ކޮންމެ މުޖުތަމައެއްގެވެސް އެންމެ ވަރުގަދަ އެއް ތަނބަކީ އެ މުޖުތަމައެއްގެ އިސްރަށްވެހިން

އިސްރަށްވެހިން ނުވަތަ ދޮށީ އުމުރުގެ މީހުންނަށް އޯގާތެރިވެ، އިޙްތިރާމްކުރުމަކީ އިސްލާމީ އަޤީދާގެ މުހިންމު އަސާސެކެވެ. އިސްރަށްވެހިންނަށް އިޙްތިރާމްކުރުމަކީ، ޢާއިލީ ގުޅުންތައް ވަރުގަދަވެ، އޯގާތެރި, އަޅާލާ މުޖުތަމަޢެއް ބިނާކުރުމުގެ އިތުރުން، ﷲ ސުބުޙާނަހޫ ވަތަޢާލާގެ ރުހިވޮޑިގަތުން ލިބިގެންދާ މަތިވެރި އަމަލެކެވެ.

އެހެނީ، ކޮންމެ މުޖުތަމަޢެއްގެވެސް ބިންގަލަކީ އެ މުޖުތަމަޢެއްގެ އިސްރަށްވެހިންނެވެ. އެގޮތުން، އުމުރުން ދުވަސްވީ ފަރާތްތައް ނުވަތަ އިސްރަށްވެހިންނަކީ އެބައެއްގެ ކިބައިގައި އަގުނުކުރެވޭނެ އަގުހުރި ޢިލްމާއި ތަޖުރިބާ ހުރި ފަރާތްތަކެކެވެ. އިސްރަށްވެހިންނަކީ އެބައެއްގެ މިންނެތް މަސައްކަތުން މިއަދުގެ ޖީލަށް އުފާވެރި، އަމާން މުސްތަޤުބަލެއް ބިނާކޮށްދިން މާލިމީންނެވެ.

އިސްރަށްވެހިންނަށް އިޙްތިރާމްކުރުމަކީ އަޚުލާޤީ އަދި އިޖުތިމާޢީ ގޮތުން ކޮންމެހެން އަދާކުރަންޖެހޭ މަސްއޫލިއްޔަތެއް ވެސް މެއެވެ. ކީރިތި ޤުރުއާނާއި ހަދީޘްފުޅުތަކުގައި، އިސްރަށްވެހިންނަށް، ވަކިން ޚާއްޞަކޮށް މައިންބަފައިންނާއި، މާމަ ކާފަ އަދި މުޖުތަމަޢު ތެރޭގައި ތިބޭ ދޮށީ އުމުރުގެ މީހުންނަށް އޯގާތެރިވުމާއި އިޙްތިރާމްކުރުމުގެ މުހިންމުކަން ބަޔާންކުރައްވާފައިވެއެވެ.

އިމާމް ތިރްމިޒީ ރިވާކުރައްވާފައިވާ މާތް ނަބިއްޔާ މުޙައްމަދު صلى الله عليه وسلم ޙަދީޘްފުޅެއްގެ މާނައިގައިވަނީ، "އަހަރެމެންގެ ތެރެއިން ކުޑަކުދިންނަށް އޯގާތެރިނުވާ އަދި ބޮޑެތި މީހުންނަށް (އިސްރަށްވެހިންނަށް) އިޙުތިރާމް ނުކުރާ މީހަކީ އަހަރެމެންގެ ތެރެއިންވާ މީހެއް ނޫނެވެ." ހަމައެހެންމެ، ކީރިތި ޤުރުޢާނުގައި މާތް ﷲ ވަޙީކުރައްވާފައިވެއެވެ. "އެކަލާނގެއަށް މެނުވީ، ތިޔަބައިމީހުން އަޅުކަން ނުކުޅައުމަށާއި، މައިންބަފައިންނަށް ހެޔޮކޮށް ހިތުމަށް، ކަލޭގެފާނުގެ ވެރިރަސްކަލާނގެ ކަނޑައަޅުއްވައި އެންގެވިއެވެ. އެ ދެމީހުންކުރެ އެކަކު، ނުވަތަ އެ ދެމީހުން ތިބާގެގާތުގައި ތިބެ، މުސްކުޅިކަމާ ހަމައަށް ފޯރައްޖެނަމަ، އެދެމީހުންނަށް އުފް ވެސް ނުބުނާށެވެ! (އެބަހީ: ނުރުހުމުގެ ކިތަންމެ ކުޑަ ބަހެއްވިޔަސް ނުބުނާށެވެ!) އަދި އެ ދެމީހުންނަށް، އަޑުލައި ނުހަދާށެވެ! އަދި މާތް ބަހަކުން އެ ދެމީހުންނަށް ބަސްބުނާށެވެ!" (އަލް އިސްރާ: 23). މިއީ މައިންބަފައިންނާއި، ވަކީން ޚާއްސަކޮށް އުމުރުން ދުވަސްވީ ބެލެނިވެރިންނަށް ދޭންޖެހޭ ޤަދަރާއި އިޙުތިރާމް ހާމަކޮށްދޭ ދީނީ ހެކިތަކެވެ.

