތްވާ ގޮތަށް މި ފަދަ މަޝްރޫޢެއް ރަނގަޅު ވިސްނުންތެރިކަމަކާއެކު ރަނގަޅު ތަޞައްވަރެއް އޮވެގެން ފައްޓާ، ކުރިއަށް ގެންދަވައި ކަމަށް ޓަކައި، އަތޮޅު ކައުންސިލުގެ ރައީސަށާއި، އަތޮޅުގެ ހުރިހައި ރަށްރަށުގެ ރައީސުންނަށާއި، ކައުންސިލުތަކުގެ މެންބަރުންނަށާއި، ރަށްރަށުގެ ރައްޔިތުންނަށް އެ މަނިކުފާނު ޝުކުރުދެންނެވިއެވެ.

"މި ކަންކަމުން އަޅުގަނޑުމެންނަށް އެބަ އެނގެންޖެހޭ ޙަޤީޤީ މާނާގައި، އަޅުގަނޑުމެން ރަށްރަށުގައި، މި ދިރިއުޅެމުން މި ދާއިރު ތިމާވެށްޓަށް އަޅުގަނޑުމެން ދޭންޖެހޭ ސަމާލުކަން ދޭންޖެހޭ ގޮތާ، ޢަމަލުތައް ބަހައްޓަންޖެހޭ ގޮތާ، އަދިހަމައެއާއެކީގާ މި ކަންކަމުގެ ތެރޭން އަޅުގަނޑުމެންގެ ވިސްނުމާ ފިކުރަށް އަންނަން ޖެހޭ ބަދަލުތަކަށް ހެޔޮ ބަދަލުތަކެއް ގެންނަން" ވަޒީރު ވިދާޅުވިއެވެ.

ކުޑަރިކިލުގައި މިއަދު ހެނދުނު ބޭއްވި ޚާއްޞަ ރަސްމިއްޔާތެއްގައި، ބ. އަތޮޅު ކައުންސިލުގެ އިއާދަކުރަނިވި ހަކަތައިގެ މަޝްރޫޢު އިފްތިތާޙްކޮށްދެއްވީ ތިމާވެށްޓާއި، ހަކަތައާ ބެހޭ ވަޒީރު ޠާރިޤް އިބްރާހީމެވެ. މި ރަސްމިއްޔާތުގައި ބ. އަތޮޅު ކައުންސިލުގެ ރައީސާއި، ބ. އަތޮޅު ރަށްރަށުގެ ކައުންސިލުތަކުގެ ރައީސުންނާއި، ކައުންސިލުތަކުގެ މެންބަރުންނާއި، ކުޑަރިކިލުގެ ގިނަ ޢަދަދެއްގެ ރައްޔިތުން ބައިވެރިވެލެއްވިއެވެ.