އިސްނަންގަވައިގެން މަސައްކަތްކުރައްވާތީ ވަޒީރު ޝުކުރުދަންނަވައިފި

ރަށުގެ ކަންކަން ރަނގަޅުކުރެއްވުމަށް އިސްނަންގަވައިގެން މަސައްކަތްކުރައްވާތީ ފެލިދެއަތޮޅު ފުލިދޫ ކައުންސިލުގެ ރައީސަށާއި، ކައުންސިލުގެ މެންބަރުންނަށް ވަޒީރު އާދަމް ޝަރީފު ޢުމަރު ޝުކުރު ދަންނަވައިފިއެވެ. ފުލިދޫ ކައުންސިލުގެ މެންބަރުންނަށް ޝުކުރުދެންނެވީ، އެ ކައުންސިލުގެ މެންބަރުންނާ ބައްދަލުކުރެއްވުމަށް މިއަދު ހެނދުނު ވުޒާރާގައި ބޭއްވި ބައްދަލުވުމުގައި ވާހަކަފުޅުދައްކަވަމުންނެވެ.

މިއަދު ހެނދުނު ބޭއްވި މި ބައްދަލުވުމުގައި ވަޒީރު ދެއްކެވި ވާހަކަފުޅުގައި ރަށުގެ ކަންތައްތަކުގައި ރައްޔިތުންގެ ޚިޔާލާއި، މަޝްވަރާ ހޯއްދެވުމަށް ކައުންސިލުގެ މެންބަރުންގެ އަރިހުން ވަޒީރު އެދިވަޑައިގެންނެވިއެވެ.

ރަށުގެ ކަންކަމާ މެދު މަޝްވަރާކުރުމަށް ބޭއްވި މި ބައްދަލުވުމުގައި ކައުންސިލު އިދާރާގެ ޖާގައިގެ ދަތިކަމާއި، އިޖުތިމާޢީ ކަންކަމުގައި މަޝްވަރާކުރެވޭނެ ތަނަކާ ބެހޭ ގޮތުންނާއި، ޞިއްޙީ މަރުކަޒުގެ ޚިދުމަތްތައް ފުޅާކުރުމާއި، ސުކޫލު ޢިމާރާތްތަކުގެ ޙާލަތު ރަނގަޅުކުރުމުގެ އިތުރުން ބަނދަރުގެ މައްސަލައާ ބެހޭ ގޮތުން ވާހަކަދެކެވި މަޝްވަރާކުރެވިފައި ވެއެވެ.

ރަށްރަށުގެ ޢުމްރާނީ ޙާލަތު ރަނގަޅުވެ، ކުރިއަރައި ތަހުޒީބުވަމުން އަންނަ އިރު، ރައްޔިތުންނަށް ސަރުކާރުން ފޯރުކޮށްދެއްވަމުން އަންނަ ޚިދުމަތްތައް ރަނގަޅުކުރެއްވުމަކީ މި ސަރުކާރުގެ މުހިންމު ސިޔާސަތެކެވެ. ޚާއްޞަކޮށް ކައުންސިލުތައް އާބާތުރަ ފިލުވައި، ކައުންސިލުތަކުގެ އިދާރާތައް އަލުން ޢިމާރާތްކުރުމަކީ ރައީސް ޑޮކްޓަރ މުޙައްމަދު މުޢިއްޒުގެ ޚާޢްޞަ ވަޢުދުފުޅެކެވެ.