ތިލަފުށީ ބަނދަރު ތަރައްޤީކުރުމުގެ މަޝްރޫޢާ ގުޅޭގޮތުން މީޑިއާތަކުގައި ދެކެވެމުންދާ ވާހަކަތައް މިނިސްޓްރީން ދޮގުކޮށްފި

ތިލަފުށީގައި ތަރައްޤީކުރާ އާ ބައިނަލްއަޤްވާމީ ވިޔަފާރި ބަނދަރުގެ މަޝްރޫޢާ ގުޅޭގޮތުން، ވަކި ޚާރިޖީ ބައިވެރިއަކަށް ސަރުކާރުން އިސްކަންދީފައިވާ ކަމަށް ބުނެ މީޑިއާތަކުގައި ދެކެވެމުންދާ ވާހަކަތައް މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން ދޮގުކޮށްފިއެވެ.

އިކޮނޮމިކް މިނިސްޓްރީން ނެރުނު ނޫސްބަޔާނެއްގައި ވިދާޅުވީ، މި މަޝްރޫޢު ހަވާލުކޮށްފައިވަނީ މިފަދަ އުމްރާނީ ތަރައްޤީގެ މަޝްރޫޢުތައް ކުރިއަށްގެންދިއުމަށް ސަރުކާރުން ކަނޑައަޅާފައިވާ ހަމަތަކާއި، ދިވެހިރާއްޖޭގެ ޤާނޫނުތަކާ އެއްގޮތްވާ ގޮތުގެ މަތިން ކަމަށެވެ. އަދި މި ނިންމުމަކީ ހަމައެކަނި ރާއްޖޭގެ ދިގު މުއްދަތުގެ ތަރައްޤީގެ އިސްކަންދޭ ކަންކަމަށް ރިޢާޔަތްކޮށް ނިންމާފައިވާ ނިންމުމެއް ކަމަށާއި، މިއީ އެއްވެސް ޚާރިޖީ ބައިވެރިއަކާ މެދު އޮތް ގުޅުމަށް ބަދަލެއް އައިސް ނުވަތަ ވަކި ގޮތަކަށް ދެކޭތީ ނިންމި ނިންމުމެއް ނޫން ކަމަށްވެސް މިނިސްޓްރީން ފާހަގަކުރެއްވިއެވެ.

މީގެއިތުރުން، ތިލަފުށީ ބަނދަރު ތަރައްޤީކުރުމާއި، އޭގެ މިލްކުވެރިކަމާއި އަދި ހިންގުމުގެ ފުރިހަމަ ބާރު އަބަދުވެސް އޮންނާނީ ދިވެހި ސަރުކާރުގެ ބެލުމުގެ ދަށުގައި ކަމަށް ބަޔާނުގައި ވެއެވެ. އަދި ރާއްޖޭގެ މިނިވަންކަމާއި ސިޔާދަތަކީ އެއްވެސް ދޫދިނުމެއް އޮތް ކަމެއް ނޫން ކަމަށާއި، ޤާނޫނާއި ޤައުމީ މަޞްލަޙަތު ތަންދޭ މިންވަރުން ބޭރުން، ރާއްޖޭގެ އުމްރާނީ ނިންމުންތަކުގެ މައްޗަށް ބަސްބުނުމުގެ ޙައްޤު މާޒީގައި އަދި މިހާރުވެސް އެއްވެސް ބޭރުގެ ފަރާތަކަށް ލިބިގެން ނުވާކަން ސަރުކާރުން ވަނީ ހާމަކޮށްފައެވެ.

"ތިލަފުށީ ބަނދަރަކީ ދިވެހި ރައްޔިތުންނާއި ޤައުމުގެ ދިގު މުއްދަތުގެ ފާގަތިކަމަށް ޚިދުމަތްކުރާނެ މަޝްރޫޢެއް. މި މަޝްރޫޢު ހަވާލުކުރެވުނީ ސަރުކާރުގެ ޤާނޫނީ އިޖުރާއާތުތަކުގެ ތެރެއިން. އަދި މިއީ އަޅުގަނޑުމެންގެ އެއްވެސް ބައިވެރިއަކާ މެދު ދެކޭގޮތް ދައްކުވައިދޭ ކަމެއްގެ ގޮތުގައި މާނަކޮށްގެން ނުވާނެ. ރާއްޖެއިން އަބަދުވެސް ހުރިހާ ބައިވެރިންގެ އެހީތެރިކަން އަގުވަޒަންކުރޭ"، މިކަމާ ގުޅޭގޮތުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ "މޯލްޑިވްސް-ފަސްޓް" ޚާރިޖީ ސިޔާސަތަކީ ހުރިހާ ބައިނަލްއަޤްވާމީ ބައިވެރިންނާ އެކުވެސް ބިނާކުރަނިވި ގުޅުމެއް ބޭއްވުން ކަމަށާއި، އެ ސިޔާސަތު އަބަދުވެސް ބިނާވެފައި އޮންނާނީ ރާއްޖޭގެ ސިޔާދަތާއި ޤައުމީ މަޞްލަޙަތުގެ މައްޗަށް ކަމަށް އިކޮނޮމިކް މިނިސްޓްރީގެ ބަޔާން ނިންމާލަމުން ބަޔާންކޮށްފައިވެއެވެ.