މިއީ އާއިދާގެ ވާހަކަ: 38 އަހަރުވީ ކައިވެނި ރޫޅުމަށްފަހު ކުރިމަތިވި ހިތާމައިން އަރައިގަތުމުގައި އެންމެ ގާތް އެކުވެރިއަކަށްވީ ކީރިތި ޤުރުއާން. ދިރިއުޅުން ބަދަލުވެގެން ދިޔައީ އިސްރަށްވެހިންގެ ނާދީގެ މާހައުލުން ލިބުނު އުފާވެރިކަމާއެކު!

އާއިދާއަކީ އޭނާގެ ވަރަށް ޅަ އުމުރުގައި (15އ) ގައި ކައިވެނިކޮށް އެ ކައިވެނި މަތީގައި 38 އަހަރު އުޅުމަށްފަހު ކައިވެނި ރޫޅި އަލުން ދިރިއުޅުން ކޮޅަށް ޖެހުމުގައި މަސައްކަތް ކުރަމުން އަންނަ 4 ކުދިންގެ މަންމައެކެވެ. ދިރިއުޅުމަށް ކުރަމުން އައި މައިގަނޑު މަސައްކަތަކީ ފެހުމެވެ. އަދި ޤުރުއާން ކިޔަވައިދިނުމާއި ކުދިން ނަމާދަށް އެރުވުމުގެ މަސައްކަތް ވެސް މިހާރު އޭނާ ކުރެއެވެ.

ގެވެށި އަނިޔާގެ ޝިކާރައަކަށްވެ، އެ އަނިޔާތައް ވެސް ތަހައްމަލުކޮށްފައިވާ އާއިދާގެ ހަޔާތަށް އެންމެ ފުން ހިތާމައެއް ކުރިމަތިވެގެންދިޔައީ 38 އަހަރުގެ ކައިވެނި ރޫޅި، ފިރިމީހާގެ ލޯތްބާއި އަޅާލުން އެންމެ ބޭނުންވި ދުވަހު، އެކަނިވެރިކަމާއި ކުރިމަތިލާން ޖެހުމުންނެވެ. އެ ހިތްދަތިކަމުގައި، އެކި ބަލިތަކުގެ ޝިކާރައަކަށް ވެ، ހިނގާބިނގާވެ އުޅުމަށް ދަތިވާ ހިސާބަށް އޭނާގެ ބަލި ބޮޑުވިއެވެ.

އާއިދާ ކިޔައިދިން ގޮތުގައި އާ ހިތްވަރެއްލާފައި ދިރިއުޅުމުގައި ކުރިއަށް ދިއުމަށް އޭނާ އަޒުމް ކަނޑައެޅީ، އޭނާގެ ދަރިންގެ ފަރާތުން ލިބުނު ހިތްވަރާއި އެކުގައެވެ. އޭނާގެ ދެ އަންހެން ދަރިން އޭނާ ސިފަކުރަނީ "ބެސްޓް ފްރެންޑްސް" ގެ ގޮތުގައެވެ. އަދި އޭނާގެ ހުރިހާ ކުދިންނަކީ ވެސް އަޚްލާގު ރަނގަޅު މައިމީހާއަށް ހެޔޮކޮށް ހިތާ އަޅާލާ ކުދިންކަމަށްވުމުން އެ ކުދިންގެ އެހީތެރިކަމުގައި ކުރިއަށް ދިއުމަށް އާއިދާ އަޒުމް ކަނޑައެޅިއެވެ.

އެހިސާބުން މަޑުމަޑުން ގޭތެރޭގެ އެކަނިވެރި މާހައުލުން ބޭރަށް ނިކުމެ، މީހުންގެ ތެރޭގައި އުޅުމަށް އޭނާ މަސައްކަތް ފެށިއެވެ. އެގޮތުން ވަރަށް ގިނަ ވަގުތު ބީޗުގައި ހޭދަކުރަމުން ގެންދިޔަކަމަށާއި، އިސްރަށްވެހިންގެ ނާދީ ރައްޓައްސަކު ތަޢާރަފްކޮށްދިނީ ވެސް މިގޮތަށް ބީޗަށް ގޮސް އުޅުމުގެ ތެރޭގައިކަމަށް އާއިދާ ކިޔައިދިނެވެ.

އާއިދާ ކިޔައިދިން ގޮތުގައި އިސްރަށްވެހިންގެ ނާދީއަށް ޒިޔާރަތްކުރި ފުރަތަމަ ދުވަހު ވެސް އެތަނުގެ މާހައުލުގެ އުފާވެރިކަން އޭނާއަށް އިހުސާސްކުރެވުނެވެ. އޭނާ އާއި ދޭތެރޭގައި ހުރިހާ އެންމެން ބެހެއްޓި ގާތްކަމާއެކު އެތަނުގެ ހަރަކާތްތަކުގައި މަޑުމަޑުން ބައިވެރިވާން ފެށުނުކަމާއި، އޭނާ އެންމެ ކުރާހިތްވާ އަތްތެރި މަސައްކަތް ދަސްކޮށްދޭ ކްލާހުގައި ބައިވެރިވެގެން މިހާރު އަމިއްލައަށް ހެދުން ވިޔެ ތައްޔާރުކޮށްލެވޭކަން އޭނާ ފާހަގަކުރިއެވެ.

ދިރިއުޅުމުގައި ދިމާވާ ހިތާމަވެރި ހާދިސާއަކީ ދިރިއުޅުން ހުއްޓާލާ، އެ ހިތާމައިގައި އަބަދު އިންނަންވީ ކަމެއް ނޫންކަމަށް ކިޔައިދެމުން އާއިދާ ބުނީ އޭނާ އަކީ ހިތާމަތަކުން އަރައިގަނެ އަމިއްލަ ދިރިއުޅުން އަމިއްލަ މަސައްކަތުން ކޮޅަށް ޖެހޭނެކަމުގެ ދިރިހުރި މިސާލެއްކަމަށެވެ. އަދި އަންހެނަކަށް އެންމެ މުހިންމީ އަމިއްލަ ފައިމައްޗަށް ކޮޅަށް ތެދުވުންކަން ވެސް އޭނާ ފާހަގަކުރިއެވެ.

އޭނާގެ ހަޔާތަށް އައި ކަޅު ދުވަސްތައް އުފާވެރި ދުވަސްތަކަށް ބަދަލުކޮށްލުމުގައި ނާދީގެ މާހައުލުން، ގާތް އެކުވެރިންގެ ފަރާތުން ލިބުނު ލޯތްބާއި އަޅާލުމަށް ޝުކުރުއަދާކުރާ ހާލު އޭނާ ވަނީ އެތަނުގެ ބޭނުން ހިފުމަށް އޭނާ ފަދަ އެހެން މީހުންގެ ކިބައިން އެދޭކަމަށް ބުނެފައެވެ. އަދި ކީރިތި ޤުރުއާން ކިޔެވުމާއި، ދީނީ ކަންކަމަށް ސަމާލުކަން ދީގެން، އުންމީދު ކަނޑާނުލާ ކުރިއަށް ދިއުމަކީ ކާމިޔާބީގެ އެންމެ ފަހި ރާސްތައް ކަމަށް އާއިދާ ކިޔައިދިނެވެ.