ފަސް މިލިއަން ގަސް އިންދުމުގެ މަޝްރޫއުގެ ޓީމުން ވިޒިޓް މޯލްޑިވްސް ކޯޕަރޭޝަންއާ ބައްދަލުކޮށްފި

ފަސް މިލިއަން ގަސް އިންދުމުގެ ގައުމީ މަޝްރޫއުގެ ޓީމުން ވިޒިޓް މޯލްޑިވްސް ކޯޕަރޭޝަންގެ އިސްވެރިންނާ ބައްދަލުކޮށް، މަޝްރޫޢުގެ ފަރާތުން ކުރެވިދާނެ ދެމެހެއްޓެނިވި އިކޯ-ޓޫރިޒަމްގެ ހަރަކާތްތަކާ ގުޅޭގޮތުން މަޝްވަރާކޮށްފިއެވެ. މި ބައްދަލުވުން ބާއްވާފައިވަނީ ވިޒިޓް މޯލްޑިވްސްގެ ހެޑް އޮފީހުގައެވެ.

މި ބައްދަލުވުމުގައި މިނިސްޓްރީގެ ފަރާތުން ބައިވެރިވެފައިވަނީ ފަސް މިލިއަން ގަސްއިންދުމުގެ މަޝްރޫޢާ ޙަވާލުވެހުންނެވި ޑެޕިއުޓީ މިނިސްޓާރ އަޙްމަދު އަތީފްގެ އިތުރުން މިނިސްޓްރީގެ ބައެއް އިސްވެރިންނެވެ.

5 މިލިޔަން ގަސް އިންދުމުގެ ޕްރޮގުރާގެ ދަށުން މިހާތަނަށް މިލިޔަނަކަށްވުރެ ގިނަ ގަސް އިންދިފައިވާކަމަށް މިނިސްޓްރީގެ ތަފާސްހިސާބުތަކުން ދައްކައެވެ. 5 މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދެމެހެއްޓުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ ޕްރޮގުރާމެކެވެ.

ފަސް މިލިޔަން ގަސް އިންދުމުގެ ޕްރޮގްރާމުގައި ބޮޑަށް އިސްކަން ދެއްވާފައިވަނީ ރާއްޖެއިން ނެތެމުންދާ ބާވަތްތަކުގެ ގަސް އިންދާ އާލާކުރުމަށެވެ. އެގޮތުން، ރާއްޖެއިން ނެތެމުންދާކަމަށް ބެލެވޭ 90 ބާވަތެއްގެ ގަސް ލިސްޓުކޮށް، އިންދުމަށް ވަނީ ހަމަޖެހިފައެވެ. މިނިސްޓްރީގެ އަމާޒަކީ މި ޕްރްގްރާމުގެ ދަށުން 6.4 މިލިޔަން ގަސް އިންދުމެވެ.