ރާއްޖެއިން ބަންގަލްދޭޝްއަށް ކަނޑައަޅުއްވާފައިވާ ސަފީރު ބަންގްލަދޭޝްގެ އެޑިއުކޭޝަން މިނިސްޓްރީގެ އެޑްވައިޒަރާއި ބައްދަލުކުރައްވައިފި

ދިވެހިރާއްޖެއިން ބަންގްލަދޭޝްއަށް ކަނޑައަޅުއްވާފައި ހުންނަވާ ސަފީރު އަލްފާޟިލާ ޝިއުނީން ރަޝީދު، އެގައުމުގެ އެޑިއުކޭޝަން މިނިސްޓްރީގެ އެޑްވައިޒަރ ވަހީދުއްދީން މަހްމޫދްއާއި ބައްދަލުކުރައްވައިފިއެވެ.

މިބައްދަލުވުމުގައި ސަފީރު ޝިއުނީން ވަނީ ތަޢުލީމީ ދާއިރާއިން ދެގައުމުގެ ދެމެދުގައިއޮތް ހަރުދަނާ ގުޅުންތަކަށް އަލިއަޅުވާލައްވައި، ބަންގްލަދޭޝްއިން ދިވެހިރާއްޖެއަށް ފޯރުކޮށްދެމުންދާ މަތީ ތައުލީމުގެ ފުރުސަތުތަކަށް ޝުކުރުއަދާކޮށްފައެވެ. ވަކިން ހާއްސަކޮށް ސިއްޙީ ދާއިރާއިން މަތީ ތަޢުލީމް ޙާސިލްކުރުމުގެ ސްކޮލަރޝިޕްތަކާއި ދިވެހި ދަރިވަރުންނަށް މެޑިކަލް އިންޓާންޝިޕް ހެދުމުގެ ފުރުޞަތުތައް ފަހިކޮށްދިނުމުގައި ބަންގްލަދޭޝްގެ ސަރުކާރުން ދެއްވަމުން ގެންދަވާ އެހީތެރިކަމާއި އެއްބާރުލެއްވުމަށްވެސް ސަފީރު ވަނީ ޝުކުރު އަދާކޮށްފައެވެ.

މީގެއިތުރުން، ތަޢުލީމީ ދާއިރާއިން މިހާރަށްވުރެ އިތުރަށް ދެގައުމު ގުޅިގެން ކުރެވެން ހުރި މަސައްކަތްތަކާއި ބެހޭގޮތުން ދެބޭފުޅުން ވަނީ ވާހަކަފުޅު ދައްކަވާފައެވެ. އަދި ޓެކްނޮލޮޖީއާއި ދަނޑުވެރިކަމާއި އަދި ވޮކޭޝަނަލް ޓްރެއިނިންގ ފަދަ ދާއިރާތަކުން ބަންގްލަދޭޝުން ހޯދަމުން އަންނަ ކުރިއެރުންތައް ފާހަގަކުރައްވައި، މިދާއިރާތަކުން ތައުލީމު ހާސިލްކުރުމަށް ދިވެހި ދަރިވަރުންނަށް ބަންގްލަދޭޝްއިން ލިބެންހުރި ފުރުސަތުތަކާއި ބެހޭގޮތުން ސަފީރު ވަނީ މަޝްވަރާ ކުރައްވާފައެވެ.

އަދި އެޑްވައިޒަރ ވަހީދުއްދީން ވަނީ ތައުލީމީ ދާއިރާއިން ބަންގްލަދޭޝްއާއި ދިވެހިރާއްޖެއާ ދެމެދު ކުރެވެމުންދާ މަސައްކަތްތައް ހުއްޓުމެއްނެތި ކުރިއަށް ގެންދަވައި، އިތުރު ފުރުސަތުތައް ހޯއްދަވައި ދެއްވުމުގައި އެހީތެރިވެދެއްވާނެކަމަށް ވިދާޅުވެފައެވެ.

އެޑްވައިޒަރ، ވަހީދުއްދީން މަހްމޫދްއަކީ ބަންގްލަދޭޝްގެ ވަގުތީ ސަރުކާރުގެ އެޑިއުކޭޝަން މިނިސްޓްރީގެ ވަޒީރެވެ.