މިނިސްޓަރ އޮފް ސްޓޭޓް އިބްރާހީމް ނަޡީމް އަދި މިނިސްޓްރީގެ އިސްވެރިން، ލޯކަލް ގަވަރންމަންޓް އެންޑް ޕަބްލިކް ވާރކްސްގެ ސީނިއަރ މެނޭޖްމަންޓްއާއި ބައްދަލުކުރައްވައިފި

މިނިސްޓަރ އޮފް ސްޓޭޓް އިބްރާހީމް ނަޡީމް އަދި މިނިސްޓްރީގެ އިސްވެރިން، މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސްގެ ސީނިއަރ މެނޭޖްމަންޓް އާއި ބައްދަލުކުރައްވައިފިއެވެ. މި ބައްދަލުވުމުގައި މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސްގެ ފަރާތުން ބައިވެރިވެވަޑައިގަތީ މިނިސްޓަރ އޮފް ސްޓޭޓް މުޙައްމަދު ހާޝިމް، މިނިސްޓަރ އޮފް ސްޓޭޓް އައްޝައިޚް ޠާހާ ނަޢީމް، މިނިސްޓަރ އޮފް ސްޓޭޓް އަލްއުސްތާޛު މޫސާ ފަތުޙީ އާދަމް އަދި ޑެޕިއުޓީ މިނިސްޓަރ އަޙްމަދު ހަލީމެވެ. މި ބައްދަލުވުމުގައި އިމާރާތްކުރުމުގެ ޤާނޫނާއި ގަވާއިދުތަކާއި ގުޅޭ މުހިންމު މަޝްވަރާތަކެއް ކުރެވުނެވެ. އެގޮތުން މަޝްވަރާކުރެވުނު ކަންކަމުގެ ތެރޭގައި އިމާރާތްކުރުމުގެ ޤާނޫނާއި ގަވާއިދުތަކުގެ ދަށުން ހުއްދަ ދޫކުރާ އިދާރާތަކަށް ލިބިދޭ ބާރުތަކަށް ހޭލުންތެރިކޮށް، އެ ބާރުތައް ތަންފީޒުކުރަން ފެށުމާއި ގުޅޭ ގޮތުން ވާހަކަދެކެވުނެވެ. އަދި ރަށްރަށުގެ ކައުންސިލްތަކުންވެސް އިމާރާތްކުރުމުގެ ޤާނޫނާއި ގަވާއިދުތަކަށް ހޭލުންތެރިކުރުމުގެ މުހިންމުކަމާއި، ރަށްރަށުގައި ހިންގޭ އުމްރާނީ ތަރައްޤީގެ މަޝްރޫޢުތަކަށް ދޫކުރަންޖެހޭ ހުއްދަތަކާއި ގަވާއިދުތައް އޮންނަ އުސޫލުގެ ތެރެއިން ދޫކުރެވޭނެ އިންތިޒާމްތަކާއި ގުޅޭގޮތުންވެސް މަޝްވަރާ ކުރެވިގެން ދިޔައެވެ. މި ބައްދަލުވުމަކީ ދެ މިނިސްޓްރީގެ މެދުގައި އޮންނަ ގުޅުން ބަދަހިކޮށް، ސަރުކާރުގެ މެންޑޭޓުގައި ހުރި ކަންކަން ތަންފީޒުކުރުމަށްޓަކައި ދުރާލާ ބޭއްވުނު ވަރަށް މުހިއްމު ބައްދަލުވުމެކެވެ.