ދިވެހި ތަރިކައިގެ "ސިގްނެޗަރ ރިސަރޗް ސްކޮލަރޝިޕް" ހަވާލުކުރުމުގެ ރަސްމިއްޔާތު ބާއްވައިފި

ދިވެހި ތަރިކައާއި ދިވެހިވަންތަކަމުގެ ދާއިރާ ޢިލްމީ ގޮތުން ކުރިއެރުވުމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ތަރިކަ ދިރާސާކުރާ ޤައުމީ މަރުކަޒުން ހުޅުވާލި "ސިގްނެޗަރ ރިސަރޗް ސްކޮލަރޝިޕް" އަށް ހޮވުނު ފަރާތްތަކަށް ސްކޮލަރޝިޕް ހަވާލު ކުރުމުގެ ރަސްމިއްޔާތު ބާއްވައިފިއެވެ.

ދިވެހިރާއްޖޭގެ އިސްލާމީ ޔުނިވަރސިޓީގެ ޖަލްސާކުރާ މާލަމުގައި މިއަދު ހެނދުނު ކުރިއަށްދިޔަ މި ރަސްމިއްޔާތު ޝަރަފުވެރިކޮށްދެއްވައި ސްކޮލަރޝިޕް ލިބިވަޑައިގެންނެވި ފަރާތްތަކާ ސްކޮލަރޝިޕް ޙަވާލުކޮށްދެއްވީ، ޢިއްޒަތްތެރި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ. އަނބިކަނބަލުން ފަސްޓް ލޭޑީ މެޑަލް ސާޖިދާ މުޙައްމަދު އެވެ.

ދިވެހިރާއްޖޭގެ އިސްލާމީ ޔުނިވަރސިޓީގެ މާސްޓަރސް އިން ރިސަރޗް އެންޑް ޕަބްލިކޭޝަން ހާސިލުކުރެވޭ ގޮތަށް ހިންގާ މި ސްކޮލަރޝިޕް ޕްރޮގްރާމަކީ، ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރެއްވި ދިވެހި ޤައުމިއްޔަތު އިޔާދަކުރުމުގެ ޤައުމީ މަޝްރޫޢުގެ ވަޢުދުފުޅުގެ ތެރެއިން ދިވެހި ތަރިކައިގެ ދާއިރާ ޢިލްމީކޮށް ފުންކޮށް ދިރާސާ ކުރުމަށްޓަކައި ހިންގޭ ޕްރޮގްރާމެކެވެ.

މި ސްކޮލަރޝިޕަށް ހުޅުވާލި ފުރުޞަތުގައި ކުރިމަތިލެއްވި 62 ބޭފުޅުންގެ ތެރެއިން 40 ފަރާތަކަށް މި ރަސްމިއްޔާތުގައި ވަނީ ސްކޮލަރޝިޕް ހަވާލުކޮށްދެއްވާފައެވެ. ދެ އަހަރު ދުވަހުގެ މުއްދަތަކަށް ކުރިއަށްގެންދާ މި ޕްރޮގްރާމްގެ ދަށުން ކޮންމެ ބައިވެރިއަކުވެސް ދިވެހި ތަރިކަ ދިރާސާކުރާ ޤައުމީ މަރުކަޒުން ދޭ ޚާއްޞަ ދާއިރާތަކުން ދިރާސާ ކުރުމަށް ވަނީ ހަމަޖެހިފައެވެ. އަދި ކޮންމެ ބައިވެރިއަކު ކުރައްވާ މަސައްކަތްތައް އާންމުންނަށް ފެންނާނޭހެން އެކިއެކި މަންސުތަކުގައި ޝާއިޢުކުރުމުގެ އިތުރުން، މި ޕްރޮގްރާމް މެދުވެރިކޮށް ދިވެހި ތަރިކައިގެ އާ ގިނަ މަޢުލޫމާތުތަކެއް އެއްކޮށް ޢިލްމީ މަސައްކަތްތަތަކާއި ޢިލްމީ އަސާސްތަކާއި އެއްގޮތަށް އާންމުކުރެވޭނެއެވެ.

މި ރަސްމިއްޔާތުގައި ޝަރަފުވެރި މެހެމާނުގެ އިތުރުން ދިވެހިބަހާއި ސަގާފަތާއި ތަރިކައާ ބެހޭ ވަޒީރު، އާދަމް ނަޞީރު އިބްރާހީމާއި ދިވެހިރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލި ޒާހިރު ބިން ސަޢީދު ޤާސިމްއާއި ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ސްޓޭޓް މިނިސްޓަރުންނާއި ޚާއްޞަ މުޝީރުންނާއި ނިޝާން ދިޔަމިގިލީގެ ޝަރަފުގެ ޢިއްޒަތްތެރި ވެރިޔާ އުތީމު އާދަމް ޢަބްދުއްރަޙްމާނުގެ އިތުރުން ދިވެހި ޤައުމިއްޔަތުގެ އިސްވަރުގެ އިސްވާރުންނާއި ދިވެހިތަރިކައިގެ ސިގްނެޗަރ ރިސާރޗް ސްކޮލަރޝިޕަށް ހޮވިވަޑައިގެންފައިވާ ބޭފުޅުން ބައިވެރިވެ ވަޑައިގެންނެވިއެވެ.