ހަނިމާދޫގައި އެފްއާރުސީ ޤާއިމްކޮށް، އަންނަ އަހަރު ވޮލީބޯޅަ ކޯޓެއްވެސް އަޅަނީ!

ހަނިމާދޫގައި ފިޓްނަސް އެންޑް ރެކްރިއޭޝަން ސެންޓަރެއްގެ އިތުރުން އައުޓްޑޯ ވޮލީބޯޅަ ކޯޓެއްވެސް އެޅުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ހދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ. ހަނިމާދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ޑރ. މުޙައްމަދު މުޢިއްޒުވަނީ ސަރުކާރުން އެ ރަށުގައި ކުރިއަށްގެންދަވާ މަޝްރޫޢުތަކުގެ މަޢުލޫމާތު ހިއްސާކުރައްވާފައެވެ.

ރައީސް ވިދާޅުވީ ހަނިމާދޫގައި ކުޅިވަރުގެ ދާއިރާއިން މި އަހަރު ކުރެވޭ އެންމެ ބޮޑު އެއް މަސައްކަތަކީ އެ ރަށުގައި ޤާއިމްކުރާ ފިޓްނަސް އެންޑް ރެކްރިއޭޝަން ސެންޓަރު (އެފްއާރުސީ)ގެ މަސައްކަތެވެ. މި ގޮތުން މި މަސައްކަތް ފަށައި އަންނަ އަހަރުގެ ތެރޭގައި ފިޓްނަސް އެންޑް ރެކްރިއޭޝަން ނިންމުމަކީ ސަރުކާރުގެ އަމާޒުކަމަށެވެ. ރައީސް ވިދާޅުވީ ފިޓްނަސް އެންޑް ރެކްރިއޭޝަން ސެންޓަރު (އެފްއާރުސީ)ތަކަކީ އިންޑޯ ގިނަ ކުޅިވަރުތަކަކާއި، އަންހެން ބޭފުޅުންނަށް ހާއްސަ ކަސްރަތު ކުލާސްތަކާއި ދުޅަހެޔޮ ދިރިއުޅުމަކަށް ބާރު އެޅުމަށް އެހީވާނެ ސެންޓަރުތަކެއްކަމަށެވެ.

"ކުޅިވަރުގެ ދާއިރާއިން އަޅުގަނޑުމެން އެފްއާރްސީގެ މަސައްކަތް މި ފަށަނީ. މިހާރު އަޅުގަނޑުމެން މި ގާއިމުކުރާ މަރުކަޒުތަކަކީ އެތަންތަނުގެ އެތެރޭގައި އިންޑޯ އެތައް ކުޅިވަރުތަކެއް ކުޅެވޭގޮތަށް އަދި އެކިއެކި ފެސިލިޓީސްތަކާއި ގާއިމްވެގެން އެޅިގެންދާ މަރުކަޒުތަކެއް. އިރާދަކުރެއްވިއްޔާ އޭގެ ފަސޭހަވެސް ޒުވާނުންނަށް ލިބިގެންދާނެ. ހާއްސަކޮށް ކުޅިވަރު ކުޅޭ ހުރިހާ ފަރާތްތަކަށް." ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އެފްއާރުސީގެ އިތުރުން ވޮލީބޯޅަ ކޯޓެއްވެސް މި ރަށުގައި ޤާއިމްކުރުމަށް ނިންމާފައިވާކަމަށެވެ. މިގޮތުން އަންނަ އަހަރުގެ ބަޖެޓުގައި ހިމަނައިގެން މި މަސައްކަތްވެސް ކުރިއަށްގެންދަވާނެކަމަށް ވިދާޅުވިއެވެ.