އަލުން ޙަރަކާތްތެރިވުމަށް އެދޭ ކުންފުނިތަކުން ރީއެކްޓިވޭޝަނަށް އެދި ހުށަހެޅުމަށް ބާކީ 19 ދުވަސް!

ހަރަކާކްތެރިނުވާ ކުންފުންޏެއްގެ ގޮތުގައި ކަނޑައަޅާފައިވާ ކުންފުނިތަކުގެ ތެރެއިން އަލުން ޙަރަކާތްތެރިވުމާއި ހިންގުމަށް އެދޭ ކުންފުނިތަކަށް ހުޅުވާލި މުއްދަތު ހަމަވާން ދެން ބާކީ އޮތީ 19 ދުވަހެވެ.

ޤާނޫނު ނަންބަރު 96/10 (ދިވެހިރާއްޖޭގެ ކުންފުންޏާބެހޭ ޤާނޫނު) ގެ 75 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން އުވާލުމަށް ރަޖިސްޓްރާރ ކަނޑައަޅައިފައިވާ ކުންފުނިތަކާ ގުޅޭގޮތުން ޢަމަލުކުރާނެ އިޖުރާތުތައް ބަޔާންކުރުމުގެ ގަވާއިދުގެ ދަށުން، އުވާލުމަށް ކަނޑައަޅާފައިވާ ކުންފުނިތަކުގެ ލިސްޓް އާންމުކުރީ 30 ސެޕްޓެންބަރު 2025 ގައެވެ.

މި ލިސްޓު ރަޖިސްޓްރާރގެ ގެޒެޓު އާއި މިނިސްޓްރީގެ ވެބްސައިޓް https://trade.gov.mv ގައި ޝާއިޢުކުރެވިފައިވާނެއެވެ.

އުވާލުމަށް ރަޖިސްޓްރާރ ކަނޑައަޅުއްވާއިފައިވާ ކުންފުނިތަކުގެ ލިސްޓުގައި ހިމެނޭ އެއްވެސް ކުންފުންޏަކުން އަލުން ޙަރަކާތްތެރިވުމަށް ނުވަތަ ހިންގުމަށް އެދޭ ނަމަ 30 ޑިސެމްބަރު 2025 ގެ 14:00 ގެ ކުރިން، ކުންފުނި ހިންގަން ބޭނުންވާކަން އަންގައިދިނުމަށް ކުންފުނީގެ ޑިރެކްޓަރުންގެ ބޯޑުން ފާސްކޮށްފައިވާ ޤަރާރު މިނިސްޓްރީގެ ބިޒްނަސް ޕޯޓަލް https://business.egov.mv މެދުވެރިކޮށް ހުށަހަޅުއްވަންވާނެއެވެ.

މިގޮތުން ހުށަހަޅާ ކުންފުނިތައް އަލުން ޙަރަކާކްތެރިވުމަށް ފުރުސަތުދެވޭނީ، ކުންފުނިތަކުން، ގަވާއިދު ނަންބަރު 2025/R-83 "ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާބެހޭ ޤާނޫނު) ގެ 75 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން އުވާލުމަށް ރަޖިސްޓަރާރ ކަނޑައަޅައިފައިވާ ކުންފުނިތަކާ ގުޅޭގޮތުން ޢަމަލުކުރާނެ އިޖުރާތުތައް ބަޔާންކުރުމުގެ ގަވާއިދު" ގެ 7 ވަނަ މާއްދާގެ (ހ) ގައި ބަޔާންކޮށްފައިވާ ކަންތައްތައް ފުރިހަމަކުރުމުމަށްފަހު ތިރީގައިވާ ލިޔުންތަކާއެކު މިނިސްޓްރީއަށް ހުށަހެޅުމުންނެވެ.

·      ކުންފުނި ހިންގަން ބޭނުންވާކަން އަންގައިދިނުމަށް ކުންފުނީގެ ޑިރެކްޓަރުންގެ ބޯޑުން ފާސްކޮށްފައިވާ ޤަރާރު

·      2023 ޑިސެންބަރު 31 އާ ހަމަޔަށް ކުންފުނިން ދައްކަންޖެހޭ އަހަރީފީއާއި ޖޫރިމަނާ ނުދައްކާއޮތް ކުންފުންޏެއްނަމަ، އެ ފައިސާ ޚަލާސްކުރުމަށްފަހު، މޯލްޑިވްސް އިންލޭންޑް ރެވެނިއު އޮތޯރިޓީން ދޫކޮށްފައިވާ ރަސީދު

