މ.މުލަކުގެ "ބޮލި ސްޕޯޓްސް އެކަޑަމީ"

އިބްރާހިމް ޒައީމަކީ މ. މުލަކުގައި "ބޮލި ސްޕޯޓްސް އެކަޑަމީ" ގެ ނަމުގައި ފުޓުބޯޅަ އެކަޑަމީއެއް ހިންގަމުންދާ ކޯޗެކެވެ.

މި އެކަޑަމީގެ މައިގަނޑު މަޤްޞަދަކީ 18 އަހަރުން ދަށުގެ ފުޓުބޯޅަ ކުޅުންތެރިން ތަމްރީނުކޮށް، މުލަކުގައި ހުނަރުވެރި ކުޅުންތެރިން އުފެއްދުމެވެ. އަދި މި ކުދިންނަކީ ޤައުމީ އަދި ބައިނަލްއަޤްވާމީ މައިދާނުގައި ފާހަގަކޮށްލެވޭ ފަދަ ޤާބިލު ކުޅުންތެރިންނަށް ހެދުމަކީ ކޯޗްގެ އެންމެ ބޮޑު އުންމީދެވެ.

އެކަޑަމީ ފުރަތަމަ ހުޅުވުނު ދުވަހުން ފެށިގެން، މުލަކުގެ ރައްޔިތުން ފުޓުބޯޅައަށް ދޭ ލޯތްބާއި ޝައުޤުވެރިކަން ފާހަގަކުރެވިފައިވާ ކަމަށް ޒައީމް ވިދާޅުވިއެވެ. މިހާރުވެސް ގިނަ އަދަދެއްގެ ދަރިވަރުން މި ދާއިރާގައި ތަމްރީނު ކުރަމުންދާ ކަމަށާއި، އެކަޑަމީއާ ގުޅުމަށް ޝައުޤުވެރިވާ އިތުރު ކުދިން ތިބިކަން ޒައީމް އުފަލާއެކު ފާހަގަކުރިއެވެ.

"މި އެކަޑަމީ ހުޅުވީމަ ވަރަށް ގިނަ ކުދިންގެ ބައިވެރިވުމަށް ޝައުޤުވެރިކަން ފާޅުކުރި، އަދި މިހާރު އަޅުގަނޑުމެންގެ އެބަތިބި 80 އަށް ވުރެ ގިނަ ކުދިން. އެހެންކަމުން، މިކަމުގައި ވަރަށް ރަނގަޅު މުސްތަޤުބަލެއް އެބައޮތް މި ކުދިންނަށް. އަދިވެސް ވަރަށް ގިނަ ކުދިން އެދެމުންދަނީ މި އެކަޑަމީގައި ބައިވެރިވުމަށް." ޒައީމް ބުންޏެވެ.

ފުޓުބޯޅައިގެ ދާއިރާއިން ކުރިއަށްދާން އެދޭ ކުދިންނަށް ޒައީމް ދޭ ނަޞޭޙަތަކީ، ކޮންމެ ކުޅިވަރެއްގައިވެސް ކާމިޔާބީގެ ބިންގަލަކީ ރަނގަޅު އަޚްލާޤު ކަމަށެވެ. އެގޮތުން، ރަނގަޅު އަޚްލާޤާއި ސުލޫކުގައި ހިފަހައްޓާ ކޮންމެ މީހަކަށްވެސް، ކުރާ ކޮންމެ ކަމެއްގައިވެސް ކާމިޔާބު ލިބޭނެ ކަމުގައި ޒައީމް ފާހަގަކުރިއެވެ.