"ޢާއިލާ" ޑްރާމާއިން ގިނަ ބަޔެއްގެ ސަމާލުކަން ފޯސްޓަރިންގއަށް

ނޭޝަނަލް ސެންޓަރ ފޮރ ދި އާޓްސްއިން އިންތިޒާމްކޮށްފައިވާ އޮފީސް ޑްރާމާ މުބާރާތް 1446 ގައި މި ވުޒާރާއިން ބައިވެރިކުރި "ޢާއިލާ" ޑްރާމާއަކީ ދައުލަތުގެ ބެލުމުގެ ދަށުގައި ތިބޭ ކުދިން ޢާއިލާތަކާއި ހަވާލުކުރުމާއި އެ މަރުހަލާއާއި ގުޅޭގޮތުން ތައްޔާރުކޮށްފައިވާ ޑްރާމާއެއްކަމަށާއި، މި ޑްރާމާގައި ދައްކުވައިދެނީ ދެމަފިރިއަކު ކުއްޖަކު ފޯސްޓަރ ކުރަން ނިންމާ ހިސާބުން ކުރިއަށްދާ ހުރިހާ މަރުހަލާތައް ކަމުގައި މި ވުޒާރާގެ ޗައިލްޑް ޕްރޮޓެކްޝަން ކޯޑިނޭޓަރ، ފައްޒަ ފުއާދު ވިދާޅުވެއްޖެއެވެ.

ފައްޒަ މިފަދައިން ވިދާޅުވެފައިވަނީ، އޮފީސް ޑްރާމާ މުބާރާތް 1446 ގައި މި ވުޒާރާއިން ބައިވެރިކުރި "ޢާއިލާ" ޑްރާމާއާއި، މި ވުޒާރާއިން ކުރިއަށް ގެންދާ "ކޮންމެ ކުއްޖަކަށް ޢާޢިލާއެއް" ޕްރޮގްރާމާ ގުޅޭގޮތުން ރާއްޖެޓީވީގެ ފަސްކާފު ޕްރޮގްރާމުގައި ވާހަކަ ދައްކަމުންނެވެ. އެގޮތުން، "ކޮންމެ ކުއްޖަކަށް ޢާޢިލާއެއް" ޕްރޮގްރާމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވައުދުފުޅުގެ ތެރެއިން ވަޢުދުފުޅެއްކަމަށާއި، ދައުލަތުގެ ބެލުމުގެ ދަށުގައި ތަފާތު އެކި ސަބަބުތަކާއި ގުޅިގެން ތިބޭ ކުދިންނަށް ޢާއިލީ ވެއްޓެއް ހޯދައިދިނުމަކީ މި ވުޒާރާގެ ވަރަށް މުހިންމު އެއް މަސައްކަތެއްގެ ގޮތުގައި ކުރެވެމުންދާ ކަމެއްކަމުގައި ފައްޒަ ފާހަގަކުރިއެވެ.

މި ޑްރާމާގައި ދައްކުވައިދެނީ ދައުލަތުގެ ބެލުމުގެދަށުގައި ހުރި ކުއްޖަކު ފޯސްޓަރ ކުރެވިގެންދާއިރު މި ވުޒާރާގެ ތެރެއިން ހިނގާ މަރުހަލާތަކާއި އަދި ކުއްޖާ ގެއަށް ގެނައުމަށްފަހު އާއިލީ ވެއްޓަކަށް ރުޖޫއަ ކުރުމުގައި ދިމާވާ އެކި ދަތިތަކާއި، އެ ދަތިތަކުން އެ އާއިލާ އަރައިގަތުމަށް ކުރާ މަސައްކަތްތަކެވެ.

ދައުލަތުގެ ބެލުމުގެދަށުގައި ތިބޭ ކުދިން ފޮސްޓަރ ކުރުމަށް ބަލާއިރު، ދެ ގޮތަކަށް ކުދިންނަށް ޢާއިލީ މާހައުލެއް ދެވެއެވެ. އެތަނުން އެއް ގޮތަކީ އެކުދިންގެ އުފަން ޢާއިލާއަށް އަނބުރާ ދެވޭނެ ގޮތެއް މަގުފަހިކޮށްދިނުމެވެ. ނުވަތަ އަނބުރާ އުފަން ޢާއިލާއަށް ދެވޭނެފަދަ ފުރުސަތެއް ނެތް ކުދިންނަށް އެހެން ޢާއިލާއެއްގެ ތެރެއިން ފޯސްޓަރ ކުރުމުގެ ފުރުސަތު ހޯދައިދިނުމެވެ.

މުބާރާތުން 11 އެވޯޑު މި ޑްރާމާ ހާސިލްކުރުމާއިއެކު، ފޯސްޓަރިންނަށް ގިނަ ބައެއްގެ ސަމާލުކަންލިބި، މިކަމާއި ގުޅިގެން މަޢުލޫމާތު ސާފުކުރުމަށް ވުޒާރާއަށް ގިނަ އަދަދެއްގެ އާންމު ފަރާތްތަކުން ގުޅަމުން ގެންދާކަން ފައްޒަ ފާހަގަކުރިއެވެ. އޭގެ އިތުރުން، ވުޒާރާގެ ފަރާތުން އެކި ރަށްރަށަށް ކުރެވޭ ޒިޔާރަތްތަކުގައި ވެސް ޑްރާމާ ބަލާފައި އެ ޑްރާމާއިން ފޯރުކޮށްދޭން ބޭނުންވި މެސެޖު އެފަރާތްތަކަށް ލިބިފައިވާކަންވެސް ފައްޒަ ފާހަގަކުރިއެވެ.

