ވަޢުދާ އެއްގޮތަށް ނޮޅިވަރަންފަރުގައި ފީފާ ސްޓޭންޑަޑް ދަނޑުގެ މަސައްކަތް ކުރިއަށްދާނެ!

ހދ. ނޮޅިވަރަންފަރުގައި ޤާއިމްކޮށްދެއްވާނެކަމަށް ވަޢުދުވެވަޑައިގެންނެވި ފީފާ ސްޓޭންޑާޑްގެ ފުޓްބޯޅަ ސްޓޭޑިއަމްގެ މަސައްކަތް ބާރު ސްޕީޑްގައި ކުރިއަށްގެންދަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ ހދ. އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ނޮޅިވަރަންފަރަށް ވަޑައިގެން ދެއްކެވި ވާހަކަފުޅުގައެވެ.

ރައީސް ވިދާޅުވީ މި ރަށުގައި ކުޅިވަރުގެ ދާއިރާއިން ކުރިއަށްދާ އެންމެ މުހިންމު ދެ މަޝްރޫޢުއަކީ ފީފާ ސްޓޭންޑާޑްގެ ފުޓްބޯޅަ ސްޓޭޑިއަމް އާއި ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްކަމަށެވެ. މި ދެ މަޝްރޫޢުވެސް ވެގެންދާނީ ވަރަށް ފުރިހަމަ ގޮތެއްގައި، ކުޅިވަރު ތަރައްގީކުރުމުގަ ބޮޑެތި ކާމިޔާބުތައް ހޯދުމުގަ ވަރަށް ބޮޑު ދޮރެށް ހުޅުވިގެންދާކަަމަކަށް ރައީސް ވިދާޅުވި އެވެ.

"އަޅުގަނޑުގެ ވައުދުތައް އެއީ ފީފާ ސްޓޭންޑާޑްގެ ފުޓުބޯޅަ ސްޓޭޑިއަމްއެއް ހަދައިދިނުން އަދި ސްޕޯޓްސް ކޮމްޕްލެކްސްއެއް އެޅުން. މި ދެ ކަންތައް ވެގެންދިއައިމަ ހަގީގަތުގަ އެ ވެގެންދާނީ ވަރަށް ފުރިހަމަ ގޮތެއްގަ ކުޅިވަރު ތަރައްގީކުރުމުގަ ވަރަށް ވަަަރަށް ބޮޑެތި ކާމިޔާބުތައް ހޯދުމުގަ ވަރަށް ބޮޑު ދޮރެށް ހުޅުވިގެންދާކަަމަކަށް. ފުޓުބޯޅައިގެ ދާއިރާއިންނާއި އަދި ޖުމްލަކޮށް ހަމަ ވަރަށް ގިނަ އިންޑޯ ކުޅިވަރުތައް ކުޅެވޭގޮތަށް މިކަން މި ހަމަޖެހިގެންދަނީ." ރައީސް ވިދާޅުވިއެވެ.

ރައީސް ވިދާޅުވީ މި ދެ މަޝްރޫއުގެ އިތުރުން ވޮލީބޯޅަ ކޯޓެއްވެސް މި ރަށުގައި އަޅައިދިނުމަށް މަސައްކަތްކޮށްދެއްވާނެކަމަށެވެ.