logo
banner image

ހަފުތާގެ 156 ކާމިޔާބީ: އިއާދަކުރަނިވި ހަކަތަ ދެގުނައަށް ވުރެ އިތުރުކޮށް 136 މެގަވޮޓަށް އަރައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ތިމާވެއްޓާ ރައްޓެހި، ދެމެހެއްޓެނިވި ހަކަތަ އުފެއްދުމަށް ކުރަމުންދާ މަސައްކަތުގެ ދަށުން، ރާއްޖޭގެ އިއާދަކުރަނިވި ހަކަތައިގެ މިންވަރު ދެގުނައަށް ވުރެ އިތުރުކޮށް 136 މެގަވޮޓަށް އިތުރުކޮށްފިއެވެ. މިއީ ސަރުކާރުގެ "ހަފުތާ 156" ކާމިޔާބީތަކުގެ ތެރޭގައި ފާހަގަކޮށްލެވޭ މުހިންމު ލަނޑުދަނޑިއެކެވެ.

މި ސަރުކާރުން ވެރިކަމާ ހަވާލުވިއިރު މުޅި ރާއްޖޭގައި އުފެއްދެމުން ދިޔައީ އެންމެ 53 މެގަވޮޓުގެ އިއާދަކުރަނިވި ހަކަތައެވެ. ނަމަވެސް، ވޭތުވެދިޔަ މުއްދަތުގެ ތެރޭގައި ސަރުކާރުން ދިން ޚާއްޞަ އިސްކަމުގެ ދަށުން، މިހާރު މި އަދަދު ވަނީ 136 މެގަވޮޓަށް މަތިކުރެވިފައެވެ. މިއީ ރާއްޖޭގައި ތެލަށް ބަރޯސާވާ މިންވަރު ކުޑަކޮށް، ދައުލަތުގެ ބަޖެޓުން ތެލަށް ހޭދަކުރާ މިންވަރު ސަލާމަތްކުރުމަށް އެޅުނު ވަރަށް ބޮޑު ބާރެކެވެ.

ރައީސް ޑރ. މުޙައްމަދު މުޢިއްޒުގެ ސިޔާސަތަކީ ރާއްޖޭގައި ބޭނުންކުރާ ހަކަތައިގެ ބޮޑު އިންސައްތައެއް އިއާދަކުރަނިވި ހަކަތައަށް ބަދަލުކުރުމެވެ. މި އަމާޒަށް ވާސިލުވުމަށްޓަކައި ރާއްޖޭގެ އެކި ކަންކޮޅުތަކުގައި ސޯލާ ޕެނަލްތައް ހަރުކުރުމާއި، އަވިންނާއި ވައިން ހަކަތަ އުފެއްދުމުގެ ގިނަ މަޝްރޫޢުތަކެއް އަންނަނީ ކާމިޔާބުކަމާއެކު ހިންގަމުންނެވެ.

ހަކަތައިގެ ދާއިރާއަށް މި ގެނެވުނު ބޮޑު އިންގިލާބަކީ ދިވެހިރާއްޖޭގެ ތިމާވެށި ރައްކާތެރިކުރުމަށާއި، އިޤްތިޞާދީ ގޮތުން ޤައުމަށް ލިބިގެންދިޔަ ވަރަށް ބޮޑު ކުރިއެރުމެއް ކަމުގައި ސަރުކާރުން ފާހަގަކުރެއެވެ. ސަރުކާރުގެ އަމާޒަކީ ކުރިއަށް އޮތް ތަނުގައިވެސް މި ދާއިރާއިން އިތުރު ކާމިޔާބީތައް ހޯދައި، ރާއްޖެއަކީ ފެހި ހަކަތައިގެ ނަމޫނާ ޤައުމަކަށް ހެދުމެވެ.