މަސްވެރިކަމުގެ ގާނޫނަށް ގެނައި އިސްލާހު ރައީސުލްޖުމްހޫރިއްޔާ ތަސްދީގު ކުރައްވައިފި

މަސްވެރިކަމުގެ ގާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސުލްޖުމްހޫރިއްޔާ ޑރ މުހައްމަދު މުއިއްޒު މިއަދު ތަސްދީގު ކުރައްވައިފިއެވެ.

މަސްވެރިކަމުގެ ގާނޫނަށް ސަރުކާރުގެ ފަރަތުން މި އިސްލާހުތައް ހުށަހެޅުއްވީ ތިނަދޫ ދެކުނު ދާއިރާގެ މެންބަރު މުޙައްމަދު އަލްސަން އަހުމަދުއެވެ.

ރައްޔިތުންގެ މަޖިލީހުގައި މި ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 59 މެންބަރުން ވޯޓު ދެއްވައިގެންނެވެ. މި ބިލު ފާސްކޮށްފައިވަނީ، އިގްތިސޯދީ ކޮމިޓީން ބިލު ދިރާސާކުރުމަށްފަހު ގެނައި އިސްލާހުތަކާވެސް އެކުގައެވެ.

މުނިފޫހިފިލުވުމަށާއި ކުޅިވަރުގެ ގޮތުގައި ކުރާ މަސްވެރިކަމުގެ ޙަރަކާތްތަކާއި އެކަމާ ގުޅޭ ފެސިލިޓީތައް ތަރައްޤީކޮށް ހިންގުމަކީ ރާއްޖޭގެ އިޤްތިޞާދަށާއި ފަތުރުވެރިކަމުގެ ދާއިރާއަށް ނުހަނު މުހިންމު ކަމެކެވެ. މިފަދަ ފެސިލިޓީތައް ޒަމާނީ ފެންވަރަށް ތަރައްޤީކުރުމަކީ ފަތުރުވެރިންނަށާއި ޢާންމު ރައްޔިތުންނަށް ރައްކާތެރި އަދި ފަސޭހަ މާޙައުލެއްގައި މި ޙަރަކާތްތަކުގައި ބައިވެރިވުމުގެ ފުރުޞަތު މި އިސްލާހުތަކާއި އެކު ފަހިވެގެންދާނެ އެވެ. އެގޮތުން، މަސްވެރިކަމާއި މަސްވެރިކަމާ ގުޅުންހުރި ޙަރަކާތްތަކުގެ ބޭނުމަށްޓަކައި ޚާއްސަ ބަނދަރުތައް ތަރައްގީކޮށް ހިންގުމާ ބެހޭ ޤާނޫނީ އޮނިގަނޑެއް މަސްވެރިކަމުގެ ޤާނޫނަށް 2 ވަނަ އިސްލާހު ގެނައުމުގެ ޤާނޫނުން ވަނީ ތަޢާރަފުކޮށްފައެވެ. މީގެ ތެރޭގައި އުޅަނދުފަހަރު ބަނދަރުކުރުމާއި ސަރވިސްކުރުމުގެ ޚިދުމަތާއި، މަސް ކިރުމާއި ޕްރޮސެސްކުރުމުގެ ޚިދުމަތާއި، މަސްވެރިކަމުގެ އަދި މަސްވެރިކަމާގުޅުންހުރި ޙަރަކާތްތަކަށް ބޭނުންވާ އާލާތްތަކާއި ސާމާނު ވިއްކުން ފަދަ ޚިދުމަތްތައް ފޯރުކޮށްދިނުން ހިމެނެއެވެ.

