ކުޅުދުއްފުށި ރީޖަނަލް ޕޯޓުގެ 2025 ވަނަ އަހަރުގެ އޮޑިޓަށް ތައްޔާރުވުމުގެ ގޮތުން، ޕޯޓުގެ މުވައްޒަފުންނަށް ހޭލުންތެރިކުރުމުގެ ސެޝަންއެއް ކުރިއަށް ގެންގޮސްފި

     ހދ. ކުޅުދުއްފުށި ރީޖަނަލް ޕޯޓް، ބައިނަލްއަޤުވާމީ މިންގަނޑުތަކަށް ފެތޭ ގޮތަށް ބަނދަރުގެ ސަލާމަތީ ކަންކަން ހަރުދަނާ ކުރުމުގެ ގޮތުން، އައި.އެސް.ޕީ.އެސް. ކޯޑުގެ ދަށުން 2025 ވަނަ އަހަރު ހަދަންޖެހޭ އޮޑިޓަށް ތައްޔާރުވުމުގެ މަސައްކަތް ފަށައިފިއެވެ. މި އޮޑިޓަކީ ބައިނަލްއަޤުވާމީ ބަނދަރުތަކުގައި ސަލާމަތީ ގޮތުން ހުންނަންޖެހޭ ކަންކަން ކަށަވަރުކޮށް، އެކަންކަން ތަންފީޒުކުރުމަށްޓަކައި އައި.އެމް.އޯ (އިންޓަރނޭޝަނަލް މެރިޓައިމް އޯގަނައިޒޭޝަން) އިން ކަނޑައަޅާފައިވާ މުހިންމު ކޯޑެކެވެ.

     އިންޓަރނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ (އައި.އެސް.ޕީ.އެސް.) ކޯޑަކީ، ބައިނަލްއަޤުވާމީ ބަނދަރުތަކުގައި ސަލާމަތީ ގޮތުން ހުންނަންޖެހޭ ކަންކަން ބަޔާންކޮށް، އެކަންކަން ބަލައި ތަންފީޒުކުރުމަށް އައި.އެމް.އޯ. އިން ކަނޑައަޅާފައިވާ ކޯޑެކެވެ. މި ކޯޑުގެ ދަށުން ބައިނަލްއަޤުވާމީ ބަނދަރުތައް ކޮންމެ އަހަރަކު އެއްފަހަރު އޮޑިޓްކޮށް، ސެކިއުރިޓީގެ ކަންކަން ހަރުދަނާކުރުމަށް ކުރަންޖެހޭ ކަންކަން ބަލައި، ރަނގަޅުކުރަންޖެހޭ ކަމެއް ފާހަގަވެއްޖެނަމަ އެކަންކަން ކުރުމަށް އަންގަމުންދާނެއެވެ. 

     މި ކޯޑުގެ ދަށުން އެއްވެސް ސެކިއުރިޓީ ކަމެއް ނުވަތަ ބަނދަރުގައި ހުންނަންޖެހޭ ސެކިއުރިޓީއާ ގުޅޭ ކަމަކަށް ބަދަލު އައިސްފައިވޭތޯ ބަލައި، އެކަންކަން ފާހަގަ ކުރެވިއްޖެނަމަ ޕޯޓް ސެކިއުރިޓީ އެސެސްމެންޓެއް ހެދުމަށް އަންގާނެއެވެ. އަދި މިފަދަ ކަމެއް ފާހަގަ ކުރެވިއްޖެނަމަ އެކަންކަން ޕޯޓް ފެސިލިޓީ ސެކިއުރިޓީ ޕްލޭނަށް އިތުރުކޮށް، ޕްލޭން ބަދަލުކުރުމަށް ވެސް އަންގާނެއެވެ. މި އޮޑިޓްގެ ސަބަބުން ޕޯޓްތަކުގެ ސަލާމަތީ ކަންކަން ހަރުދަނާ ކުރުމަށް ބާރު އެޅި، ޕޯޓްތައް ސެކިއުރިޓީ ގޮތުން ހަރުދަނާ ތަންތަނަށް ބަދަލުވެގެންދާނެއެވެ. 

     މި އޮޑިޓަށް ތައްޔާރުވުމުގެ ގޮތުން ބޭއްވުނު ހޭލުންތެރިކުރުމުގެ ޕްރޮގްރާމުގައި، އައި.އެސް.ޕީ.އެސް. އޮޑިޓް ހެދުމުގައި ބަލާ ކަންކަމާއި، އެކަންކަން ބަލާ ގޮތްތަކާއި، ޕޯޓަށް އަންނަ އުޅަނދުފަހަރުން ހަދަންޖެހޭ ޑޮކިއުމެންޓް އޮފް ސެކިއުރިޓީ ހެދުމުގައި އަމަލުކުރަންޖެހޭ ގޮތްތަކާއި، ޑޮކިއުމެންޓް އޮފް ކޮމްޕްލަޔަންސްގެ މުހިންމުކަމުގެ މައްޗަށް އަލިއަޅުވައިލައި މައުލޫމާތު ދެވުނެވެ. މި ހޭލުންތެރިކުރުމުގެ ޕްރޮގްރާމުގެ ސަބަބުން އައި.އެސް.ޕީ.އެސް.ގެ މުހިންމުކަން ބަނދަރުގައި މަސައްކަތްކުރާ ފަރާތްތަކަށް ބުނެދެވި، ކުރިއަށްވުރެ ރަނގަޅަށް އައި.އެސް.ޕީ.އެސް. ކޯޑް ތަންފީޒުކުރުމަށް ބާރު އެޅިގެންދާނެއެވެ. މި އޮޑިޓަށް ކުޅުދުއްފުށި ރީޖަނަލް ޕޯޓުން ތައްޔާރުވަމުންދަނީ، ބައިނަލްއަޤުވާމީ ދަތުރުފަތުރުގެ ސަލާމަތީ މިންގަނޑުތައް ރާއްޖޭގެ ބަނދަރުތަކުގައިވެސް ހަރުދަނާ ކުރުމުގެ މުހިންމުކަމަށް ބާރުއަޅަމުންނެވެ.