މި ވުޒާރާގެ "ޢާއިލާ" ޑްރާމާއިން ދައްކުވައިދީފައިވަނީ ބޮޑެތިކުދިން ފޯސްޓަރކުރުމުގެ ފުރުސަތުވެސް އޮތްކަމާއި، އެކަން ކުރުމަށް ކަޑައްތުކުރާ މަރުހަލާތަކާއި، އެކަމުގައި ކުރިމަތިވެދާނެ ގޮންޖެހުންތަކެވެ. މި ޑްރާމާގެ ސަބަބުން ބޮޑެތިކުދިން ފޯސްޓަރ ކުރުމަށް ޝައުގުވެރިވާ ފަރާތްތަކާއި، އެކުދިން ފޯސްޓަރ ކުރުމަށް އެދި ވުޒާރާއަށް ހުށަހަޅާފައިވާ އެޕްލިކޭޝަންތަކުގެ އަދަދުވެސް މިހާރު އިތުރުވެފައިވާކަން އުފަލާއެކު ފައްޒަ ފާހަގަކުރިއެވެ.

"އަޅުގަނޑުމެންނަށް ލިބޭ ވަރަށް ގިނައިން ފޯސްޓަރ ކުރަން އެޕްލިކޭޝަންސް. އެހެންނަމަވެސް، ގިނަ ބޭފުޅުން މި އެދިލައްވަނީ އަބަދުވެސް 6 މަހުން ދަށުގެ ތުއްތު ކުއްޖަކު ފޯސްޓަރ ކުރަން. އެހެންކަމުން، ފާހަގަކޮށްލަން ބޭނުންވަނި މި ވަގުތު ފޯސްޓަރ ކުރެވޭނެ ތުއްތު ކުދިންނެއް އަޅުގަނޑުމެންގެ ބެލުމުގެ ދަށުގައި ނުވެސް ނެތް. 4 އަހަރުން މަތީގެ ކުދިން ނުވަތަ އެއަށް ވުރެންވެސް ތަންކޮޅެއް ބޮޑެތި ކުދިން 7 ނުވަތަ 10 އަހަރުގެ ވަރަށް ބައިވަރު ކުދިން އެބަތިބި، އަންހެންކުދިންވެސް ފިރިހެންކުދިންވެސް އެބަތިބި." ފައްޒަ ފާހަގަކުރިއެވެ.

ބޮޑެތި ކުދިންނަކީވެސް ޢާއިލީ ވެއްޓެއް ބޭނުންވާނެ ކުދިންކަމަށާއި، އެކުދިން ފޯސްޓަރ ކުރުމުގެ ފުރުސަތުވެސް ހުޅުވިފައިވާއިރު، ޑްރާމާގައި ފެނިގެންދާ ފަދައިން އެކުދިންނަށްވެސް ޢާއިލީ ވެއްޓެއް ލިބިގެން ދިއުމުން އެކުދިންގެ ދިރިއުޅުންވެސް ހެޔޮގޮތުގައި ބަދަލުވެގެންދާތަން ފެނި އެކަމަށް ޝައުގުވެރިވާ އަދި އެކަމަށް ޝަރުތުހަމަވާ ފަރާތެއް ވެއްޖެއްޔާ ކުއްޖަކު ފޯސްޓަރކުރުމަށް ކުރިމަތިލުމަށް އެދޭކަމުގައި ފައްޒަ ފާހަގަކުރިއެވެ.

މިނިސްޓްރީއިން ކުރިއަށްގެންދާ "ކޮންމެ ކުއްޖަކަށް އާއިލާއެއް" ޕްރޮގްރާމަކީ ޢާއިލާތަކުގެ ހާލަތު ބަދަލުކޮށްގެން ދައުލަތުގެ ބެލުމުގެ ދަށުގައި ތިބި ކުދިން އަނބުރާ ޢާއިލާތަކަށް ގެންދިއުމާއި، ފޮސްޓަރިންގ ނިޒާމުގެ ތެރެއިން ކުދިންނަށް ޢާއިލާތައް ހޯދައިދިނުމަށް ކުރިއަށް ގެންދާ ވަރަށް ޚާއްސަ މަސައްކަތެކެވެ. "ކޮންމެ ކުއްޖަކަށް ޢާއިލާއެއް" ޕްރޮގްރާމާއި ގުޅޭ ގޮތުން ތައްޔާރުކޮށްފައިވާ "ޢާއިލާ" ޑްރާމާއަށް ބެލުންތެރިންގެ މަޤުބޫލުކަންވަނީ ލިބިފައެވެ. މި ޑްރާމާ ހާސިލްކޮށްފައިވާ ވަނަތަކުގެ ތެރޭގައި އެންމެ މޮޅު ޑްރާމާ އަދި އެންމެ މޮޅު ސްކްރީންޕްލޭ އަދި ބެލުންތެރިންގެ އެންމެ މަޤްބޫލް ޑްރާމާ ހިމެނެއެވެ.