ސްޓޭޓް މިނިސްޓަރ ޑރ. ޢަބްދުﷲ ނިޔާޒް، ގްލޯބަލް ޓޫރިޒަމް ފޯރަމްގައި ދެމެހެއްޓެނިވި ފަތުރުވެރިކަމަށް ވަކާލާތު ކުރައްވައިފި

މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓްގެ ސްޓޭޓް މިނިސްޓަރު ޑރ. ޢަބްދުﷲ ނިޔާޒް، 2025 ވަނަ އަހަރުގެ ގްލޯބަލް ޓޫރިޒަމް ފޯރަމްގައި ބައިވެރިވެވަޑައިގެންނެވުމަށް، ބެލްޖިއަމްގެ ބްރަސަލްސްއަށް ވަޑައިގެންފިއެވެ. މި ފޯރަމްގައި، "އާ ފަތުރުވެރިކަމުގެ އިޤްތިޞާދަކަށް ބައިނަލްއަޤްވާމީ ލީޑަރޝިޕް" މި ނަމުގައި ކުރިއަށްގެންދެވުނު ޕެނަލް ޑިސްކަޝަނެއްގައި ޑރ. ނިޔާޒް ވަނީ ބައިވެރިވެވަޑައިގެންފައެވެ.

ޑިސްކަޝަންގައި ވާހަކަފުޅު ދައްކަވަމުން، ޑރ. ނިޔާޒް ވަނީ ދިވެހިރާއްޖޭގެ ފަތުރުވެރިކަމުގެ އެންމެ މުހިންމު ބަޔަކީ ދެމެހެއްޓެނިވި ތަރައްޤީކަން ފާހަގަކުރައްވާފައެވެ. އަދި މިކަން ހާސިލްކުރުމަށްޓަކައި، ރާއްޖެއިން ވަރުގަދަ ސިޔާސަތުތައް އެކުލަވާލައި، އެއްބައިވެފައިވާ އިދާރީ ނިޒާމެއްގެ ދަށުން މިކަން ކުރިއަށް ގެންދާކަން އެމަނިކުފާނު ވަނީ ފާހަގަކުރައްވާފައެވެ. މިގޮތުން، ދިވެހިރާއްޖޭގެ ފަތުރުވެރިކަމަކީ ތިމާވެއްޓަށް ރައްކާތެރިވެ، ދެމެހެއްޓެނިވި ގޮތެއްގައި ކުރިއަށްދާނެ ދާއިރާއެއްކަން އެމަނިކުފާނުގެ ވާހަކަފުޅުގައި ވަނީ ބަޔާންކުރައްވާފައެވެ.