ޖެންޑަރ ރެސްޕޮންސިވް ބަޖެޓިންގް: އެންމެންނަށް މުހިންމުވަނީ ކީއްވެ؟

ބަޖެޓްގެ މަޝްވަރާތައް ފެށުމާއިއެކު އެންމެ ފުރަތަމަ ސިކުނޑިއަށް ވިސްނެނީ އެއީ ނަންބަރު ތަކެކެވެ. ނުވަތަ ޓެކުހާއި ގުޅުންހުރި ކަމެކެވެ. ނުވަތަ ކަންކަމަށް ޚަރަދުކުރުމަށް ހަދާ ކަރުދާހެކެވެ. ނަމަވެސް ބަޖެޓް ހެދުމަށްފަހު އޭގެއިން އަންހެނުން އަދި ފިރިހެނުންނަށް އަސަރުކުރަނީ ކޮންގޮތަކަށްތޯ އެއްވެސް މިންވަރަކަށް ވިސްނާލިންތޯއެވެ؟ މިއީ، ޖެންޑަރ ރެސްޕޮންސިވް ބަޖެޓިންގެ މުހިންމުކަން ދަނެގަންނަން ޖެހޭ ސަބަބެވެ.

ޖެންޑަރ ރެސްޕޮންސިވް ބަޖެޓިންގް އާއި މެދު ތިލަ ގޮތަކަށް ވިސްނާނަމަ، މިއީ ދަޢުލަތުން ނުވަތަ މުޢައްސަސާއަކުން ކުރާ ޚަރަދުގެ އަސަރު ސީދާ އަދި ނުސީދާ ގޮތުން އަންހެނުންނާއި ފިރިހެނުން އަދި އަންހެން ކުދިންނާއި ފިރިހެން ކުދިންނަށް ކުރާ ގޮތް ދެނެގަތުމެވެ. މިއީ އަންހެނުންނާއި ފިރިހެނުން އަދި އަންހެން ކުދިންނާއި ފިރިހެން ކުދިންނަށް ވަކި ވަކި ބަޖެޓްތަކެއް ކަނޑައެޅުމެއް ނޫނެވެ. އެހެންނަމަވެސް، އެކުލަވައިލެވޭ ބަޖެޓްގެ ސީދާ އަދި ނުސީދާ ނަތީޖާގެ ހަމަހަމަކަން ކަށަވަރުކުރުމެވެ. މިސާލެއް ބަލަމާ ހިނގާށެވެ. ދަޢުލަތުން ޚަރަދުކޮށްގެން މިހަދަނީ ބަސް ދަތުރުން ދަތުރުގެ ނިޒާމް ގުޅައިލުމެވެ. އެހެންނަމަވެސް، މި ބަސް ދަތުރު ކުރާ ރޫޓް ބަލާލާއިރު، އަންހެނުން އާންމުކޮށް ދާ މަންޒިލްތަކަށް، މިސާލަކަށް، ލޯކަލް މާރުކޭޓް ފަދަ ތަންތަނަށް ބަސް މަޑެއްނުކުރެއެވެ. އެހެންކަމުން، ބަޖެޓް ޚަރަދުކުރެވޭ މިކަމުގައި އަންހެނުނަށް ކުރާ ފައިދާ މަދުވެއެވެ. ޖެންޑަރ ރެސްޕޮންސިވް ބަޖެޓިންގގެ މުހިންމުކަމަކީ މިފަދަ ނުސީދާ ތަފާތުތައްވެސް ދެނެގަނެ ޚިދުމަތްތައް ދިނުމުގައި އަންހެނުންނާއި ފިރިހެނުންގެ ޒަރޫރަތްތަކަށް ރިޢާޔަތްކުރުމެވެ.

ޒަމާނުއްސުރެވެސް ޤަބޫލުކުރެވިފައި އޮންނަ ކުށްހީއަކީ އަންހެނުންނާއި ފިރިހެނުންގެ ޒަރޫރަތްތަކަކީ އެއްގޮތަކަށް ކަނޑައެޅިފައިވާ ކަންކަމުގެ ގޮތުގައެވެ. އެހެންނަމަވެސް، ޒަރޫރަތްތަކަށް ރިޢާޔަތްކޮށްގެން ބަޖެޓު ހެދުމުން އޭގެ ފައިދާ ދެޖިންސަށްވެސް ކުރެއެވެ. އެހެންކަމުން، ބަޖެޓް ތައްޔާކުރުމުގައި މިކަމަށް ރިޢާޔަތްކުރާނީ ކިހިނެތްތޯއެވެ؟ މިކަމަށްޓަކައި ބަޖެޓް އެކުލަވާލުމުގެ ކުރިން ބައެއް ސުވާލުތަކަށް ޖަވާބު ހޯދިދާނެއެވެ. މިސާލަކަށް؛

• މި ބަޖެޓް ޚަރަދު ކުރުމުން މީގެ ފައިދާ ކުރަނީ ކޮންބަޔަކަށްތޯއެވެ؟

• މިންތީގެ ތަފާތުތައް ކުޑަކުރުމުގައި މި ޕްރޮގްރާމްއިން އެހީތެރިކަން ލިބޭހެއްޔެވެ؟

• މި ޚިދުމަތް ހޯދުމުގައި އެއްވެސް ޖިންސަކަށް ހުރަސްތަކެއް އެބަހުރިހެއްޔެވެ؟

• މި ޚަރަދު ކުރުމުގައި އެންމެންގެ ޒަރޫރަތްތަކަށް ރިޢާޔަތްކުރެވޭނީ ކިހިނަކުންތޯއެވެ؟

މިންތީގެ ތަފާތުކުރުންތައް ކުޑަކުރުމުގައާއި ނަތީޖާގައި ހަމަހަމަކަމަށް ވާޞިލްވުމުގައި ޖެންޑަރ ރެސްޕޮންސިވް ބަޖެޓިންގއިން ވަރަށް މުހިންމު ރޯލެއް އަދާކުރެއެވެ. އަދި މި ނަތީޖާގެ ހަމަހަމަކަން ޤާއިމްކުރުމަކީ މުޅި މުޖުތަމަޢުއަށް އޭގެއިން ފައިދާ ލިބޭނޭކަމެކެވެ.