"ނެއްލައިދޫ ދަނޑުގައި ލައިޓް ހަރުކޮށް، އާ ފުޓްސަލް ދަނޑެއް އަޅައިދޭނަން"
ނެއްލައިދޫ ފުޓްބޯޅަ ދަނޑުގެ ލައިޓް ހަރުކޮށް، ހޭންޑްބޯޅަ އާއި ފުޓްސަލް ކުޅެވޭނެ ދަނޑެއްވެސް އެ ރަށުގައި ޤާއިމްކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ހދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ނެއްލައިދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ނެއްލައިދޫގެ ރައްޔިތުންނާ ބައްދަލުކުރެއްވުމުގެ ކުރިން އެ ރަށުގައި ޤާއިމްކުރާ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ ވަނީ އަޅާފައެވެ. ރައީސް ވިދާޅުވީ ފިޓްނަސް އެންޑް ރެކްރިއޭޝަން ސެންޓަރާ ހިސާބުން މިރަށަށް ކޮށްދެއްވަން ނިންމާފައިވާ ކުޅިވަރުގެ ކަންކަން ނުނިންމަވާނެކަމަށެވެ.
މިގޮތުން މި ރަށުގައި މިވަގުތު އޮތް ފުޓްބޯޅަ ދަނޑުގައި ރޭގަނޑު ކުޅެވޭނެ އިންތިޒާމްތައް ހަމަޖައްސައި އެ މަސައްކަތް މި އަހަރުގެ ކުރިން ނިންމާލެވޭތޯ މަސައްކަތްކޮށްދެއްވާނެކަމަށެވެ. ސަރުކާރުގެ ސިޔާސަތަކީ ކުޅިވަރު ދަނޑުތަކަކީ ރޭގަނޑުވެސް ބޭނުން ހިފޭނެ ތަންތަނަށް ހެދުންކަމަށެވެ.
މީގެ އިތުރުން މުޅިން އަލަށް ފަށާ މަޝްރޫޢުއެއްގެ ގޮތުގައި ފުޓްސަލް ދަނޑެއް ޤާއިމްކޮށްދެއްވާނެކަމަށް ރައީސް ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ އާ ފުޓްސަލް ދަނޑަކީ ފުޓްސަލް އަދި ހޭންޑްބޯޅަވެސް ކުޅެވޭނެ ގޮތަށް ފުރިހަމަކޮށް ތައްޔާރުކުރާނެ ދަނޑެއްކަމަށެވެ.
"އަޅުގަނޑުމެން އިރާދަކުރެއްވިއްޔާ މި ރަށުގަ މި އަންނަ އަހަރަށް ބަޖެޓު ހަދާއިރުގަ ހިމަނާނަން ފުޓްސަލް ދަނޑަކާއި، ފުޓްސަލްއާ ހޭންޑްބޯޅައާ ދެ ކުޅިވަރު ކުޅެވޭވަރުގެ ފުރިހަމަ ދަނޑެއް އެޅުން. މި ދެންނެވިހެން ދަނޑުހަދާއިރުގަ އަޅުގަނޑުމެން ހަދަނީ އަބަދުވެސް ފެންސް ޖަހާ ލައިޓްހަރުކޮށްފައި" ރައީސް ވިދާޅުވި އެވެ.
ރައީސް މުޢިއްޒު ވިދާޅުވީ މި ދަނޑުގެ މަސައްކަތް މިއަހަރުގެ ފަހުކޮޅު ނުވަތަ އަންނަ އަހަރުގެ ފުރަތަމަ މަހުގެ ތެރޭގައި ފެށުމަށް މަސައްކަތްކޮށްދެއްވާނެކަމަށެވެ.