ފަޅުތަކާއި ފަޅުރަށްތައް ކުއްޔަށް ދިނުމާ ގުޅޭ ބިލު ތަސްދީގު ކުރައްވައިފި

ރާއްޖޭގެ ފަޅުތަކާއި ފަޅުރަށްތައް ކުއްޔަށް ދިނުމާ ގުޅޭ ބިލު ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ތަސްދީގު ކުރައްވައިފިއެވެ.

މި ބިލު ސަރުކާރުގެ ފަރާތުން ހުށަހެޅުއްވީ، ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީއެވެ.

މި ބިލުގައި އެކި ބޭނުންތަކަށް ފަޅުރަށްތަކާއި ފަޅުތައް ކުއްޔަށް ދޫކުރުމާއި، ވަކި ބޭނުންތަކަށް ކަނޑައަޅާފައި ނުވާ ފަޅުރަށްތައް ވަރުވާއަށް ދިނުމާ ގުޅޭ ކަންކަން ތަފްސީލުކޮށް ހިމަނާފައިވެއެވެ.

އިސްލާހުތަކުގެ މައިގަނޑު މަޤްޞަދަކީ ދަޢުލަތުގެ މިފަދަ ވަސީލަތްތައް އެންމެ އިންޞާފުވެރި އަދި އިޤްތިޞާދީ ގޮތުން އެންމެ މާންފާހުރި ގޮތެއްގައި ބޭނުންކުރުމުގެ ހަރުދަނާ އުޞޫލުތަކެއް ޤާއިމްކުރުމެވެ.

ފަޅުރަށްރަށާއި ފަޅުތައް އެކި ބޭނުންތަކަށް ކަނޑައެޅުމުގެ ބާރު ކުރިއެކޭ އެއްގޮތަށް ލިބިފައި އޮންނަނީ ރައީސުލްޖުމްހޫރިއްޔާއަށެވެ. ނަމަވެސް ރައީސް އަށް ފަޅުރަށްތައް އެކަށައެޅޭނީ، ފަތުރުވެރިކަމާއި މަސްވެރިކަމާއި ދަނޑުވެރިކަމާއި ސިނާޢީ، އިގްތިސާދީ އަދި އިޖުތިމާޢީ ބޭނުންތަކާއި ދައުލަތުގެ ބޭނުންތަކުގެ އިތުރުން އެހެން ޤާނޫނެއްގައި ކަނޑައަޅާފައިވާ ޚާއްސަ ބޭނުންތަކަށެވެ.

އަލަށް ގެނައި އިސްލާހުތަކާއިއެކު ފަޅު ކުއްޔަށް ދެވޭނީ ޞިނާޢީ، އިޤްތިޞާދީ އަދި މަސްވެރިކަމުގެ ބޭނުންތަކަށެވެ. ފަޅުތައް ކުއްޔަށް ދޫކުރުމުގެ ޢުޞޫލުތައް ސާފުކޮށް ކަނޑައެޅިގެން ދިއުމާއެކު، ދަޢުލަތަށް ބޮޑެތި މަންފާތައް ލިބިގެންދާނެއެވެ.އެގޮތުން ފަޅުގެ ކުލީގެ ގޮތުގައި އަދި އިކުއިޒިޝަން ފީގެ ގޮތުގައި ދަޢުލަތަށް ލިބޭ އާމްދަނީ އިތުރުވެގެންދާނެ އެވެ. އަދި

އެކުއަކަލްޗަރ އަދި މެރިކަލްޗަރ ފަދަ ތިމާވެށްޓާ ރައްޓެހި، އައު އިޤްތިޞާދީ ފުރުސަތު ހުޅުވިގެންދާނެއެވެ.

ބިލުގައިވާ ގޮތުން، އެކި ބޭނުންތަކަށް ކަނޑައަޅާފައިވާ ފަޅުރަށެއް ކުއްޔަށް ދޫކުރެވޭނީ 21 އަހަރުގެ މުއްދަތަކަށެވެ. ނަމަވެސް މުއްދަތު އިތުރުކުރަން އެދޭ ހާލަތްތަކުގައި މުޅި ޖުމްލަ ކުއްޔަށްދޭ މުއްދަތު 50 އަހަރަށްވުރެ އިތުރުނުވާގޮތަށް ހަމަޖެއްސޭނެ އެވެ. އަދި ވަރުވާއަށް ދޫކުރެވޭނީ ވަކި ބޭނުމަކަށް ހާއްސަކޮށްފައިނުވާ ރަށްތަކެއް ކަމަށާއި، ވަރުވާއަށް ދޫކުރާ މުއްދަތަކީ ގިނަވެގެން 5 އަހަރު ކަމަށްވެސް ބިލުގައި ބަޔާންކޮށްފައިވެ އެވެ.

މީގެ އިތުރުން، މި ގާނޫނާ ހިލާފުވާ ފަރާތްތަކަށް ބޮޑެތި ޖޫރިމަނާތަކެއް ވަނީ ކަނޑައަޅާފައެވެ. އެގޮތުން ވަރުވާއަށް ދޫކުރާ ފަޅުރަށެއްގައި ގާނޫނާއި ހިލާފު ކަމެއް ކޮށްފިނަމަ ފަސްލައްކަ ރުފިޔާއަށްވުރެ ބޮޑު ނުވާ އަދަދަކުން ޖޫރިމަނާކުރެވޭނެ އެވެ. އަދި ކުއްޔަށް ދޫކުރާ ފަޅުރަށާއި ފަޅުތަކުގައި ގާނޫނާ ހިލާފު ކަމެއް ހިންގައިފިނަމަ އެއް މިލިޔަން ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުމުގެ ބާރު ލިބިގެންވެއެވެ.