·      އަހަރީ ހިސާބުތަކާއި، ޑިރެކްޓަރުންގެ އަހަރީ ރިޕޯޓާއި، އޮޑިޓަރުގެ ރިޕޯޓު

·      އަހަރީ ހިސާބުތަކާއި ޑިރެކްޓަރުންގެ އަހަރީ ރިޕޯޓާއި އޮޑިޓަރުގެ ރިޕޯޓު ހުށަނޭޅުމުގެ ސަބަބުން ޖޫރިމަނާ ދައްކަން ޖެހޭ ކުންފުންޏެއްނަމަ، ޖޫރިމަނާ ފައިސާ ޚަލާސްކުރިކަން އެނގޭނެ ރަސީދު

އަދި، މި ލިސްޓުގައި ހިމެނޭ ކުންފުންޏެއްގެ މައްޗަށް އެއްވެސް ދަރަންޏެއް ނުވަތަ ދަޢުވާއެއް އޮތްނަމަ ގަވާއިދު ނަންބަރު 2025/R-83 "ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާބެހޭ ޤާނޫން) ގެ 75 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން އުވާލުމަށް ރަޖިސްޓަރާރ ކަނޑައަޅައިފައިވާ ކުންފުނިތަކާ ގުޅޭގޮތުން ޢަމަލުކުރާނެ އިޖުރާތުތައް ބަޔާންކުރުމުގެ ގަވާއިދު" ގެ 5 ވަނަ މާއްދާގެ (ށ) ގައި ބަޔާންކޮށްފައިވާ އަންނަނިވި ލިޔެކިޔުން 30 ޑިސެމްބަރު 2025 ގެ 14:00 ގެ ކުރިން މިނިސްޓްރީގެ ބިޒްނަސް ޕޯޓަލް https://business.egov.mvމެދުވެރިކޮށް ހުށަހެޅުއްވުމަށް އިޢުލާނުގައި ބުނެފައިވެއެވެ.

·      ދަރަނި ނުވަތަ ދަޢުވާގެ ތަފުސީލު ހިމެނޭ ލިޔުން.

·      ދަރަނި ނުވަތަ ދަޢުވާއާ ގުޅޭގޮތުން ކޯޓުން ނިންމުމެއް ނިންމައިފައިވާ ނަމަ، އެ ނިންމުން.

·      ދަރަނި ނުވަތަ ދަޢުވާ ސާބިތުކުރުމަށް ހުށަހަޅާ އެހެނިހެން ލިޔުން.

ވީމާ، މަތީގައި ބަޔާންކޮށްފައިވާ ފަދައިން އަލުން ހަރަކާތްތެރި ވުމަށް ބޭނުންވާ ޙަރަކާކްތެރިނުވާ ކުންފުނިކަމުގައި ކަނޑައަޅައި އުވާލުމަށް ރަޖިސްޓްރާރ އިޢުލާން ކޮށްފައިވާ ކުންފުނިތަކުގެ ތެރެއިން އަލުން ޙަރަކާތްތެރިވުމަށް ނުވަތަ ހިންގުމަށް ބޭނުންވާ ކުންފުނި ތަކުން މިނިސްޓްރީގެ ބިޒްނަސް ޕޯޓަލް މެދުވެރިކޮށް ރެޖިސްޓްރާރ އަށް ހުށަހެޅުއްވަންވާނެއެވެ. 

އަދި 30 ޑިސެމްބަރު 2025 ގެ 14:00 ގެ ނިޔަލަށް، އަލުން ޙަރަކާތްތެރިވުމަށް އެދި ހުށަހަޅާފައިނުވާ ކުންފުނިތަކާއި އަދި ކުންފުންޏެއްގެ މައްޗަށް އެއްވެސް ދަރަންޏެއް ނުވަތަ ދަޢުވާއެއް އޮތްކަން ބަޔާންކޮށް އެ މުއްދަތުގެ ނިޔަލަށް ހުށަހަޅާފައިނުވާ ކުންފުނިތައް، ޤާނޫނު ނަންބަރު 2023/7 (ކުންފުނީގެ ޤާނޫނު) ގެ 246 ވަނަ މާއްދާގެ (ބ) ގައި ބަޔާންކުރާ ގޮތުގެމަތިން ކުންފުނި އުވާލުމަށް ކަނޑައަޅާފައިވާ އިޖްރާއާތު ފުރިހަމަކުރުމަށްފަހު ރަޖިސްޓްރާރ ކުންފުނި އުވާލައި، ކުންފުންޏާއި ބެހޭ ޤާނޫނުގައި ބަޔާންކުރާ ގޮތުގެމަތިން ކުންފުނީގެ ނަން ދަފްރަތުން އުނިކުރެވޭނެ އެވެ.

މިކަމާ ގުޅޭ އިތުރު މަޢުލޫމާތު އޮޅުންފިލުވުމަށް، މިނިސްޓްރީގެ ހޮޓްލައިން 1500 އަށް ގުޅުއްވުމަށް ނުވަތަ [email protected] އަށް އީމެއިލް ކުރެއްވުމަށް ދަންނަވަމެވެ.