"ދައުލަތުގެ މާލިއްޔަތުގެ ގަވާއިދު" ބާބު 13 - 13.07 ޓްރަސްޓް އެކައުންޓް ހުޅުވުން

މި ލިއުމުގައި މި ހިމަނާލަނީ، "ދައުލަތުގެ މާލިއްޔަތުގެ ގަވާއިދު"ގެ ބާބު ތަކާއި މާއްދާތައް ވަކިވަކިންނެވެ.

އެގޮތުން މި ލިއުމުގައި މި ގެނެސްދެނީ ބާބު 13 "ޕަބްލިކް ފަންޑްތައް ބެލެހެއްޓުން" އާއި ޕްރޮކިއުމަންޓް ނިޒާމުން ހާސިލުކުރުމަށް ބޭނުންވާ ކަންތައްތަކާއި އުސޫލުތަކާއި ގުޅޭ މާއްދާތަކެވެ.

ޓްރަސްޓް އެކައުންޓް ހުޅުވުން

13.07

(ހ) ދައުލަތުގެ އޮފީހަކުން ޓްރަސްޓް އެކައުންޓެއް ހުޅުވުމަށް ބޭނުންވެއްޖެނަމަ، އެ އޮފީހެއްގެ މާލީ ޒިންމާދާރު ވެރިޔާ، ޑްރާފްޓް ޓްރަސްޓް ސްޓޭޓްމަންޓެއް ތައްޔާރުކުރުމަށްފަހު، މިނިސްޓްރީއަށް އެ ސްޓޭޓްމަންޓް ހުށަހަޅަންވާނެއެވެ. ޑްރާފްޓް ސްޓޭޓްމަންޓް ޞައްޙަތޯ، އެކައުންޓަންޓް ޖެނެރަލް ބެލުމަށްފަހު، މިނިސްޓަރަށް އެ ސްޓޭޓްމަންޓް ހުށަހަޅަންވާނެއެވެ.

(ށ) މި މާއްދާގެ (ހ) ގައިވާ ގޮތުގެ މަތީން މިނިސްޓަރަށް ހުށަހަޅާ ޓްރަސްޓް ސްޓޭޓްމަންޓް ތައްޔާރުކުރާނީ، މިނިސްޓްރީން އަންގާ ގޮތެއްގެ މަތީންނެވެ.

(ނ) ޓްރަސްޓް ސްޓޭޓްމަންޓުގައި ޓްރަސްޓް އެކައުންޓް ހުޅުވުމާއި ޓްރަސްޓް ފަންޑް ޤާއިމުކުރުމުގެ ހުއްދަ ދީފައި ސޮއިކުރާނީ މިނިސްޓަރެވެ. ހުއްދަދޭ ލިޔުމުގެ 3 (ތިނެއް) ކޮޕީގައި މިނިސްޓަރު ސޮއިކުރަންވާނެއެވެ. މީގެ ތެރެއިން 1 (އެކެއް) ކޮޕީ، އެ އޮފީހެއްގެ މާލީ ޒިންމާދާރު ވެރިޔާއާ ހަވާލުކުރަންވާނެއެވެ. 2 ވަނަ ކޮޕީ ފޮނުވާނީ، އޮޑިޓަރ ޖެނެރަލަށެވެ. 3 ވަނަ ކޮޕީ އޮންނަންވާނީ، މިނިސްޓްރީގައެވެ.

(ރ) ޓްރަސްޓް ސްޓޭޓްމަންޓުގައި އިޤްރާރުވެފައިވާ ގޮތަށާއި، ޓްރަސްޓް ފަންޑުގެ އެންމެހައި މުޢާމަލާތްތައް މި ގަވާއިދާ އެއްގޮތަށް ބަލަހައްޓަމުން ނުގެންދާކަމަށް މިނިސްޓަރަށް ފެނިއްޖެނަމަ، ތިރީގައިމިވާ ގޮތުގެ މަތީން ޢަމަލުކުރެވިދާނެއެވެ.

(1) ޓްރަސްޓް ސްޓޭޓްމަންޓް އިޞްލާޙުކޮށް، އަދި ޓްރަސްޓް އެކައުންޓުގެ އެޑްމިނިސްޓްރޭޓަރ، ޓްރަސްޓް ފަންޑް ހިންގުމުގެ މަސްއޫލިއްޔަތުން ވަކިކޮށް، ނުވަތަ މައްސަލަ ތަޙުޤީޤުކޮށް ވަކި ގޮތެއް ނިންމެންދެން އެކަހެރިކުރުމަށްފަހު، އެޑްމިނިސްޓްރޭޓަރުގެ ވާޖިބު އަދާކުރުމަށް އެހެން މުވައްޒަފަކު އައްޔަނުކުރުން؛

(2) އެކައުންޓު ހިންގި ގޮތް ތަޙުޤީޤުކުރުން؛

(3) ތަޙުޤީޤުގެ ހޯދުންތަކަށް ބަލާއިރު އެކަހެރިކުރި އެޑްމިނިސްޓްރޭޓަރ ޒިންމާވާންޖެހޭ ކަމެއް ނެތްނަމަ، އެޑްމިނިސްޓްރޭޓަރ އަނބުރާ އެ މަޤާމަށް އިޢާދަކުރުން؛

(4) ތަޙުޤީޤުގެ ހޯދުންތަކަށް ބެލުމަށްފަހު އެކައުންޓު ބެލެހެއްޓުމަށް އިޞްލާޙީ ފިޔަވަޅެއް އަޅަންޖެހޭނަމަ، އެ ފިޔަވަޅެއް އެޅުމާއި، އެކައުންޓު ބަންދުކުރަންޖެހޭކަމަށް ފެނިއްޖެނަމަ، އެކައުންޓު ބަންދުކުރުން.