"ދައުލަތުގެ މާލިއްޔަތުގެ ގަވާއިދު" ބާބު 13 - 13.08 ދައުލަތުގެ އޮފީސްތަކުން ފަންޑު އެކައުންޓް ހުޅުވައި ހިންގުމުގައި ޢަމަލުކުރަންޖެހޭ ގޮތް

މި ލިއުމުގައި މި ހިމަނާލަނީ، "ދައުލަތުގެ މާލިއްޔަތުގެ ގަވާއިދު"ގެ ބާބު ތަކާއި މާއްދާތައް ވަކިވަކިންނެވެ.

އެގޮތުން މި ލިއުމުގައި މި ގެނެސްދެނީ ބާބު 13 "ޕަބްލިކް ފަންޑްތައް ބެލެހެއްޓުން" އާއި ޕްރޮކިއުމަންޓް ނިޒާމުން ހާސިލުކުރުމަށް ބޭނުންވާ ކަންތައްތަކާއި އުސޫލުތަކާއި ގުޅޭ މާއްދާތަކެވެ.

ދައުލަތުގެ އޮފީސްތަކުން ފަންޑު އެކައުންޓް ހުޅުވައި ހިންގުމުގައި ޢަމަލުކުރަންޖެހޭ ގޮތް

13.08

(ހ) ވަކި ޤާނޫނެއްގެ ދަށުން ބާރު ލިބިގެން، ދައުލަތުގެ އޮފީސްތަކުން ހުޅުވައި ހިންގަންޖެހޭ ފަންޑުތައް ހުޅުވައި ހިންގުމުގައި، ހުރިހާ ފަންޑުތަކެއްގެ މައިގަނޑު ސިފަތައް އެއްގޮތަށް ބެހެއްޓުމާއި، ފަންނީ އެހީތެރިކަން ފޯރުކޮށްދިނުމާއި، ހިސާބު ބެލެހެއްޓުމާއި ގެންގުޅުމުގައި ހަރުދަނާ އެއް އުސޫލުތަކެއް އޮތުން ބޭނުންވާނެތީ، ދައުލަތުގެ އޮފީހަކުން އެފަދަ ފަންޑެއް ހުޅުވައިގެން އެ ފަންޑު ހިންގަން ބޭނުންވާނަމަ، އެ ފަންޑަކާބެހޭ ތިރީގައިމިވާ މަޢުލޫމާތު ހިމެނޭގޮތަށް "ފަންޑް ސްޓޭޓްމަންޓް" ތައްޔާރުކޮށް ފަންޑު ހުޅުވުމަށް ބޭނުންވާ ދުވަހުގެ 15 (ފަނަރަ) ދުވަހުގެ ކުރިން މިނިސްޓްރީއަށް ލިޔުމަކުން ހުށަހަޅަންވާނެއެވެ. އަދި މި ހުށަހެޅުން މިނިސްޓްރީއަށް ލިބޭތާ 15 (ފަނަރަ) ދުވަހުގެ ތެރޭގައި އެކަމާމެދު ފެންނަ ގޮތެއް އެ އޮފީހަކަށް ލިޔުމަކުން އަންގަންވާނެއެވެ.

(1) ފަންޑު ހުޅުވުމަށް ބަޔާންކޮށްފައިވާ ޤާނޫނުގެ ނަމާއި، ނަންބަރާއި، ތާރީޚު؛

(2) ފަންޑުގެ ނަން؛

(3) ފަންޑުގެ ބޭނުން؛

(4) ފަންޑަށް ޖަމާކުރާ ފައިސާގެ ބާވަތް؛

(5) ފަންޑުން ހޭދަކުރެވޭ ކަންތައްތައް؛

(6) ފަންޑު ހިންގުމުގައި ޒިންމާ އުފުލާ ފަރާތް؛

(7) ފަންޑު ހިންގުމަށް ޓަކައި ޓްރަސްޓް އެކައުންޓެއް ހުޅުވަން ބޭނުންވާނަމަ އެކަން؛

(8) ފަންޑު އެކައުންޓު ބަންދުކުރާނެ ތާރީޚާއި، ބަންދުކުރާއިރު އެކައުންޓުގައި ހުންނަ ފައިސާއާމެދު ޢަމަލުކުރާނެ ގޮތެއް.

(ށ) ފަންޑަށް ލިބޭ ފައިސާ ބަލައިގަތުމާއި، ޚަރަދުކުރުމާއި، ހިސާބުތައް ލިޔެ ބެލެހެއްޓުމުގައި ޢަމަލުކުރަންވާނީ، މި ގަވާއިދާ އެއްގޮތްވާ ގޮތުގެ މަތީންނެވެ.

(ނ) ފަންޑު އެކައުންޓުގެ އަހަރީ ރިޕޯޓާއި އަހަރީ ހިސާބު، މި ގަވާއިދުގެ 15.02 ވަނަ މާއްދާގެ (ރ) ގައިވާ ގޮތުގެ މަތީން ތައްޔާރުކޮށްފައި އެ ފަންޑެއްގެ ބައިވެރިންނަށް ފެންނަގޮތަށް އާންމުކުރަންވާނެއެވެ.

(ރ) ފަންޑު ހުޅުވުމަށް ހުށަހަޅަންޖެހޭ "ފަންޑް ސްޓޭޓްމަންޓް" މިނިސްޓްރީން އަންގާ ގޮތެއްގެ މަތީން ތައްޔާރުކޮށްފައި ފޮނުވަންވާނެއެވެ.