މަސްވެރިކަމާ ބެހޭ ގާނޫނަށް މި އިސްލާހުތައް ހުށަހެޅުމުގެ ބޭނުމަކީ ދިވެހިރާއްޖޭގެ މަސްވެރިކަމުގެ ޤާނޫނާ ޚިލާފަށް ހަރަކާތްތެރިވާ މަސްވެރި އުޅަނދުތަކާއި އެހެނިހެން ފަރާތްތަކާމެދު ޤާނޫނީ ފިޔަވަޅު އެޅުމެވެ. މަސްވެރިކަން ކުރުން ހުއްދަ ބާވަތްތައް ކަނޑައެޅުމާ ގުޅޭ އުސޫލުތައް މުރާޖާ ކުރުމާއި ޙިމާޔަތްކޮށްފައިވާ މަހުގެ ބާވަތްތަކުގެ މަސްވެރިކަން ކުރުމަކީ، ޤާނޫނުގެ ދަށުން ކުށެއްކަމުގައި ބަޔާންކުރުމެވެ. މި ބިލުގައި އެފަދަ ކުށްތަކުގެ ޖޫރިމަނާ ކަނޑައެޅުމާއި، އެނޫންވެސް ޤާނޫނު ތަންފީޛުކުރުމުގައި ދިމާވާ ދަތިތައް ޙައްލުކުރުންވެސް ހިމެނެއެވެ.

ބިލުގައިވާ ގޮތުން، ރާއްޖޭގެ ކަނޑުގެ ސަރަހައްދުގައި އިތުރު ބާވަތްތަކުގެ މަސްވެރިކަން ކުރުމުގެ ހުއްދަ މި ވުޒާރާއަށް ދެވިދާނެއެވެ. އެކި ބާވަތްތަކުގެ މަސްވެރިކަން ކުރުމުގެ ހުއްދަ ދިން ނަމަވެސް، ހިމާޔަތްކޮށްފައިވާ އެއްވެސް ބާވަތެއްގެ މަސްވެރިކަން ކުރުމަކީ މުޅިން މަނާކަމެކެވެ. އެގޮތުން ހިމާޔަތްކޮށްފައިވާ މަހުގެ ބާވަތްތަކުން މަސްވެރިކަން ކޮށްފިނަމަ 500،000 ރުފިޔާއިން ޖޫރިމަނާ ކުރެވޭނެއެވެ. އަދި އެފަދަ މަހުގެ ބާވަތެއް ރާއްޖެއިން ބޭރުކޮށްފިނަމަ 1،000،000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު މި ގާނޫނުން ލިބިގެންދާނެ އެވެ.

މީގެއިތުރުން މަސްވެރިކަމާ ގުޅުންހުރި ހަރަކާތްތަކަށް ޚާއްސަ ބަނދަރުތައް ތަރައްޤީ ކުރުމުގެ ހުއްދަ މިވުޒާރާއަށް ދެވޭނެއެވެ. އަދި ޤާނޫނުގައި މަނާކޮށްފައިވާ ހަރަކާތެއް ހިންގުމުގެ ސަބަބުން އިދާރީ ފިޔަވަޅު އަޅާ ބޭރުގެ އުޅަނދުފަހަރު ނިސްބަތްވާ ޤައުމެއްގެ ސަބަބުން އެ އުޅަނދާމެދު އަމަލުކުރާނެ އުސޫލުތައްވެސް ބަޔާންކޮށްފައިވެއެވެ.

މި އިސްލާހުތަކުގެ މައިގަނޑު މަގުސަދަކީ މުނިފޫހިފިލުވުމުގެ ގޮތުން ކުރާ މަސްވެރިކަމަށް ހާއްސަ ބަނދަރު (ސްޕޯރޓްސް ފިޝިންގ ހާރބަރ) ހެދުމަށް ޝައުޤުވެރިކަން ހުރި ފަރާތްތަކަށް މިފަދަ މަޝްރޫއުތައް ހިންގޭނެ ޤާނޫނީ ބާރު ހޯދައި މިކަންކުރެވޭނެ ހާއްސަ އުސޫލުތަކެއް ކަނޑައެޅުމެވެ. އަދި މި އިސްލާހުގެ ސަބަބުން މަސްވެރިކަމުގެ ގާނޫނާ ގަވާއިދުތައް ތަންފީޒުކުރުމުގައި މިނިސްޓްރީއިން އަމަލުކުރާ އުސޫލުތައް އިތުރަށް ހަރުދަނާކުރެވިގެންދާނެއެވެ.