ރަމަޟާންމަހާ ދިމާކޮށް ކޮންމެ ގޭބީސީއަކަށް ދޫކުރާ މަސްދަޅު ކޭސް މާލެ ސަރަހައްދުގައި ބަހަން ފަށައިފި

ކުރިއަށްއޮތް ރަމަޟާންމަހާ ދިމާކޮށް ކޮންމެ ގޭބީސީއަކަށް ދޫކުރާ މަސްދަޅު ކޭސް މާލެ ސަރަހައްދުގައި ބަހަން ފަށައިފިއެވެ.

މިއީ ސަރުކާރަށް އެއް އަހަރު ފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިޢުލާންކުރެއްވި ކަމެކެވެ.

މަސްދަޅު ކޭސް ދޫކުރުން ކުރިއަށްދާނީ ކޮންމެ ރެޔަކު 8:00 އިން 11:00 އަށެވެ. މި ތަކެތި ދޫކުރަނީ ޓޯކަން ނަމްބަރުތަކަށް ކަމަށްވާއިރު، ކޮންމެ ރެޔަކު 300 ޓޯކަންއަށް މަސްދަޅުކޭސް ދޫކުރާނެއެވެ. މިހާތަނަށް 4805 ގޭބިސީން ޕޯޓަލް މެދުވެރިކޮށް ޓޯކަން ނަގާފައިވެއެވެ.

މާލޭގައި މަސްދަޅުކޭސް ބަހަމުންދަނީ މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑު ގައެވެ. ހުޅުމާލެ ފޭސް 1 ގައި ޢުމަރުޒާހިރު ބިލްޑިން، ޕޮލްކޯ ޓަވަރ އަދި މުހައްމަދު ޤާސިމް ޕްރީސްކޫލް އިން ދޫކުރާއިރު، ފޭސް 2 ގައި ކާމިލުދީދީ ސްކޫލް، ހިޔާޓަވަރު 10 އަދި އެމްޕީއެލް ޓަވަރު ޕީ އިން މަސްދަޅު ކޭސް ލިބޭނެއެވެ. ވިލިމާލޭގައި މި ތަކެތި ދޫކުރަނީ ވެމްކޯ ސައިޓުންނެވެ.

ރަމަޟާންމަސް ފެށުމުގެ ކުރިން މާލެއާއި އަތޮޅުތެރޭގެ ހުރިހާ ގޭބިސީއަކަށް މަސްދަޅުކޭސް ބަހާ ނިންމާލާނެ ކަމަށް ސަރުކާރުން ބުނެއެވެ. އަދި މި ހަފުތާ ނިމުމުގެ ކުރިން ހުރިހާ އަތޮޅަކަށް މަސްދަޅު ކޭސް ފޮނުވާނެކަމަށް ސަރުކާރުން ވަނީ ހާމަކުރައްވާފައެވެ. ރޯދަމަހަށް ޚާއްޞަކޮށްގެން ކޮންމެ ގޭބިސީއަކަށް ބަހަނީ 48 ދަޅުގެ މަސްދަޅު ކޭހެކެވެ.