އަންނަ އަހަރު ހދ. ފިނޭގައި ފުޓްސަލް ދަނޑެއް އަޅަނީ!

އަންނަ އަހަރުގެ ބަޖެޓުގައި ހިމަނައިގެން ފުޓްސަލް ދަނޑެއް ފިނޭގައި އަޅައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހދ އަތޮޅުގެ ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން، ހދ. ފިނޭއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގެ ތެރެއިންނެވެ.

ރައީސުލްޖުމްހޫރިއްޔާ ވިދާޅުވީ ރިޔާސީ އިންތިހާބުގައި އެ މަނިކުފާނު ވެވަޑައިގެންނެވި ވަޢުދުތަކުގެ ތެރޭގައި ޒުވާނުންނާ ގުޅުންހުރި މުހިންމު ވަޢުދުތަކެއް ހިމެނޭކަމަށެވެ. އޭގެ ތެރޭގައި އެ ރަށުގައި ފުޓްސަލް ދަނޑެއް އެޅުމަކީ އަންނަ އަހަރު ކުރައްވަން ނިންމަވާފައިވާ ކަމެއްކަމަށެވެ. މިގޮތުން އަންނަ އަހަރުގެ ބަޖެޓުގައި ދަނޑުގެ މަސައްކަތް ހިމަނައިގެން އެ މަސައްކަތް އަންނަ އަހަރު ކުރިއަށްގެންދަވާނެކަމަށެވެ.

"މިއަންނަ އަހަރު ބަޖެޓް އަޅުގަނޑުމެން ހަދާއިރުގަ މިއަންނަ އަހަރަށް އިރާދަކުރެއްވިއްޔާ މިރަށުގަ ފުޓްސަލް ދަނޑުތައް ހުންނަންޖެހޭ މިނުގަ އޮންނަ ހުރިހާކަމެއް ފުރިހަމަވެފާ އޮންނަ ރަނގަޅު ފެންވަރުގެ ފުޓްސަލް ދަނޑެއް އަޅައިދޭން އިރާދަކުރެއްވިއްޔާ އަޅުގަނޑުމެން ހިމަނާނަން. އެ މަޝްރޫއު އިރާދަކުރެއްވިއްޔާ އަންނަ އަހަރު ކުރިއަށް ގެންދާނަން." ރައީސް ވިދާޅުވިއެވެ.

ރައީސް ވިދާޅުވީ މިއަހަރު ފިނޭގައި ކުރިއަށްދާނެ މަޝްރޫޢުތަކުގެ ތެރޭގައި ހިމެނެނީ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްކަމަށެވެ. އެ މަސައްކަތާއިއެކު މިހާރުވެސް އެ ރަށުގައި ކުރިއަށްދާ އައުޓްޑޯ ވޮލީބޯޅަ ކޯޓު ޤާއިމްކުރުމުގެ މަސައްކަތް ނުހުއްޓި ކުރިއަށްދާނެކަމަށެވެ. ވޮލީކޯޓުގެ މަސައްކަތް އެއްވެސް ހުރަހެއް ނެތި ބާރު ސްޕީޑުގައި ކުރިއަށްދާނެކަމަށް ރައީސް ވިދާޅުވިއެވެ.

ރައީސް މުޢިއްޒު ވިދާޅުވީ ފިޓްނަސް އެންޑް ރެކްރިއޭޝަން ސެންޓަރާއި ވޮލީބޯޅަ ކޯޓުގެ އިތުރުން އަންނަ އަހަރުގެ ތެރޭގައި އެ ރަށުގައި އައުޓްޑޯ ޖިމް އެޅުމުގެ މަސައްކަތްވެސް ކުރިއަށްގެންދަވާނެކަމަށެވެ.