ދިރޭކުދިމަހުގެ މަސްވެރިކަމުގައި ޙަރަކާތްތެރިވާ ފަރާތްތަކާއި، އެފަރާތްތަކުގެ އިޖުތިމާޢީ އަދި އިޤުތިޞާދީ ހާލަތް

ދިރޭކުދިމަހުގެ މަސްވެރިކަން ފަށައިގަތްއިރު އެކަމުގައި ޙަރަކާތްތެރިވި މަސައްކަތްތެރިންގެ ތެރެއިން، ޚާއްޞަކޮށް ފީނާ މީހުން (ޑައިވަރުން) ގެ ބޮޑު ބަޔަކީ ސްރީލަންކާގެ ރައްޔިތުން ނަމަވެސް، ކުރީގެ މަސްވެރިކަމުގެ އާންމު ގަވާއިދުގެ 15 ވަނަ މާއްދާގެ ދަށުން މި މަސްވެރިކަމުގައި ހަރަކާތްތެރި ވެވޭނީ ހަމައެކަނި ދިވެހިންނަށް ކަމަށް 1997 ގައި ވަނީ ކަނޑައަޅައިފައެވެ.

ދިރޭކުދިމަހުގެ މަސްވެރިކަން ފުޅާވަމުންދިޔަ ނަމަވެސް، މި މަސްވެރިކަމުގައި ހަރާކްތެރިވާ މީހުންގެ އަދަދު 100 އަށްވުރެ މަދެވެ. އަދި މި މަސްވެރިކަން ކުރަމުންދަނީ މާލެ އަތޮޅުގެ އިތުރުން 8 އަތޮޅެއްގައިކަން މިނިސްޓްރީގެ ފަރާތުން 2017 ވަނަ އަހަރާއި 2018 ވަނަ އަހަރު ކުރިއަށް ގެންދެވުނު ސާރވޭތަކުން ދައްކައިފައިވެއެވެ. މި މަސްވެރިކަމުގައި ހަރަކާތްތެރިވާ ފީނާ މީހުންނަށް (ޑައިވަރުންނަށް) އެވަރެޖުކޮށް އާމްދަނީގެ ގޮތުގައި މަހަކު 1,000 އެމެރިކާ ޑޮލަރު ލިބޭކަމަށް އަންދާޒާކުރެވެއެވެ.

މިއީ އާމްދަނީގެ ގޮތުގައި ލިބޭކަމަށް މީގެ ކުރިން ރިޕޯޓުކޮށްފައިވާ އަދަދާ އަޅާބަލާއިރު (325 އެމެރިކާ ޑޮލަރާއި 650 އެމެރިކާ ޑޮލަރާ ދެމެދު) ބޮޑު ކުރިއެރުމެކެވެ (ވުޑް އެޓް އަލް.، 2014).