އިސްރަށްވެހިންނަށް އަޅާލުމާއި އޯގާތެރިކަން ފޯރުކޮށްދިނުމަށް، އެމީހުންގެ އަސާސީ ބޭނުންތައް ފުރިހަމަކޮށްދިނުމުގެ އިތުރުން، އެމީހުންގެ ނަފްސާނީ ދުޅަހެޔޮކަން ކަށަވަރުކުރުމަކީވެސް ވަރަށް މުހިންމުކަމެކެވެ. އެގޮތުން، އެމީހުންނާއެކު ވަގުތު ހޭދަކޮށް އެކަނިވެރިކަން ފިލުވައިދީ، އެމީހުންގެ ވާހަކަތައް ލޯތްބާއި ކެތްތެރިކަމާއި އެކު އަޑުއެހުމަކީ އެމީހުންގެ ނަފްސާނީ ދުޅަހެޔޮކަން ވަރުގަދަކޮށް އެކަނިވެރިކަމާއި ބާކީވުމުން އެއްކިބާކޮށްދޭކަމެކެވެ. އިސްރަށްވެހިންނަކީ ތަޖުރިބާގެ ޚަޒާނާތަކަކަށް ވުމާއެކު، އެމީހުންގެ އިރުޝާދާއި ނަސޭހަތަކީ ކަނުލައި އަޑުއަހައިފިނަމަ މިއަދުގެ ޒުވާނުންގެ ދިރިއުޅުން ބައްޓަންކުރުމަށް ލިބޭ ވަރަށް އަގުހުރި ފިލާވަޅުތަކަކަށް ވެގެންދާނެއެވެ.

ހަމައެހެންމެ، އިސްރަށްވެހިންނަކީ ޤަދަރުވެރިކަމާއެކު މުޖުތަމަޢުގައި އުޅޭ ބައެއްކަން ކަށަވަރުކުރުމަށް، އިސްރަށްވެހިން ބާކީވިޔަނުދީ މުޖުތަމައުގެ ތެރޭގައި ކުރިއަށްގެންދާ ތަފާތު ހަރަކާތްތަކުގައި ބައިވެރިކުރުވުމަކީ ވެސް މުހިންމު ކަމެކެވެ. އެގޮތުން، އެ އުމުރުގެ އެހެން މީހުންގެ ތެރޭގައި އުޅެ އެކި ކުޅިވަރުތަކާއި ހަރަކާތްތަކުގައި ހެލިފެލިވެ އުޅެލާނެ މަރުކަޒުތަކާއި، އެމީހުން ހިތްހަމަޖައްސާލާނެ އުފާވެރި މާހައުލުތައް ޤާއުމުކުރުމަކީ މުހިންމުކަމެކެވެ. މިއީ އެމީހުންގެ ނަފްސާނީ ދުލަހެޔޮކަމުގެ އިތުރުން، ޖިސްމާނީ އަދި އިޖުތިމާޢި ގޮތުންވެސް ދުޅަހެޔޮ ބައެއްގެ ގޮތުގައި ތިބުމަށް މަހުފަހިިކޮށްދެވޭނެ ކަންތައްތަކެވެ.

އެގޮތުން، އިސްރަށްވެހިންގެ ނަފްސާނީ، ޖިސްމާނީ އަދި އިޖުތިމާޢި ދުޅަހެޔޮކަން ކަށަވަރުކުރުމަށް ކުރެވޭ މަސައްކަތްތަކުގެ ތެރެއިން މިއަދުވަނީ މާލެ އަދި ހުޅުމާލޭގައި އިސްރަށްވެހިންނަށް ޙާއްސަ ނާދީތަކެއް ޤާއިމުކުރެވިފައެވެ. ހަމައެހެންމެ، އަތޮޅުތެރޭގައި ދިރިއުޅޭ އިސްރަށްވެހިންނަށް އަމާޒުކޮށްގެން މި ވުޒާރާއިން ހިންގާ އުފާވެރި ރާސްތާ ޕްރޮގްރާމަކީ ވެސް އިޖުތިމާޢީ އަދި ސިއްހީ ގޮތުން ދުޅަހެޔޮ ބައެއްގެ ގޮތުގައި ތިބުމަށް އިސްރަށްވެހިން ސަމާލުކަންދޭންވީ މުހިންމު ކަންކަމާއި ގުޅޭގޮތުން މަޢުލޫމާތު ހިއްސާކުރުމުގެ މަޤުސަދުގައި ކުރިއަށްގެންދެވޭ ޕްރޮގްރާމެކެވެ. އަދި އުފާވެރި މާހައުލަކުން އިސްރަށްވެހިން އެކަކު އަނެކަކާއި ބައްދަލުވެ ހިޔާލު ބަދަލު ކުރުމުގެ ފުރުސަތު ވެސް މި ޕްރޮގްރާމުގެ ތެރެއިން އިސްރަށްވެހިންނަށް ފަހިވެގެންދެއެވެ.

އިސްރަށްވެހިންނަކީ ގައުމުގެ ހަޤީޤީ ރައުސްމާލެވެ. އެމީހުންނަށް އޯގާތެރިވުމާއި، އަޅައިލުމާއި، ލޯބި ދިނުމަކީ މުޅި މުޖުތަމަޢުގައި ބަރަކާތްލައްވާނެ ކަމެކެވެ. އެހެންކަމުން، އޯގާތެރިކަމާއެކު އިސްރަށްވެހިންގެ އަތުގައި ހިފާ، އެމީހުންނަށް އުފާވެރިކަން ހޯދައިދިނުމަށް އެންމެން ގުޅިގެން މަސައްކަތްކުރަމާ ހިނގާށެވެ.