މަޓީގެ 36 ވަނަ އަހަރީ އާންމު ޖަލްސާގައި މިނިސްޓްރީގެ ރެގިއުލޭޓަރީ އެޖެންޑާ އާއި 2026 ގެ މަސައްކަތު ޕްލޭން ހުށަހަޅައިފި

ކުރުނބާ މޯލްޑިވްސްގައި ބޭއްވި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ 36 ވަނަ އަހަރީ އާންމު ޖަލްސާގައި، ފަތުރުވެރިކަމާއި ތިމާވެށްޓާ ބެހޭ ވުޒާރާގެ ރެގިއުލޭޓަރީ އެޖެންޑާ އާއި 2026 ވަނަ އަހަރުގެ މަސައްކަތު ޕްލޭން ހުށަހަޅައިފިއެވެ.

މި ޖަލްސާގައި ޓޫރިޒަމް މިނިސްޓްރީގެ އިސްވެރިންނާއި، ދައުލަތުގެ އެހެނިހެން ވުޒާރާތަކުގެ އިތުރުން އެކި ކުންފުނިތަކުގެ 112 މެންބަރުންނާއި ހިއްސާދާރުން ބައިވެރިވެފައިވެއެވެ.

މި ޖަލްސާގައި މިނިސްޓްރީގެ ފަރާތުން ވަނީ ރެގިއުލޭޓަރީ އެޖެންޑާ އާއި 2026 ވަނަ އަހަރަށް އެކުލަވާލާފައިވާ މަސައްކަތު ޕްލޭންގެ ތަފްސީލީ ޕްރެސެންޓޭޝަނެއް މަޓީގެ މެންބަރުންނަށް ހުށަހަޅާފައެވެ. މީގެ އިތުރުން، ފަތުރުވެރިކަމުގެ ދާއިރާ ކުރިއެރުވުމަށާއި ތިމާވެށި ހިމާޔަތްކުރުމަށް ސަރުކާރުން ގެންގުޅޭ މުހިންމު ސިޔާސަތުތައް ވެސް މި ޖަލްސާގައި ވަނީ ހިއްސާކޮށްފައެވެ.

މަޓީގެ ފަރާތުން މި ޖަލްސާގައި ވަނީ 2025 ވަނަ އަހަރު އެ ޖަމްޢިއްޔާއިން ކުރިއަށް ގެންދިޔަ ހަރަކާތްތަކުގެ ވީޑިއޯ ޕްރެޒެންޓޭޝަނެއް ދައްކާލައި، އަހަރީ ރިޕޯޓާއި މާލީ ރިޕޯޓުތައް ފާސްކޮށްފައެވެ. އަދި 2026 ވަނަ އަހަރުގެ ބަޖެޓު ފާސްކުރުމުގެ އިތުރުން، މިއަހަރަށް އޮޑިޓަރުންގެ ގޮތުގައި ފާރިސް އެންޑް ކޯ އެލްއެލްޕީ ވަނީ ހަމަޖައްސާފައެވެ.

މި ޖަލްސާގެ ތެރެއިން 2026 އިން 2029 އަށް މަޓީ ހިންގާނެ އާ އެގްޒެކެޓިވް ބޯޑު އިންތިޚާބުކޮށް އެގްޒެކެޓިވް ބޯޑުގެ ޗެއަރޕާސަންގެ މަޤާމަށް މަޝްހޫރު ވިޔަފާވެރިޔާ ޙުސައިން އަފީފް ވަނީ އިންތިޚާބުކޮށްފައެވެ. މަޓީއަކީ ރާއްޖޭގެ 120 އަށްވުރެ ގިނަ ރިސޯޓު ތަމްސީލުކުރާ، ފަތުރުވެރިކަމުގެ ސިނާޢަތުގެ އެންމެ ބޮޑު އަދި އެންމެ އިސް ޖަމްޢިއްޔާއެވެ.