މ. ކޮޅުފުށި ހައުސިން ޔުނިޓްގެ މަޝްރޫއުގެ 78 އިންސަތަ މަސައްކަތް ނިމިއްޖެ

މ. ކޮޅުފުށީގައި ސަރުކާރުން ކުރިއަށްގެންދާ 100 ހައުސިން ޔުނިޓުގެ މަޝްރޫއުގެ 78 އިންސައްތަ މަސައްކަތް ނިމިއްޖެއެވެ.

އެ މަޝްރޫއަކީ މިދިޔަ އަހަރުގެ ފެބްރުއަރީ މަހުގެ ތެރޭގައި ރަޝީދު ކާޕެންޓްރީ އެންޑް ކޮންސްޓްރަކްޝަންއާ ހަވާލުކުރި މަޝްރޫއެކެވެ.

ކޮޅުފުށީގައި 100 ހައުސިން ޔުނިޓު އަޅަން ރަޝީދު ކާޕެންޓްރީ އެންޑް ކޮންސްޓްރަކްޝަންއާ ހަވާލުކޮށްފައިވަނީ 117.8 މިލިއަން ރުފިޔާގެ އަގަކަށެވެ.

އެ މަސައްކަތް ނިންމަން މިހާރު އަމާޒުހިފައިފައިވަނީ އަންނަ ނޮވެމްބަރު މަހުގެ 24 ވަނަ ދުވަހަށެވެ.

އެގޮތުން މިހާރު އެ މަޝްރޫއުގެ ދަށުން އިމާރާތްކުރާ 100 ހައުސިންޔުނިޓުގެ މަސައްކަތުގެ ތެރެއިން ހުރިހާ ހައުސިންގ ޔުނިޓެއްގެ ރާނާ ސިމެންތިޖަހައި ހިޔާކުރުމުގެ މަސައްކަތްތައް ނިމިފައިވާއިރު، ސީލިންގު ކުރުމުގެ 69 އިންސައްތަ މަސައްކަތް މިހާތަނަށް ވަނީ ނިންމައިފައެވެ. އަދި ޕުޓީ ލުމާއި ކުލަލުމުގެ 47 އިންސައްތަ، ދޮރު ހަރުކުރުމުގެ 50 އިންސައްތަ މަސައްކަތް ވަނީ ނިންމައިފައެވެ. އެ ހައުސިން ޔުނިޓުތަކުގެ ކަރަންޓު ވައިރިންކުރުމުގެ 70 އިންސައްތަ ނިމިފައިވާއިރު ފެންވައިރު ކުރުމުގެ 90 އިންސައްތަ މަސައްކަތް ވަނީ ނިންމައިފައެވެ.

އެ މަޝްރޫއުގެ ދަށުން އިމާރާތްކުރާނީ 100 ރޯހައުސްއެވެ. އެއިން ކޮންމެ ރޯހައުސްއެއްގައި ތިން ކޮޓަރި، ތިން ފާހަނަ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯރޫމް ހުންނާނެއެވެ.

އެ މަސައްކަތް މިހާރު ނިންމަން އަމާޒުހިފައިފައިވަނީ އަންނަ ނޮވެމްބަރު މަހުގެ 24 ވަނަ ދުވަހަށެވެ.