logo
banner image

"ނޭކުރެންދޫ ދަނޑުގެ ލައިޓް ހަރުކޮށް ފުރިހަމަކޮށްދޭނަން"

ހދ. ނޭކުރެންދޫ ފުޓްބޯޅަ ދަނޑުގެ ވަށާފާރު ރާނާ، ލައިޓް ހަރުކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ހދ. އަތޮޅުގެ ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން ނޭކުރެންދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވީ ނޭކުރެންދޫ ދަނޑުގައި ޓާފް އަޅާ ނިމިފައިވާއިރު، ދެން އޮތީ ލައިޓް ޖެހުމުގެ މަސައްކަތްކަމަށެވެ. މިގޮތުން ވަށާފާރު ރާނައި، ފެންސް ޖަހައި ލައިޓް ހަރުކުރުމުގެ މަސައްކަތްވެސް ވަރަށް އަވަހަސް ކުރިއަށްގެންދަވާނެކަމަށް ވިދާޅުވިއެވެ. ރައީސް ވިދާޅުވީ މި މަސައްކަތްތަކުގެ އިތުރުން ޗޭންޖިން ރޫމްވެސް ހިމަނައިގެން ދަނޑުގެ މަސައްކަތްތައް ފުރިހަމަ ކުރައްވާނެކަމަށެވެ.

"ފުޓްބޯޅަ ދަނޑުގައި، މިހާރުވަނީ ޓާރފް އެޅިފަ، ނަމަވެސް ރޭގަނޑު ކުޅެވޭގޮތައް ލައިޓެއް ނެތް. އަދި ފެންސްޖަހާ ރައްކާތެރިކޮށް ވަށާފާރު ރޭނިފައެއްވެސް ނެތް. މިވެސް ކުރަން ނިންމާފަ ހުރި ކަންތައްތަކެއް. އިރާދަކުރެއްވިޔާ ފުޓްބޯޅަ ދަނޑުގަ އަޅުގަނޑުމެން ވަށާފާރު ރާނާ، ލައިޓް ހަރުކޮށް، ކޮންމެސްވަރަކަށް ޗޭންޖިން ރޫމް ހިމަނައިން އެކަން ކޮށްދޭނަން." ރައީސް މުޢިއްޒު ވިދާޅުވިއެވެ.

މި ރަށުގައި ޤާއިމްކުރަން ނިންމާފައިވާ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތް ކުރިއަށްދަނީ އެމްއޭސީއެލްއާ ހަވާލުކޮށްގެންނެވެ.

މިކަމަށް އިޝާރާތްކުރައްވާ ރައީސުލްޖުމްހޫރިއްޔާ ވިދާޅުވީ އެފްއާރުސީ އަކީ އިންޑޯ ގިނަ ކުޅިވަރުތަކެއްވެސް ކުޅެވޭނެ އިންތިޒާމްތަކާއިއެކު ކަސްރަތު ކުލަސްތައްވެސް ހިންގޭނެ ވަސީލަތްތަކާއިއެކު ޤާއިމްކުރެވިގެންދާނެ ތަނެއްކަމަށެވެ. ނޭކުރެންދޫގައި ބެޑްމިންޓަނަށް ޝައުގުވެރިވާ ގިނަ ބަޔަކުތިބިކަން ފާހަގަކުރައްވާ ރައީސް ވިދާޅުވީ އެފްއާރުސީއާއިއެކު ބެޑްމިންޓަން ކުޅެވޭނެ ސައިޒުގެ އިންޑޯ ހޯލެއްވެސް މި މަޝްރޫޢުގެ ތެރެއިން ޤާއިމްކޮށްދެއްވާނެކަމަށެވެ.